Asebter amenzawi
Aḥric n lminat ad yennerni mliḥ deg 2016 (Bouchouareb)
LEZZAYER TAMANEɣT – Yenna-d uneɣlaf n temguri (ṣinaɛa) d lminat, Abdesselam Bouchouareb, ass n letniyen d akken aḥric n lminat ad yennerni s lǧehd seg 2016 d asawen s beddu n yisenfaren i lmend n ussebded n temgrui n lminat n tidet ad yettekkin deg ussenqes n waǧaw.
Mi d-yessawel deg ṛṛadyu taɣelnawt, yenna-d Mass Bouchouareb d akken aseggas n 2016 ad yili d « aseggas n lminat » s beddu n uɣellet n waṭas n yisenfaren n ussefti ay d-yebdan deg yiseggasen-a ineggura, ladɣa deg unrar n ufusfat, uzzal, arxam, amenganiz, avanadyum d uzengiw. Yenna-d daɣ d akken tasuddest (istratiǧiyya) n uḥric n lminat tettwawehha ɣer ussiǧew n yizaraten-a (maɛadin).
Deg wayen yerzan afusfaṭ, yenna-d uneɣlaf d akken ahil n usnefli (tanmiya) n ufares (intaǧ) aɣelnaw yessefray ad yaweḍ ɣer 6 n yimelyunen n yiṭunen deg useggas seg-a ɣer 2018, d 10 n yimelyunen n yiṭunen seg-a ɣer 2010. Ass-a, Lezzayer tessekfal-d ala 1,2 d amelyun n yiṭunen yerna yenna-d uneɣlaf d akken i lmend n tmerniwt n ufares, ad rnun ad bnun snat n lluzinat n ufusfaṭ, yiwet deg Wad Lkebrit (Ssuq Ahṛas), ma d tayeḍ deg Leɛwinat (deg twilayt n Galma).
Isseftiyen-a ad ǧǧen Lezzayer ad teḥkem deg uḥric n temguri n tmaqqusin (asmida), yerna d aya ad tt-yeǧǧen ad teḍḍef amkan seg yimezwura deg ussiǧew n yifarisen-a deg umaḍal, ɣef wakken ay d-yenna uneɣlaf.
Deg wayen yerzan tamguri n wuzzal, yenna-d Mass Bouchouareb d akken tella-d tiddit ɣer sdat deg wayen yerzan tazrawt (dirasa) tadamsant yeqqnen ɣer Ɣar Ǧbilat (Tinduf), yerna tazrawt tamezwarut ɣef waya terza idis atwilan (tiqni) n usenfar. Tazrawt-a telha-d yid-s yiwet n tnarit n tezrawin takanadit.
Tanarit-a n tezrawin tefren tarrayin (ṭuruq) timxeyyrin akk i usekker (muɛalaǧa) n wuzzal ad d-yettwaskelfen seg Ɣar Ǧbilat, d tarrayt i ussenqes n ufuṣfur deg wuzzal seg 0,8 ɣer 0,3%.
Tazrawt-a tekcef-d d akken tella lɛula d tameqrant n wuzzal deg lmina-nni, yerna tasmekta (kammiyya) n wuzzal yellan din tewweḍ ɣer 63%, ɣef wakken ay d-yenna uneɣlaf.
