Asebter amenzawi
2.524 n yikaramen n AADL ay yettwagin
LEZZAYER TAMANEɣT – 1.167 n yikaramen (milaffat) n uɛawed n ussezdeɣ deg Lezzayer Tamaneɣt d 2.524 n yikaramen n AADL ay yettwagin deg 2015 deffir ma ttwasfeqden wumuɣen (qawa’im) n wid ay yettwammeṛkan deg ufaylu aɣelnaw n tnezduɣt, yerna ufan-d d akken imawlan n yikaramen-nni sfaydin-d yago seh lemɛawna neɣ seg tnezduɣt deg wahilen yezrin, ɣef wakken ay aɣ-d-ixebber uɣlif n tnezduɣt.
Ass n 31 Dujembeṛ 2015, ttwasfeqden 35.000 n yikaramen n twaculin deg ufaylu aɣelnaw. Tiwaculin-a ssersent ikaramen n uɛawed n ussezdeɣ deg twilayt n Lezzayer yerna assefqed-a yessaweḍ ɣer ukcaf n 1.167 n yikaramen n twaculin ay d-yesfaydin yagi seg lemɛawna, ɣef wakken ay d-yenna uɣlif.
Gar yikaramen-a, llant 216 n liḥalat n tseɣrut (taṣriḥ) takellaxt yerna imawlan-nsent tcuṛeɛ-itent twilayt n Lezzayer, 212 n liḥalat ayɣef la d-tettili tsestant (taḥqiq), 132 n liḥalat ay yefran deg ccṛeɛ yerna ttwaɛaqben yimawlan-nsent s lexḍeyya n tedrimt neɣ s lḥebs.
607 n liḥalat ay d-yeqqimen mazal la d-ssukkuyen fell-asent tiṭ seg leɛḍil ad ttunefkent i yimeẓla (maṣaliḥ) n ccṛeɛ ay terza temsalt, ɣef wakken ay d-yenna uɣlif.
Deg wayen yerzan ahil n ussenzi s lekra ayyes d-telha Tnegga Taɣelnawt n Usselhu d Usnefli n Tnezduɣt (AADL), yekcef-d ufaylu aɣelnaw d akken llant 2524 n liḥalat aydeg imawlan-nsent sfaydin-d seg lemɛawna neɣ seg tnezduɣt seg gar ujammal n 104.790 n yikaramen ay yettwasfeqden deg 2015.
Gar liḥalat-a, 1309 n liḥalat rzant imdanen ay d-yesfaydin seg tnezduɣin n Udiwan n Usmal d Ussefrek Aṣukan (OPGI), 644 n liḥalat rzant wid ay d-yesfaydin seg Usenduq Aɣelnaw n Tnezduɣt, 42 n liḥalat rzant ahil n tnezduɣt n Usenduq Aɣelnaw n Ussegdu n Yimeẓla Inmettiyen (FNPOS), 408 n liḥalat rzant wid yemmeṛkan deg wahilen n Teṛmist (carika) Taɣelnawt n Usmal Aṣukan (ENPI) d 121 n yikaramen rzan wid ay d-yesfaydin seg ttesriḥ n lebni.
Assefqed n yikaramen ad ikemmel arma ttwassizedgen akk wumuɣen (qawa’im) n wahilen yemgerraden n tnezduɣt, deg wakud aydeg imeẓla (maṣaliḥ) n uḥraz n wakal mazal la ttkemmilen assefqed n wid ay yessutren tanezduɣt yili nitni sfaydin-d seg tnezduɣt neɣ seg wakal.
