ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵏⵧⵓⵔⵉ ⵉⴳⴻⵔ-ⴷ ⵜⵉⵖⵔⵉ ⵉ ⵢⵉⴼⴻⵍⵍⴰⵃⴻⵏ ⴰⴽⴽⴻⵏ ⴰⴷ ⵙⵇⴻⴷⵛⴻⵏ ⵜⵜⴰⵡⵉⵍ ⴰⴽⴽⴻⵏ ⴰⴷ ⴷ-ⵙⵙⵉⴳⵔⴻⵏ ⴰⵎⴰⵏ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵉⴳⴻⵔ-ⴷ ⵜⵉⵖⵔⵉ ⵓⵏⴻⵖⵍⴰⴼ ⵏ ⵜⴻⵖⴱⵓⵍⴰ (ⵎⴰⵡⴰⵔⵉⴷ) ⵏ ⵡⴰⵎⴰⵏ ⴷ ⵜⵡⴻⵏⵏⴰⴹⵜ, ⴰⴱⴷⴻⵍⵡⴰⵀⴰⴱ ⵏⵧⵓⵔⵉ, ⴰⵙⵙ ⵏ ⵍⴻⵅⵎⵉⵙ, ⵉ ⵢⵉⴼⴻⵍⵍⴰⵃⴻⵏ ⴰⴽⴽⴻⵏ ⴰⴷ ⵙⵇⴻⴷⵛⴻⵏ ⵜⵜⴰⵡⵉⵍⴰⵜ ⴰⵢ ⴷ-ⵢⴻⵙⵙⴰⴳⴰⵔⴻⵏ ⴰⵎⴰⵏ ⴷⴻⴳ ⵓⵙⵙⵡⴰⵢ ⵏ ⵜⴼⴻⵍⵍⴰⵃⵜ, ⵍⴰⴷⵖⴰ ⵉⵎⵉ ⴰⵢ ⵜⴻⵏⵇⴻⵙ ⵎⵍⵉⵃ ⵍⵄⵓⵍⴰ ⵏ ⵡⴰⵎⴰⵏ ⴷⴻⴳ ⵍⴻⵣⵣⴰⵢⴻⵔ ⵖⴻⴼ ⵍⴵⴰⵍ ⵏ ⵍⴻⵅⵚⴰⵚ ⵏ ⵓⴳⴻⴼⴼⵓⵔ.

« ⴷ ⵍⴰⵡⴰⵏ ⴰⴷ ⵢⴻⴼⴼⴻⵖ ⵓⵄⴻⵢⵢⴻⵏ ⵉ ⵍⵎⴻⵏⴷ ⵏ ⵓⵙⵃⵓⵍⴼⵓ ⵏ ⵢⵉⴼⴻⵍⵍⴰⵃⴻⵏ ⵖⴻⴼ ⵓⵙⵙⴻⵇⴷⴻⵛ ⵏ ⵜⴻⵜⵡⵉⵍⵉⵏ (ⵜⵉⵇⵏⵉⵢⵢⴰⵜ) ⵏ ⵓⵙⵙⵉⴳⴻⵔ ⵏ ⵡⴰⵎⴰⵏ, ⴷⴻⴳ ⵡⴰⴽⵓⴷ ⴰⵢⴷⴻⴳ ⴷ-ⵢⴻⵍⵍⴰ ⵍⴻⵅⵚⴰⵚ ⴷ ⴰⵎⴻⵇⵔⴰⵏ ⵏ ⵡⴰⵎⴰⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ ⴷⴻⴳ ⵜⵔⵉⵔⵉⵜ ⵖⴻⴼ ⵢⵉⵡⴻⵜ ⵏ ⵜⵓⵜⵜⵔⴰ ⵙⵖⵓⵔ ⵢⵉⵡⴻⵏ ⵏ ⵓⵎⴰⵣⴰⵏ (ⵏⴰ’ⵉⴱ) ⴷⴻⴳ ⵢⵉⵡⴻⵜ ⵏ ⵜⵖⵉⵎⵉⵜ ⴰⵢ ⴷ-ⵢⴻⵍⵍⴰⵏ ⵉ ⵜⵓⵜⵜⵔⵉⵡⵉⵏ ⵙ ⵡⴰⵡⴰⵍ ⴷⴻⴳ ⵓⴳⵔⴰⵡ ⴰⵖⴻⵔⴼⴰⵏ ⴰⵖⴻⵍⵏⴰⵡ ⵖⴻⴼ ⵓⵄⴻⴹⴹⴻⵍ ⴷⴻⴳ ⵍⴻⴱⵏⵉ ⵏ ⵡⵓⴳⴳⵓⴳ ⵏ ⵡⴰⴷ ⵜⴰⵀⵜ ⴷⴻⴳ ⵎⵄⴻⵙⴽⴻⵕ.

« ⵢⴻⵙⵙⴻⴼⴽ ⴰⴷ ⵏⴻⵍⵎⴻⴷ ⴰⴷ ⵏⵛⵓⵃⵃ ⵉ ⵡⴰⵎⴰⵏ ⵢⴻⵔⵏⴰ ⴰⴷ ⵏⴻⵙⵙⴻⵇⴷⴻⵛ ⵜⵜⴰⵡⵉⵍⴰⵜ ⵉⵡⴰⵜⴰⵏ ⴰⴽⴽⴻⵏ ⴰⴷ ⵏⴻⵃⵔⴻⵣ ⵜⴰⵖⴱⴰⵍⵓⵜ-ⴰ ⵢⴻⵙⵄⴰⵏ ⴰⵣⴰⵍ, ⴰⵎ ⵡⴰⴽⴽⴻⵏ ⴰⴷ ⵏⴻⵙⵙⴻⵍⵀⵓ ⵍⵖⴻⵍⵍⴰ-ⵏⵏⴻⵖ ⵏ ⵜⴼⴻⵍⵍⴰⵃⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⵙⴻⴳ ⵢⵉⴷⵉⵙ ⵏⵉⴹⴻⵏ, ⵢⴻⵙⵃⴰⵙⵙⴻⴼ ⴷⴰⵖ ⵓⵏⴻⵖⵍⴰⴼ ⵉⵎⵉ ⴰⵟⴰⵙ ⵏ ⵜⵊⵓⵎⵎⵉⵡⵉⵏ (ⵎⵉⵙⴰⵃⴰⵜ) ⵏ ⵡⴰⴽⴰⵍ ⵏ ⵜⴼⴻⵍⵍⴰⵃⵜ ⵢⴻⵜⵜⵡⴰⵙⵙⵡⴻⵏ ⴰⵢ ⵢⴻⵇⵇⵉⵎⴻⵏ ⵓⵔ ⵍⴰ ⵜⴻⵏⵜ-ⵜⵜⵖⴻⵍⵍⵉⵜⴻⵏ ⴰⵔⴰ ⵢⵉⴼⴻⵍⵍⴰⵃⴻⵏ, ⵢⵉⵍⵉ ⴰⵡⴰⵏⴰⴽ (ⴷⴰⵡⵍⴰ) « ⵉⵚⴻⵔⵔⴻⴼ ⴼⴻⵍⵍ-ⴰⵙⴻⵏⵜ ⴰⵟⴰⵙ ⵏ ⵢⵉⴷⵔⵉⵎⴻⵏ ».

ⴷⵖⴰ ⵢⴻⴱⴷⴻⵔ-ⴷ ⵜⵉⵊⵓⵎⵎⵉⵡⵉⵏ-ⵏⵏⵉ ⵏ ⵜⴼⴻⵍⵍⴰⵃⵜ ⵢⴻⵍⵍⴰⵏ ⴷⴻⴳ ⵡⴰⵟⴰⵙ ⵏ ⵜⵡⵉⵍⴰⵢⵉⵏ ⵏ ⵜⵎⵓⵔⵜ, ⵍⴰⴷⵖⴰ ⴷⴻⴳ Ɣⵉⵍⵉⵣⴰⵏ, ⴰⵢⴷⴻⴳ 32.000 ⵏ ⵢⵉⵇⴻⵟⵟⴰⵔⴻⵏ ⵢⴻⵜⵜⵡⴰⵙⵙⵡⴻⵏ (ⵙ ⵜⵜⴰⵡⵉⵍ ⵏ ⵓⵙⵙⵡⴰⵢ), ⵎⴰⵛⴰ ⴰⵍⴰ 50% ⵙⴻⴳ-ⵙⴻⵏ ⴰⵢ ⵢⴻⵜⵜⵡⴰⵖⴻⵍⵍⵜⴻⵏ.

ⴰⴽⴽⴰ ⴷⴰⵖ ⴰⵢ ⵜⴻⴳⵏⵉⵜ ⴷⴻⴳ ⵜⵡⵉⵍⴰⵢⵜ ⵏ ⵜⵙⴻⵎⵙⵉⵍⵜ ⴰⵏⴷⴰ ⴰⵢ ⴷ-ⵢⵓⵙⴰ ⵡⵓⴳⴳⵓⴳ ⵏ ⵓⴽⵏⴰⵏⴻⵔ ⴱⵧⵓⴳⵓⴻⵔⵔⴰ ⵢⴻⵙⵄⴰⵏ ⵜⴰⵣⵎⴻⵔⵜ ⵏ 10 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ (ⵎ3) « ⵢⴻⵜⵜⵡⴰⵅⴻⵣⵏⴻⵏ ⴰⵛⵃⴰⵍ ⴷ ⵉⵙⴻⴳⴳⴰⵙⴻⵏ ⴰⵢⴰ », ⵢⴻⵔⵏⴰ ⵍⵍⴰⵏⵜ ⴷⴻⴳ-ⵙ ⵜⵊⵓⵎⵎⵉⵡⵉⵏ ⵏ ⵜⴼⴻⵍⴰⵃⵜ ⴰⵢⵖⴻⴼ ⴰⵢ ⵉⵚⴻⵔⵔⴻⴼ ⵓⵡⴰⵏⴰⴽ (ⴷⴰⵡⵍⴰ) ⴰⵟⴰⵙ ⵏ ⵢⵉⴷⵔⵉⵎⴻⵏ, ⵎⴰⵛⴰ ⵓⵔ ⵜⴻⵏⵜ-ⵙⵙⵉⵡⴻⵏ ⴰⵔⴰ ⵢⵉⴼⴻⵍⵍⴰⵃⴻⵏ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵓⴳⴳⵓⴳ ⵏ ⵡⴰⴷ ⵜⴰⵀⵜ (ⴷⴻⴳ ⵎⵄⴻⵙⴽⴻⵕ), ⵢⴻⵏⵏⴰ-ⴷ ⵓⵏⴻⵖⵍⴰⴼ ⴰⴷ ⵢⵓⵖⴰⵍ ⴰⴷ ⵢⴻⵙⵙⴰⵡⴰⴹ ⴰⵎⴰⵏ ⵏ ⵜⵉⵙⵙⵉⵜ ⵖⴻⵔ ⵜⵖⵉⵡⴰⵏⵉⵏ ⵏ ⵄⵉⵏ ⴼⵕⴻⵃ, ⵡⴰⴷ ⴻⵍ-ⴰⴱⵟⴰⵍ ⴷ ⵙⵉⴷⵉ ⵄⴻⴱⴷⴻⵍⴵⴻⴱⴱⴰⵕ, ⴰⵎ ⵡⴰⴽⴽⴻⵏ ⴰⴷ ⵢⴻⴼⵔⴻⵇ ⴰⵎⴰⵏ ⵉ ⵓⵙⵙⵡⴰⵢ ⵏ ⵡⴰⵣⴰⵍ ⵏ 500.000 ⵏ ⵢⵉⵇⴻⵟⵟⴰⵔⴻⵏ ⵏ ⵡⴰⴽⴰⵍ.