Asebter amenzawi
Lezzayer tezmer ad turar dduṛ d ameqran deg umɛawen gar Ccinwa d Tefriqt
LEZZAYER TAMANEɣT – Lezzayer d tamurt « tameddakelt » n Ccinwa yerna d tamaslaḍt (ɛuḍw) « s wazal-nnes » deg Tdukli Tafriqit, ɣef wakken ay d-iwekked, ass n lḥedd deg Lezzayer, ugensas (mumattil) udmawan n uneɣlaf acinwat n tɣawsiwin n uzɣar, Wu Sike, yerna yenna-d d akken amɛawen gar snat-a n tmura yezmer ad yili d aferdis « s wazal-nnes » deg umɛawen gar Cciwa d Tefriqt.
Deg tɣimit ay iga d uneɣlaf n tɣawsiwin n Lmeɣreb d Tdukli Tafriqit, Abdelkader Messahel, deg uɣlif n tɣawsiwin n uzɣar, yenna-d umasay-a (mas’ul) acinwat d akken yella-d wawal ɣef « ttawilay ad yesǧehden amɛawen gar Lezzayer d Ccinwa, d ussefɛel n leṛyuy ay yettwadden deg unmager (muntada) n umɛawen acinwat-afriqi ay d-yellan deg Dujembeṛ yezrin deg Johannesburg (Tafriqt n Unẓul). »
Iwekked-d Mass Wu Sike d akken tamurt-nnes tebɣa ad tesnefli (tuṭawwir) yerna ad tessalqey amɛawen d Lezzayer yerna yenna-d d akken yesqerdec d Mass Messahel « timsal timnaḍanin d tegraɣlanin yesɛan nnfeɛ ucrik ».
Seg yidis-nnes, yenna-d Mass Messahel d akken tirzi n umasay-a aciwat ɣef Lezzayer tella-d d aḥric seg « umciweṛ yettkemmilen » gar snat-a n tmura ɣef temsal n nnfeɛ ucrik.
Deg wayen yerzan azal ay ttakfent snat-a n tmura i usnefli (tanmiya) n Tefriqt, yenna-d Mass Messahel d akken Lezzayer d Ccinwa ad mɛawanent deg wahil n 3 n yiseggasen ay d-yettwaheyyan deg tqacuct n unmager acinwat-afriqi.
Yella-d daɣ ussukku n tiṭ ɣef wassaɣen izaden ay icerken Lezzayer d Ccinwa deg yinurar yemgerraden, ama deg tsertit, ama deg tdamsa neɣ deg tɣellist (amn), am wakken ay d-yella wawal ɣef tsemmeskelt (iṣlaḥ) n Yiɣlanen Yeddukklen d Useqqamu n Tɣellist, ɣef wakken ay d-yenna uneɣlaf, yerna yenna-d d akken Ccinwa tɛawed twekked-d abdad-nnes ɣer yidis n Tefriqt deg wayen yerzan tamsalt-a.
