ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵙⵙⴻⴼⵄⴻⵍ ⵏ ⵜⵜⴻⵙⵔⵉⵃⴰⵜ ⵏ ⵡⴰⴵⴰⵡ ⵏ ⵙⵙⴻⵍⵄⴰ ⵏ ⵜⴼⴻⵍⵍⴰⵃⵜ ⵙⴻⴳ 10 ⵢⴻⵏⵏⴰⵢⴻⵔ ⴷ ⴰⵙⴰⵡⴻⵏ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⴰⵙⵙⴻⴼⵄⴻⵍ ⵏ ⵜⵜⴻⵙⵔⵉⵃⴰⵜ ⵏ ⵡⴰⴵⴰⵡ ⵏ ⵢⵉⴼⴰⵔⵉⵙⴻⵏ (ⵎⴰⵏⵜⵓⴵⴰⵜ) ⵏ ⵜⴼⴻⵍⵍⴰⵃⵜ ⴷ ⵜⵓⵞⵞⵉⵜ ⴰⴷ ⵢⴻⴱⴷⵓ ⴰⵙⵙ ⵏ 10 ⵢⴻⵏⵏⴰⵢⴻⵔ 2016, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵍⴻⵜⵏⵉⵢⴻⵏ ⵓⵏⴻⵖⵍⴰⴼ ⵏ ⵜⵏⴻⵣⵣⵓⵜ (ⵜⵉⴵⴰⵔⴰ) ⴷⴻⴳ ⵢⵉⵡⴻⵏ ⵏ ⵓⵍⵖⵓ.

ⵙ ⵡⴰⵢⴰ, ⵢⴻⵏⵏⴰ-ⴷ ⵓⵖⵍⵉⴼ ⴰⴷ ⴷ-ⵢⴻⵙⵙⵓⴼⴼⴻⵖ ⴷⴻⴳ ⵓⴷⴻⴳ-ⵏⵏⴻⵙ ⵏ ⵉⵏⵜⴻⵔⵏⴻⵜ ⵢⵉⵡⴻⵏ ⵏ ⵓⵍⵖⵓ (ⴱⴰⵢⴰⵏ) ⵉ ⵓⵅⴻⴱⴱⴻⵔ, ⴷ ⴰⵍⵖⵓ ⴰⴷ ⵢⴻⵜⵜⵡⴰⴼⴻⵔⵇⴻⵏ ⴷⴰⵖ ⵉ ⵜⵎⴻⵀⵍⵉⵡⵉⵏ (ⵎⵓⴷⵉⵔⵉⵢⵢⴰⵜ) ⵏ ⵜⵏⴻⵣⵣⵓⵜ ⴷⴻⴳ ⵜⵡⵉⵍⴰⵢⵉⵏ ⴷ ⵜⴻⵅⵅⴰⵎⵉⵏ ⵏ ⵜⵏⴻⵣⵣⵓⵜ ⴷ ⵜⴻⵎⴳⵓⵔⵉ.

ⴰⵍⵖⵓ-ⴰ ⴰⴷ ⴷ-ⵉⵅⴻⴱⴱⴻⵔ ⵖⴻⴼ ⵜⴰⵍⵍⵉⵜ ⴰⵢⴷⴻⴳ ⵡⵉⴷ ⴰⵢ ⵜⴻⵔⵣⴰ ⵜⴻⵎⵙⴰⵍⵜ ⵣⴻⵎⵔⴻⵏ ⴰⴷ ⵙⵙⵓⵜⵔⴻⵏ ⵜⵜⴻⵙⵔⵉⵃⴰⵜ, ⵢⴻⵔⵏⴰ ⴰⴷ ⴷ-ⵢⴻⴱⴷⴻⵔ ⵉⵙⵎⴰⵡⴻⵏ ⵏ ⵢⵉⴼⴰⵔⵉⵙⴻⵏ ⴰⵢ ⵢⴻⵔⵣⴰ ⵜⵜⴻⵙⵔⵉⵃ ⴷ ⵍⴻⴽⵡⴰⵖⴻⴹ ⴰⵢ ⵢⴻⵙⵙⴻⴼⴽⴻⵏ ⵉ ⵓⵙⵙⵓⵜⴻⵔ ⵏ ⵜⵜⴻⵙⵔⵉⵃ-ⴰ.

ⵏⴰⵇⴰⵍ, ⵙⵙⴻⵍⵄⴰ-ⴰ ⵜⴻⵍⵍⴰ ⵜⴻⵜⵜⵡⴰⴵⴰⵡ-ⴷ ⵙ ⵓⵏⴰⴳⵔⴰⵡ ⵏ ⴼⵉⴼⵧ (ⴼⵉⵔⵙⵜ ⵉⵏ, ⴼⵉⵔⵙⵜ ⵧⵓⵜ – ⴰⵎⴻⵏⵣⵓ ⴰⵢ ⴷ-ⵢⴻⵡⵡⴹⴻⵏ ⴷ ⴰⵎⴻⵏⵣⵓ ⴰⴷ ⵢⴰⵡⵉⵏ), ⴷⵖⴰ ⴷ ⵡⴰ ⴰⵢ ⴷ ⴰⵏⴰⴳⵔⴰⵡ ⴰⵢ ⵢⴻⵜⵜⴰⴵⴵⴰⵏ ⵉⵎⴰⴵⴰⵡⴻⵏ ⵉⴷⵣⴰⵢⵔⵉⵢⴻⵏ ⵓⵔ ⵜⵜⵅⴻⵍⵍⵉⵚⴻⵏ ⴰⵔⴰ ⵍⴻⵖⵔⴰⵎⴰ ⵏ ⵜⴻⴷⵡⴰⵏⵜ ⵖⴻⴼ ⵙⵙⴻⵍⵄⴰ ⴰⵢⵖⴻⴼ ⵜⴻⵜⵜⵡⴰⴽⴽⴻⵙ ⵍⴻⵖⵔⴰⵎⴰ ⵏⴻⵖ, ⵓⵍⴰ ⵎⴰ ⵅⴻⵍⵍⵚⴻⵏ, ⴰⴷ ⵅⴻⵍⵍⵚⴻⵏ ⴽⴰⵏ ⵛⵡⵉⵟ, ⴷ ⴰⵛⵓ ⴽⴰⵏ, ⴰⴵⴰⵡ ⵏ ⵙⵙⴻⵍⵄⴰ-ⴰ ⵢⴻⵙⵄⴰ ⵜⵉⵍⵉⵙⴰ ⴷⴻⴳ ⵜⴻⵙⵎⴻⴽⵜⴰ (ⴽⴰⵎⵎⵉⵢⵢⴰ).

ⵎⴰ ⴷ ⴰⵏⴰⴳⵔⴰⵡ-ⴰ ⵏ ⵜⵜⴻⵙⵔⵉⵃⴰⵜ ⵢⴻⵎⵙⴻⴼⵀⴰⵎ ⴼⴻⵍⵍ-ⴰⵙ ⵓⵙⴻⵇⵇⴰⵎⵓ ⵏ ⵓⵏⴰⴱⴰⴹ (ⵃⵓⴽⵓⵎⴰ) ⴷⴻⴳ ⵏⵡⴻⵎⴱⴻⵕ ⵢⴻⵣⵔⵉⵏ, ⵉ ⵍⵎⴻⵏⴷ ⵏ ⵓⵙⵙⴻⴼⵄⴻⵍ ⵏ ⵍⵇⴰⵏⵓⵏ ⴰⵎⴰⵢⵏⵓ ⵏ ⵜⵏⴻⵣⵣⵓⵜ ⵜⵓⴼⴼⵉⵖⵜ, ⴷⵖⴰ ⴷ ⴰⵢⴰ ⴰⵢ ⵢⴻⴵⴵⴰⵏ ⴰⵏⴰⴱⴰⴹ ⴰⴷ ⴷ-ⵢⴻⴳ ⴰⵏⴰⴹ (ⵎⴰⵔⵙⵓⵎ) ⴰⵙⵍⴻⴽⵎⴰⵏ ⵏ 6 ⴷⵓⵊⴻⵎⴱⴻⵕ 2015 ⵉ ⵓⵙⵙⴻⴼⵔⵓ ⵏ ⵛⵛⵓⵔⵓⴹ ⵏ ⵜⵓⴽⵛⵉ ⵏ ⵜⵜⴻⵙⵔⵉⵃⴰⵜ ⵏ ⵡⴰⴵⴰⵡ ⴷ ⵓⵙⵙⵉⴵⴻⵡ ⵏ ⵢⵉⴼⴰⵔⵉⵙⴻⵏ ⴷ ⵙⵙⴻⵍⵄⴰⵜ.