Asebter amenzawi

Surya: Mazal bɣan Yiɣlanen Yeddukklen ad d-bdun lemcawṛat n talwit ass n 25 Yennayer

GENEVE – Yenna-d umazun (mabɛut) n Yiɣlanen Yeddukklen i Surya, Staffan de Mistura, ass n laṛebɛa, dakken mazal-it yebɣa ad bdunt lemcawṛat n talwit deg Geneve ass n 25 Yennayer. De Mistura iwekked-d aya deffir temlilit n ussewjed aydeg ttekkan yigensasen (mumattilin) n 5 n yimaslaḍen imeɣlalen n Useqqamu n Tɣellist.

« Timlilit-a tella-d ladɣa akken ad naẓ ɣer sdat deg wayen yerzan lemcawṛat n Geneve (…). Mazal llant temsal iɛellqen, yerna ɣef waya ay yella yessefk ad ten-ciwṛeɣ », ɣef wakken ay d-yenna Mass de Mistura i yineɣmasen deffir temlilit-nni ay d-yellan deg Leqṣer n Yiɣlanen Yeddukklen deg Geneve.

Uqbel aya, dima ass n laṛebɛa, Mass de Mistura yessawel d unmazul n uneɣlaf arusi n tɣawsiwin n uzɣar, Guennadi Gatilov, d tmalalt n uneɣlaf amarikani n tɣawsiwin n uzɣar i Ugmuḍ Alemmas, Anne Patterson. « Tella-d d timlilit igerrzen », ɣef wakken ay d-yenna yiwen n ugensas amarikani i tnegga tafṛensist n AFP.

Staffan de Mistura la iɛerreḍ ad yesseqneɛ idisan ay terza temsalt akken ad bedden ɣer yidis n lemcawṛat n talwit ay yessefken ad bdunt ass n 25 Yennayer deg Geneve gar yigensasen n unabaḍ (ḥukuma) d tenmegla (muɛaraḍa).

Dduṛt yezrin, iɛuhed unabaḍ asuri ad yettekki deg lemcawṛat-a, maca tigrawin timeqranin n tenmegla werɛad ur tt-id-frint ara ɣef uttekki-nsent.

Menɣir tamsalt n lemcawṛat n talwit, Mass de Mistura d yigensasen n 5 n yimaslaḍen imeɣlalen (da’imin) n Useqqamu n Tɣellist n Yiɣlanen Yeddukklen, ssawlen-d daɣ ɣef temsalt n ussiweḍ n lemɛawna i yimdanen yenḍerren deg Surya.