Asebter amenzawi

Afsax n 3 n tiddukliwin tislamanin deg Fṛansa

PARIS – Yefra-tt-id unabaḍ (ḥukuma) afṛensis, ass n ttlata deg Useqqamu n Yineɣlafen, ad yefsex 3 n tiddukliwin n ddin islaman ay yellan xeddment deg yiwet n tmesgida ay d-nnan d tameḍḍarfut deg Lagny-sur-Marne (Sein-et-Marne) yerna tettwaɣleq yagi deg tezwara n Dujembeṛ.

Afsax n tiddukliwin yeqqnen ɣer tmesgidiwin d ṛṛay ay yezmer ad t-yeddem ala Useqqamu n Yineɣlafen, yerna d tikkelt tamezwarut aydeg ay d-yella waya seg wasmi ay d-llant txazzabiyin n 13 Nwembeṛ d ussebded n tegnit n tuɛjiln ad ifaken ass n 26 Fuṛaṛ.

« Yettwaɣtes ufsax n 3 n tiddukliwin n ddin ɣef lǧal n wawal ay d-nnan yimḍebbren-nsent deg iseggasen-a yezrin, d awal aydeg d-gren tiɣri i kaṛuh », ɣef wakken ay d-yenna uneɣlaf n tɣawsiwin n daxel, Bernard Cazeneuve, mi ifuk Useqqamu n Yineɣlafen, yerna yenna-d dakken « ulac amkan deg tegduda i temṣukiwin-a (hayakil) ay yesmentisen, ggarent-d tiɣri i rrebrab d kaṛuh ».

Ma d amutlay (naṭiq) n unabaḍ, Stéphane Le Foll, yenna-d dakken tiddukla tamezwarut ay yettwafesxen isem-nnes « Uɣal ɣer Teɣbula », yerna snat n tiddukliwin niḍen ay d-yefrurin seg-sent, nitenti d « Uɣal ɣer Teɣbula Tinselmin » d « Tiddukla n Yinselmen n Lagny-sur-Marne ».

Tiddukliwin-a llant ttgent « lecɣal ibanen qqnen ɣer tigit n yifadden i ujahed », ɣef wakken ay d-iwekked.

Aselway n « Tiddukla n Yinselmen n Lagny-sur-Marne » ay yellan yessefrak tamesgida-nni, Mohammed Ramdane, yenna-d dakken yewhem mi ttwaɣelqent tnariyin (makatib) n tiddukla-nni, yerna yenna-d dakken « ur d-ufin acemma » mi ttwafettcen yimukan-nni.

Ɣef leḥsab n yiduba (suluṭat), afettec n yimukan-nni yessaweḍ ɣer uḥkam ɣef 22 n yimdanen akken ur tteffɣen ara seg Fṛansa, am wakken ay yettwaḥkem ɣef 9 niḍen « ad qqimen deg yixxamen-nsen ».

Kra n yimẓulla inselmen n Lagny, gar-asen sin ay d-mazal ddaw tɛessast n temsulta (curṭa), wten-d deg wayen umi semman d « lbaṭel » yerna nnan-d dakken anabaḍ (ḥukuma) iga aya akken ad yimɣur lḥess deg ttawilat n yisalan.