Asebter amenzawi

Tessebges ddula ttawilat yessefken i uḥuddu n tẓegwa (Ferroukhi)

LEZZAYER TAMANEɣT – Yenna-d uneɣlaf n tfellaḥt, Sid Ahmed Ferroukhi, ass n ttlata, dakken awanak (dawla) yessebges akk ayen d-iwejden d ttawilat, d idrimen d yimdanen i uḥuddu n tẓegwa.

« Yessebges uwanak akk ttawilat inganen (maddiyya), idrimanen d yilsanen i uḥraz n tbuɣar (tarawat) n tẓegwa d ussemɣer-nsent », ɣef wakken ay d-yenna uneɣlaf deg tririt i yiwet n tuttra yuran ay as-d-yuzen yiwen n umazan n Ugraw Aɣerfan Aɣelnaw ɣef wugur n ussidef n yiɛessasen imaynuten n tẓegwa d uḥuddu n tbuɣar n tẓegwa deg twilayt n Waregla.

Ixeddamen itwilanen (tiqniyyin) n tedbelt n tẓegwa wwḍen ɣer wugar n 6.200, yerna xeddmen d imsulta (curṭiyyin) n tẓegwa s umɛawen d yifesyanen n temsulta taɣedmant, s uqader n lqanun n uɛaweb, ɣef wakken ay d-yenna Mass Ferroukhi.

Timezzayin (dawriyyat) n yimeggiyen d yifesyanen n temsulta taɣedmant (curṭa qaḍa’iyya) yeqqnen ɣer tedbelt n tẓegwa ttxeḍḍint imdanen ay irekḍen lqanun deg tẓegwa, am wid ay ikessen lmal-nsen deg temnaḍin yettwaḥerzen, wid ay yettebbin isekla d wid ay yessendaḥen times i tẓegwa, ɣef wakken ay d-yenna.

Yesmekti-d daɣ uneɣlaf, deg temsalt-a, dakken yettwastenya umtawa (ittifaq) deg 2014 d temsetla (darak) taɣelnawt i uḥuddu n tgemmi taɣelnawt n tẓegwa, yerna yella-d waya i ussemyuddes d umbaddel n yisalan, ttejṛibat d yisefka isnamuranen.