Asebter amenzawi
Lislam « ur t-mazal ara » d ddin n ubeṛṛani deg Fṛansa
PARIS – Yenna-d uselway n Useqqamu Afṛensis n Ddin Ineslem, Anouar Kbibech, ass n lḥedd, deg Tmesgida Tameqrant n Paris, d akken Lislam « ur t-mazal ara d ddin n ubeṛṛani » deg Fṛansa, yerna yessefk, seg-a d asawen, ad as-yettunefk wazal.
« Lislam, deg Fṛansa, ur t-mazal ara d ddin n ubeṛṛani, d netta ay d ddin wis sin deg Fṛansa » yerna yessefk ad d-lhun yes-s yiduba am wakken ay yessefk ad t-snummden (idmaǧ), ɣef wakken ay d-yenna i tɣemsa ay iḥedṛen s waṭas deg wass n « Tewwura ireẓmen ɣef tmesgidiwin » ay d-yellan deg tgara n dduṛt yezrin deg umur ameqran seg tmesgidiwin d tzeɣwin n tẓallit deg Fṛansa.
Aselway n Useqqamu Afṛensis n Ddin Ineslem ay d-ibedden d imḍebber n tedyant-a ɣer yidis n uselway n Tmesgida Tameqrant n Paris, Dalil Boubakeur, iḥettet-d d akken wid yettḍafaren ddyanat yemgerraden deg Fṛansa yessefk ad bedden « idis s idis », maci ad mqabalen i yimenɣi, yerna yessefk ad d-yili umqader akken yal yiwen ad yedder s wayen yettamen deg lehna.
Nnig waya, yenna-d d akken Inselmen, s umata, « ḥuzant-ten mliḥ » tedyanin « tuqriḥin » yeqqnen ɣer txazzabiyin tirebrabin ay d-yellan deg Fṛansa yerna Ifṛensisen inselmen « iḥuza-ten waya snat n tikkal ».
« Inselmen iḥuza-ten mliḥ wayen ay la iḍerrun yerna Ifṛensisen inselmen ḥuzant-ten txazzabiyin d yigiten-a yesseḥzanen, acku igiten-a llan-d s yisem n ddin-nsen yerna azalen n Lislam beɛden aṭas ɣef wayen ay la iḍerrun », ɣef wakken ay d-yenna Anouar Kbibech, yerna yesmekti-d d akken tiwwura-a ireẓmen gan-tent akken « ad d-sseknen d akken Lislam ur yesɛi ara akk assaɣ d lecɣal irebraben d tekriḍt (ɛunf) tadeɣralt ».
