Asebter amenzawi

Ugar n 400 n liḥalat n utɛeddi ɣef Yinselmen deg Fṛansa deg 2015

PARIS – Ugar n 400 n lecɣal n utɛeddi ɣef Yinselmen ay d-yettwaḥesben deg Fṛansa deg useggas n 2015, dɣa s waya, rnan lecɣal-a s 200% ɣef leḥsab n 2014 aydeg d-llan ala 133 n lecɣal, ɣef wakken ay d-yenna ass n laṛebɛa uɣmis ayallas n Le Parisien.

ɣef leḥsab n Tmagla (wafd) Agraɣlif i Yimenɣi Mgal Temsirit d Temgelsamit (DILCRA), « lecɣal-a d wid yerzan rregmat, tuggza (tahdid) d usserɣi n tmesgidiwin », ɣef wakken ay d-yenna uɣmis-a ayallas ay d-yernan d akken zemren ad rnun lecɣal-a arma wwḍen ɣer 3 n tikkal ugar n wanect llan deg 2014.

« Aya d timerniwt tameqrant yerna tessagad s waṭas, yerna ayen yettekkan deg tmerniwt-nsen d lecɣal-nni (n utɛeddi) ay d-yellan deffir txazzabiyin-nni n Yennayer (2015) » mgal uɣmis n Charlie Hebdo, ɣef wakken ay d-yenna Gilles Clavreul, iɣef n DILCRA.

Tadyant tameqrant akk deg lecɣal-a d tin aydeg ttekkan ugar n 300 n yimdanen ass n ljemɛa deg Ajaccio (Corsica) deg truẓi n yiwet n tmesgida d usserɣi n nnesxat n Leqran.

ɣef leḥsab n tecrawt-a, 2015 d netta ay d aseggas aydeg d-yella umḍan ameqran akk n yitɛeddiyen ɣef yimukan n uɛbad, yerna imeẓla n uwanak (maṣaliḥ dawla) n Fṛansa la ttḥuddun, ussan-a, 1000 seg 2500 n yimukan n uɛbad yellan deg Fṛansa. Lecɣal-a n utɛeddi tettili-d deg-sen tirawt s ssbiɣa ɣef yiɣerban n yimukan n uɛbad, assersi n yiɣfawen d yiẓerman n yilfan deg yimukan-a, azelli n tqerɛunin n tmes d usserɣi n yimukan-a.

Aselway n Usanay (marṣad) Mgar Tislamufubit, yeqqnen ɣer Useqqamu Afṛensis n Usɣan Ineslem, Abdallah Zekri, yesḥassef, seg yidis-nnes, imi ay llant tegrawin timaganin ay yemmɣen ɣef tlawin imi ay lsant aḥiǧab. « Kra seg-sent jelqen-asent acemmel-nsent, yerna wwḍen armi ay wten yiwet s teqseḥ. Tugdi terna s waṭas ɣer wid ay terza temsalt n ddin ».