Asebter amenzawi

Falesṭin: Timerniwt n ccwal deg wakud aydeg Isṛayiliyen rennun ttaṭṭafen akal

LEZZAYER TAMANEɣT – Takriḍt (ɛunf) tisṛayilit mgal Yifalesṭiniyen teqqim kan trennu deg useggas n 2015 aydeg mmuten ugar n 170 n yimdanen, yerna ur la d-yettban ara d akken takriḍt-a ad tenqes, imi itɛeddiyen ɣef Yifalesṭiniyen la ttkemmilen yal ass yerna Isṛayil tugi ad teddem iḥezziben akken ad d-tuɣal ɣer lemcawṛat.

ɣef leḥsab n tecrawt (ḥaṣila) ay d-tefka Tnarit n Ussemyuddes n Tɣawsiwin Talsanin n Yiɣlanen Yeddukklen ay d-yeffɣen ass n lexmis, 141 n Yifalesṭiniyen ay yemmuten seg wasmi ay d-tebda lmuja n ccwal taneggarut ass n 1u n Tubeṛ 2015.

Alɣu-a (bayan) n Yiɣlanen Yeddukklen yenna-d daɣ d akken 15.377 n Yifalesṭiniyen ay yettwajerḥen deg 2015, gar-asen 90% d imdanen ay yettwajerḥen deg tmesbaniyin neɣ immecčiwen ay d-yellan gar Yifalesṭiniyen d yiɣallen isṛayiliyen deg Ugemmaḍ Utrim d Lquds yettwaḍḍfen.

ɣef leḥsab n Tnarit n Ussemyuddes (maktab tansiq) n Tɣawsiwin Talsanin n Yiɣlanen Yeddukklen, iduba isṛayiliyen sdermen deg 2015, 539 n yixxamen n Yifalesṭiniyen deg waṭas n yimukan deg Ugemmaḍ Utrim d Lquds, yerna d aya ay yeǧǧan 742 n Yifalesṭiniyen ad ffɣen seg wakal-nsen.

Nnig wayan, yerna umḍan n tuḍḍfa n Yifalesṭiniyen s waṭas, yerna 4000 n Yifalesṭiniyen ay yettwaḥebsen deg tebniqin (zanazin) timeɛfan seg wasmi ay d-yebda utɛeddi-a isṛayili.