Asebter amenzawi

Yefka umeṛḥum Ait Ahmed akk tudert-nnes i uḥuddu n tmurt-nnes d uɣref-nnes

LEZZAYER TAMANEɣT – Wekkden-d kra n wudmawen iɣelnawen, imjahden d yimḍebbren n tuddsiwin (munaḍḍamat) tiɣelnawin ass n lḥedd dakken ameṛḥum Ait Ahmed, ay yewwḍen leɛfu n Ṛebbi ass n laṛebɛa deg Lausanne (Sswis) « yella d udem amezruyan ur yesɛin tamtilt yerna yella iḥemmel tamurt-nnes d uɣref-nnes ».

Deg yiwet n tseɣrut (taṣriḥ) i tɣemsa, yenna-d Uselway n Useqqamu Islaman Unnig, ccix Abu Omrane, dakken ameṛḥum Ait Ahmed « yella d argaz amegzu (daki) yerna d asertay yesɛan ttejṛiba, yefka akk tameddurt-nnes in uɣlan d temsal yerzan aɣref ».

Massa Drifa Ben Mhidi, weltma-s n umeɣrus (cahid) Larbi Ben Mhidi, tenna-d dakken ameṛḥum « yella d argaz ameqran ay yefkan akk tameddurt-nnes i Ldzayer », am wakken ay d-terna dakken argaz-a « yella yessen ad yemciweṛ yerna yettqadar leṛyuy n wiyaḍ, am wakken ur yeḥqir yiwen, anect yebɣu yemgerrad ».

Aneɣlaf aqbur d umaslaḍ (ɛuḍw) n Useqqamu n Uɣlan, Said Berkat, iwekked-d dakken ameṛḥum Ait Ahme « yella d argaz ameqran, azal-nnes anect n lecɣal-nni imeqranen ay iga deg ṭṭrad urbiḥ n uslelli aɣelnaw ɣer yidis n yirgazen niḍen ay yennuɣen seg wul ɣef tmurt-a », am wakken ay d-yerna dakken Ait Ahmed yella daɣ d « amḥaddi ameqran n tlelli n yiɣerfan deg umaḍal ».

Deg yidis-nnes, tamarut tamatut n Tadukli Taɣelnawt n Tsednan Tidzayriyin, Nouria Hafsi, twekked-d dakken amjahed Ait Ahmed « yella d azamul n tegrawla », yerna tenna-d dakken « tameddurt-nnes teččuṛ d iseflan, d azalen, d yimenzayen (mabadi’) ayɣef yennuɣ, dɣa d aya ay t-yerran d azamul n tugdut d telsaẓri (insaniyya) deg umaḍal ».

Seg yidis-nnes, amjahed Abdelmoula Mohamed, n Twilayt Tis 4 Tamezruyant, iger-d tiɣri i yilemẓiyen akken « ad d-agmen seg tekta d yimenzayen n umeṛḥum » ay yefkan tameddurt-nnes i Ldzayer d uɣref-nnes.