Asebter amenzawi

Lezzayer d Tunes la tturarent dduṛ d ameqran deg umɛawen adamsan deg Lmeɣreb

TIPAZA –Yenna-d uneɣlaf n tedrimt, Abderrahmane Benkhelfa, ass n lḥedd deg Tipaza, dakken Ldzayer d Tunes la tturarent dduṛ d ameqran deg umɛawen adamsan deg temnaḍt n Lmeɣreb.

« Ldzayer d Tunes la ssarament ad urarent dduṛ d ameqran deg umɛawen adamsan deg temnaḍt n Lmeɣreb », yerna la ssefrayent ad sǧehdent « annummed » (indimaǧ) adamsan gar tmura n temnaḍt-a, ɣef wakken ay d-yenna Mass Benkhalfa deg tinawt-nnes deg tfugla (ḥafl) n tuffɣa n usmal wis 32 n yinelmaden n Usudu Adzayri-Atunsi n Tdamsa Tadwanant d Tewsant n Teqliɛt. Tinawt-a yeɣra-tt-id umaru amatu n uɣlif, Boutaba Mouloud, s yisem n uneɣlaf.

Deg wayen yerzan aswir n umɛawen ucrik deg unrar n tedrimt, yesmekti-d uneɣlaf dakken Asudu-a (maɛhad) yennulfa-d i lmend n ukemmel n waya, yerna amɛawen-a ad ikemmel s ussebded n tbanka tamɣarbit n ussefti d tnezzut tuffiɣt i usmal n umɛawen adamsan deg temnaḍt.

Dɣa yenna-d uneɣlaf, deg temsalt-a, dakken iswan idamsanen « ucriken » gar tmura n Lmeɣreb sɛan azal yerna bɣan ad ssiwḍen timura-a ad sɛunt tadamsa yettwanewwɛen ad yebnun ɣef « umedxul s uterras », « tukksa n trebbawt (baṭala) », tazmert n umsizwer, assemɣer n tɣerɣert n leɣrama d urkad n leɣrama ad yilin d ttawil i uxelleṣ n yisseftiyen.

Yenna-d unmahal (safir) n Tunes deg Ldzayer Tamaneɣt, Abdelmadjid Ferchichi, dakken Asudu Adzayri-Atunsi n Tdamsa Tadwanant d Tewsant d « amedya ibanen » n umɛawen gar yimeẓla (maṣaliḥ) idrimanen n snat-a n tmura, am wakken ay d-iwekked ɣef wazal n tbanka yesɛan Ldzayer d taselwayt-nnes yerna tesɛa axxam-nnes deg Tunes, imi « tesseǧhad amɛawen d amedyan » gar snat-a n tmura.

Asudu Adzayri-Atunsi n Tdamsa Tadwanant d Tewsant yennulfa-d s yiwen n umtawa (ittifaq) ucrik deg 3 Ctembeṛ 1983, yerna yessuffeɣ-d 1209 n yikataren (iṭarat) unnigen ay ixeddmen deg yimeẓla idrimanen n snat-a n tmura, gar-asen 777 n yikataren idzayriyen.