Asebter amenzawi

Ɛiraq: Imenɣan n Daɛec rewlen yiwen n usuddis deg Ramadi

BEɣDAD – Akk irebraben n tegrawt ay isemman i yiman-nnes Awanak Islaman (Daɛec) ffɣen, ass n lḥedd, seg yiwen n usuddis (murakkab) s wazal-nnes deg temdint n Ramadi ayɣef d-zzin yiɣallen iɛiraqiyen, ɣef wakken ay d-yenna uneṭṭaq n yiɣallen n tedɣert (nuxba) n yimenɣi mgal rrebrab.

« Akk imenɣan (muqatilin) n Daɛec ddan. Ulac azbu (muqawama) », ɣef wakken ay d-yenna uneṭṭaq Sabah al-Numan.

D acu kan, yessefk ad tettwassizdeg temnaḍt-a seg « lminat d lbumbat yendin » ay tessers Daɛec uqbel ma udfen yiserdasen iɛiraqiyen, ɣef wakken ay d-yenna.

« Iɣallen-nneɣ zzin-d i usuddis-nni anabḍan (ḥukumi). Ḍḍfen akk adafen d lbenyanat ay d-yezzin fell-as uqbel ma udfen ɣer-s », ɣef wakken ay d-yerna Mass Numan.

Ramadi tusa-d 100 n yikilumitren deg utaram (ɣarb) n Beɣdad yerna d nettat ay d tamaneɣt n tnebḍit (muqaṭaɛa) n Al-Anbar. D ta ay d tanebḍit tameqrant akk n Ɛiraq yerna tecrek tilisa d Surya, Luṛdun d Tgelda Tasaɛudit.