ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

2015: ⵔⵔⴻⴱⵔⴰⴱ ⵢⴻⴼⴽⴰ ⵜⵉⵢⵉⵜⴰ ⵉⴵⴻⵀⴷⴻⵏ ⵉ ⵜⵎⴻⵔⵔⵉⵜ ⴷⴻⴳ ⵜⵓⵏⴻⵙ

ⵜⵓⵏⴻⵙ ⵜⴰⵎⴰⵏⴻⵖⵜ – ⵜⵇⵓⴱⴻⵍ ⵜⵓⵏⴻⵙ ⵢⵉⵡⴻⵜ ⵏ ⵜⴻⴳⵏⵉⵜ ⵉⵡⴻⵄⵕⴻⵏ ⴷⴻⴳ 2015 ⴷⴻⴼⴼⵉⵔ ⵜⵓⵎⵎⵖⵉⵡⵉⵏ-ⵏⵏⵉ ⵜⵉⵔⴻⴱⵔⴰⴱⵉⵏ ⴰⵢ ⴷ-ⵢⴻⵍⵍⴰⵏ ⴷⴻⴳ-ⵙ ⵢⴻⵔⵏⴰ ⴰⵢⴰ ⵢⴻⵙⵙⵡⴰⵖ ⵎⵍⵉⵃ ⵜⴰⵎⴻⵔⵔⵉⵜ (ⵙⵉⵢⴰⵃⴰ) ⴷⴻⴳ ⵜⵎⵓⵔⵜ-ⴰ, ⵢⵉⵍⵉ ⵜⴰⵎⴻⵔⵔⵉⵜ ⴷ ⵢⵉⵡⴻⵜ ⵙⴻⴳ ⵜⴳⴻⵊⴷⴰ ⵏ ⵜⴷⴰⵎⵙⴰ ⵜⴰⵜⵓⵏⵙⵉⵜ.

ⴷⴻⴳ 2012, ⵎⵉ ⵜⴻⴱⴷⴰ ⵜⴻⵜⵜⴷⵓⵇⵇⵓⵙ-ⴷ ⵜⵎⴻⵔⵔⵉⵜ ⵙ 7 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵎⴻⵔⵔⴰⵢⴻⵏ (ⵙⵓⵢⵢⴰⵃ) ⵉⴱⴻⵕⵕⴰⵏⵉⵢⴻⵏ, ⵢⵓⵖⴰⵍ-ⴷ ⵓⵙⵙⵉⵔⴻⵎ ⵖⴻⵔ ⵜⵎⵓⵔⵜ-ⴰ, ⵎⴰⵛⴰ ⵙⴻⴳ ⵡⴰⵙⵎⵉ ⴰⵢ ⴷ-ⵜⴻⵍⵍⴰ ⵜⵓⵎⵎⵖⴰ ⵜⴰⵔⴻⴱⵔⴰⴱⵜ ⵖⴻⴼ ⵓⵙⴰⵍⴰⵢ (ⵎⵓⵜⵃⴰⴼ) ⵏ ⴱⴰⵔⴷⵧ ⴷⴻⴳ ⵜⵓⵏⴻⵙ ⵜⴰⵎⴰⵏⴻⵖⵜ ⴷⴻⴳ ⵎⴻⵖⵔⴻⵙ ⵏ 2015 ⴰⵢⴷⴻⴳ ⵎⵎⵓⵜⴻⵏ 23 ⵏ ⵢⵉⵎⴷⴰⵏⴻⵏ, ⴷ ⵜⵓⵎⵎⵖⴰ ⵏ ⵓⵙⵓⴷⴷⵉⵙ ⵏ ⵜⵎⴻⵔⵔⵉⵜ ⵏ ⵜⴻⵎⴷⵉⵏⵜ ⵏ ⵙⵓⵙⴰ ⴰⵙⵙ ⵏ 26 ⵢⵓⵏⵢⵓ ⴰⵢⴷⴻⴳ ⵎⵎⵓⵜⴻⵏ 38 ⵏ ⵢⵉⵎⴷⴰⵏⴻⵏ (ⴰⵎⵓⵔ ⴰⵎⴻⵇⵔⴰⵏ ⴷⴻⴳ-ⵙⴻⵏ ⴷ ⵉⴱⴻⵕⵕⴰⵏⵉⵢⴻⵏ), ⵢⴻⵜⵜⵡⴰⵖ ⵎⵍⵉⵃ ⵓⵃⵔⵉⵛ ⵏ ⵜⵎⴻⵔⵔⵉⵜ ⴷⴻⴳ ⵜⵎⵓⵔⵜ-ⴰ.

ⵙⴻⴳ ⵡⴰⵙⵎⵉ ⴰⵢ ⴷ-ⵍⵍⴰⵏⵜ ⵜⵅⴰⵣⵣⴰⴱⵉⵢⵉⵏ-ⴰ, ⵜⴻⴱⴷⴰ-ⴷ ⵜⵓⴳⴷⵉ ⵖⴻⴼ ⵜⴷⴰⵎⵙⴰ ⵜⴰⵜⵓⵏⵙⵉⵜ ⴰⵢ ⵢⴻⵜⵜⴻⴽⵍⴻⵏ ⴰⵟⴰⵙ ⵖⴻⴼ ⵜⵎⴻⵔⵔⵉⵜ, ⴷⵖⴰ ⴷ ⴰⵢⴰ ⴰⵢ ⵢⴻⴵⴵⴰⵏ ⴰⵏⴻⵖⵍⴰⴼ ⴰⵜⵓⵏⵙⵉ ⵏ ⵜⵖⴰⵡⵙⵉⵡⵉⵏ ⵏ ⴷⴰⵅⴻⵍ, ⵏⴰⵊⴻⵎ ⴳⵀⴰⵔⵙⴰⵍⵍⵉ, ⴰⴷ ⴷ-ⵉⵡⴻⴽⴽⴻⴷ ⴷ ⴰⴽⴽⴻⵏ ⵉⵎⴻⵏⵖⵉ ⵎⴳⴰⵍ ⵔⵔⴻⴱⵔⴰⴱ ⴷ ⵜⵓⵣⵡⵉⵔⵜ ⵜⴰⵎⴻⵣⵡⴰⵔⵓⵜ ⵏ ⵓⵖⵍⵉⴼ-ⵏⵏⴻⵙ.

ⴷⴻⴳ ⵡⴰⴽⵓⴷ ⴰⵢⴷⴻⴳ ⵜⴰⴳⵏⵉⵜ ⵏ ⵜⵖⴻⵍⵍⵉⵙⵜ (ⴰⵎⵏ) ⴷⴻⴳ ⵜⵓⵏⴻⵙ ⵜⴻⴱⴷⴰ ⵍⴰ ⵜⵍⴻⵀⵀⵓ ⵛⵡⵉⵟ, ⵛⵡⵉⵟ, ⵜⴻⵍⵍⴰ-ⴷ ⵜⵅⴰⵣⵣⴰⴱⵉⵜ ⵜⴰⵔⴻⴱⵔⴰⴱⵜ ⵏⵉⴹⴻⵏ ⴷⴻⴳ ⵜⵎⵓⵔⵜ-ⴰ ⴰⵙⵙ ⵏ 24 ⵏⵡⴻⵎⴱⴻⵕ, ⴷ ⵜⵉⵏ ⴰⵢⴷⴻⴳ ⵢⴻⵜⵜⵡⴻⵜ ⵢⵉⵡⴻⵏ ⵏ ⵓⵙⴰⴽⴰⵍ (ⵃⴰⴼⵉⵍⴰ) ⵏ ⵜⵄⴻⵙⵙⴰⵙⵜ ⵏ ⵓⵙⴻⵍⵡⴰⵢ ⴷⴻⴳ ⵜⵍⴻⵎⵎⴰⵙⵜ ⵏ ⵜⴻⵎⴷⵉⵏⵜ ⵏ ⵜⵓⵏⴻⵙ. ⴷⵖⴰ ⴷ ⴰⵢⴰ ⴰⵢ ⵢⴻⴵⴵⴰⵏ ⴰⵙⴻⵍⵡⴰⵢ ⴰⵜⵓⵏⵙⵉ, ⴱⴻⵊⵉ ⴻⵙⵙⴻⴱⵙⵉ, ⴰⴷ ⴷ-ⵢⴻⵙⵙⴻⵖⵔⴻⵜ ⵜⴰⴳⵏⵉⵜ ⵏ ⵜⵓⵄⵊⵉⵍⵉⵏ ⴷⴻⴳ ⵡⴰⴽⴽ ⴰⴽⴰⵍ ⴰⵜⵓⵏⵙⵉ ⵉ ⵜⴰⵍⵍⵉⵜ ⵏ 30 ⵏ ⵡⵓⵙⵙⴰⵏ ⴷ ⵓⴳⴷⴰⵍ ⵏ ⵜⵓⴼⴼⵖⴰ ⴷⴻⴳ ⵜⴻⵎⵏⴰⴹⵜ ⵜⴰⵎⴻⵇⵔⴰⵏⵜ ⵏ ⵜⵓⵏⴻⵙ ⵜⴰⵎⴰⵏⴻⵖⵜ .

ⵉⵃⴻⵣⵣⵉⴱⴻⵏ ⴰⵢ ⵢⴻⴷⴷⴻⵎ ⵓⵏⴰⴱⴰⴹ (ⵃⵓⴽⵓⵎⴰ) ⴰⵜⵓⵏⵙⵉ ⴷ ⵓⵙⵙⴻⴵⵀⴻⴷ ⵏ ⵓⵙⵙⴻⵎⵢⵓⴷⴷⴻⵙ (ⵜⴰⵏⵙⵉⵇ) ⴷ ⵍⴻⵣⵣⴰⵢⴻⵔ ⴷⴻⴳ ⵜⴻⵎⵙⴰⵍ ⵏ ⵜⵖⴻⵍⵍⵉⵙⵜ ⴷ ⴰⵢⴻⵏ ⴰⵢ ⵢⴻⴵⴵⴰⵏ ⵜⵓⵏⴻⵙ ⴰⴷ ⵜⴻⵏⵖ ⵏⴻⵖ ⴰⴷ ⵜⴻⴹⴹⴻⴼ ⴰⵟⴰⵙ ⵏ ⵢⵉⵔⴻⴱⵔⴰⴱⴻⵏ. ⵏⵏⵉⴳ ⵡⴰⵢⴰ, ⵍⴻⵣⵣⴰⵢⴻⵔ ⵜⵡⴻⴽⴽⴻⴷ-ⴷ ⴷ ⴰⴽⴽⴻⵏ ⵜⴻⵡⵊⴻⴷ ⴰⴷ ⵜⴻⵏⴼⴻⵄ ⵜⵓⵏⴻⵙ ⵙ ⵜⵜⴻⵊⵕⵉⴱⴰ-ⵏⵏⴻⵙ ⵎⴳⴰⵍ ⵔⵔⴻⴱⵔⴰⴱ.