Asebter amenzawi
Surya: lemcawṛat ad bdunt ass n 25 Yennayer (Iɣlanen Yeddukklen)
NEW YORK (Tuddsa n Yiɣlanen Yeddukklen) – Amazun uzzig (mabɛut xaṣṣ) n Yiɣlanen Yeddukklen i Surya, Staffan de Mistura, d akken yessefra-d ass n 25 Yennayer 2016 akken ad bdunt lemcawṛat n talwit gar yidisan yemxaṣamen deg Surya, ɣef wakken ay d-yenna uneṭṭaq-nnes.
Lecmawṛat-a ad d-ilint deg Geneve, yerna yeffeɣ-d yisali-a deffir ma yesɛedda Useqqamu n Tɣellist (amn) taneɣtust 2254 aydeg Tuddsa n Yiɣlanen Yeddukklen yettunefk-a dduṛt meɣɣren ugar deg ussemlili n yidisan ay terza temsalt akken ad bdun lemcawṛat i tukkit (intiqal) tasertit, s wahil i uḥbas n yimenɣi, assebded n tmenḍawt tamaynut d ussuddes n tefranin, yerna aya akk ad d-yili ddaw leɛnaya n Yiɣlanen Yeddukklen.
« S uqader n yiḥezziben ibanen ay d-tessefra tneɣtust 2254 (2015) n Useqqamu n Tɣellist, amazun uzzig la yessefray ad ifak amciweṛ-nnes deg tezwara n Yennayer, akken ad d-bdunt lemcawṛat gar Yisuriyen deg 25 Yennayer 2016 deg Geneve », ɣef wakken ay d-yenna uneṭṭaq n Mass de Mistura.
Dɣa ɣef waya ay « la yessaram ad d-yili uttekki ummid, deg ukala-a (masar), sɣur akk idisan isuriyen umɛinen. Tidyanin ay la yettkemmilen ḍerrunt-d deg unrar ur yessefk ara ad sneflent (lemcawṛat-a) seg ubrid », ɣef wakken ay d-yenna.
Deg tneɣtust-nnes (qarar), yebded Useqqamu n Tɣellist ɣer yidis n ukala aserti n lemcawṛat ayyes ad d-lhun Yisuriyen yerna ad d-yili ddaw leɛnaya d uɛawen n Tuddsa n Yiɣlanen Yeddukklen. Akala-a ad d-yessebded, seg-a ɣef 6 n wayyuren, « anabaḍ (ḥukuma) aydeg yella laman, aydeg ad ttekkin akk yidisan » yerna ur yettili ara yebna ɣef llsas n tegrawin yemgerraden deg ddin neɣ deg tneṣlit. Taneɣtust-a tessefra-d daɣ ahil d yiḥezziben i ussebded n tmenḍawt tamaynut, yerna attan i lmend n ussuddes n tefranin tilelliyin yerna d tiluganin seg-a ɣef 18 n wayyuren, s uqader n tmenḍawt-nni tamaynut ayɣef ad msefhamen Yisuriyen. Aya akk ad d-yili ddaw leɛnaya n Tuddsa n Yiɣlanen Yeddukklen, yerna lemcawṛat i lmend n waya reẓment i wakk Isuriyen, ula d wid yellan deg yinig.
