Asebter amenzawi
Tiɣṛi uneɣlaf n ddewla, aneɣlaf n tɣawsiwin n wezɣaṛ d wemɛiwen ageraɣlan, Ramtane Lamamra, ɣer taggara n yiwet n temlilit umciweṛ ger iɛeggalen n snat n trebbuyaɛ tazzayrit d tfalaṣṭinit
LEZZAYER TAMANAƔT – Aneɣlaf n ddewla, aneɣlaf n tɣawsiwin n wezɣaṛ d wemɛiwen ageraɣlan, Ramtane Lamamra, yexdem ass n letniyen amciweṛ muqqṛen akk d terbaɛt tafalaṣṭinit, yellan ddaw laɛnaya n umaray amatu n lbiru akk d wemḍebbeṛ n wemciweṛ n Tuddsa n weslelli afalaṣṭini (OLP), Saeb Erekat, ɣef ttaɛdiyat tisrailiyin deg wakal yettwaṭṭfen akk d tmuɣliwin tisertiyin d tdiblumasiyin di lfayda n taluft tafalaṣṭinit.
Deg yiwet n teɣṛi i yimawlan isallen ɣer taggara n temlilit n umcaweṛ ger iɛeggalen n trebbuyaɛ tazzayrit d tfalaṣṭinit, Mas Lamamra yessefhem-d belli tirza n umciweṛ amuqqṛan tesɛa "tamuɣli tasetṛatijit" yellan deg uqaleb n umciweṛ aserti ger yemḍebbṛen izzayriyen d yifalaṣṭiniyen, yettwersen almend n tirza taneggarut n uselway afalaṣṭini, Mahmoud Abbas, ɣer Lezzayer di duǧambeṛ 2014.
Amḍebbeṛ n tdiblumasit tazzayrit yesmekta-d laṛyuy yettwaddmen di tirza uselway Abbas almend n lemɛiwna d wemciweṛ ger sin idisan akken "tadiblumasit tazzayrit ad tbedd ugar ɣer yidis n taluft tafalaṣṭinit".
Ɣef wayagi i yettwaddem ṛṛay n usbeddi n terbaɛt n wemciweṛ asertan, anda tadwilt tamezwarut tella-d di duǧambeṛ lawan n tirza uneɣlaf n tɣawsiwin n wezɣaṛ afalaṣṭini, Ryad El-Maliki, id-yenna Mas Lamamra.
Mas Erekat yenna seg yidis-is belli timlilit tella d tagnitt i webdar d usqerdec n liḥala yettidir wakal yettwaṭṭfen afalaṣṭini anda d-yettili, am wakken yenna, amgaru awaḥci mgal aɣṛef afalaṣṭini ur nesɛi amḥaddi.
