Asebter amenzawi

Talɣuɣa n Tefriqt Ireẓmen n Ujudo: Tadzayrit Asselah deg umkan wis 5

TUNES – Tusa-d tnaddalt tadzayrit Sonia Asselah d tis 5 deg taggayt (fi’a) n 78 n yikilugṛamen, ass n lḥedd deg Tunes, deg wass wis sin (yerna d aneggaru) n Telɣuɣa n Tefriqt Ireẓmen n Ujudo n 2016 (16-17 Yennayer).

Asselah (ugar n 78 n yikilugṛamen) terna-tt, deg tuzzya tamezwarut, Tefṛensist Lucie-Louette Kanning. Mi tt-id-rran ɣer umsizwer ɣef umkan, tessaweḍ Asselah ad ternu Tamarikanit Cutro-Kelly. Maca, deg yimenɣi ɣef umkan wis 3, yerna-tt tnaddalt takamrunit Wetie Diodjo Nadine.

Seg yidis-nnes, Mohamed Sofiane Belrekaa yusa-d d wis 7, deffir yiwen n umecwaṛ yettwaqbalen.

Belrekaa yessaweḍ, naqal, ad yernu Alenzi Mubarak (ay yettekkan s yisem n Tfidiṛalit Tagraɣlant n Ujudo) s « ippon » (10 n tenqiḍin) deffir tedqiqt d 9 n tsinin n yimenɣi. Maca, deg tuzzya tis snat, yerna-t Atunsi Faicel Djabalah. Deffir ma rran-t-id ɣer umsizwer ɣef umkan, Belrekaa yerna yexṣer imenɣi-nnes mgal Walmani Harmegnies.

Deg taggayt n ddaw 78 n yikilugṛamen, ɣer tlawin, d Kaouthar Ouallal ay d-yefrurin deg tuzzya n uheyyi mi terna Takṛuwatit Brigita Matic.

Ass n ssebt, Tadzayrit Saidi Sabrina iṣaḥ-itt-id umkan wis 7 deg taggayt n ddaw 48 n yikilugṛamen. Saidi terbeḥ imenɣi-nnes amezwaru mgal Tefṛensist Marine Henry, ma d wis sin, mgal Tkamrunit Philomene Bata, maca texṣer deg tuzzya tis 3 mgal Ttunsit Olfa Saoudi. Deg umsizwer ɣef umkan, terna-tt texṣimt-nnes Yvine Romane.

Llan 6 n Yidzayriyen niḍen ay yettekkan deg Telɣuɣa n Tefriqt Ireẓmen n Ujudo, maca ffɣen akk ass n ssebt d wass n lḥedd deg tuzzya tamezwarut n taggayin-nsen. Wi d Salim Rebahi (ddaw 60 n yikilugṛamen), Abderrahmane Laouar (ddaw 81 n yikilugṛamen), Abderrahim Bouchoukh (ddaw 90 n yikilugṛamen), Ratiba Tariket (ddaw 57 n yikilugṛamen), Imene Agouar d Souad Belakhal (ddaw 63 n yikilugṛamen).

S ujemmal, 274 n yinaddalen (166 n yirgazen d 108 n tsednan) seg 52 n tmura ay yettekkan deg Telɣuɣa n Tefriqt Ireẓmen n Ujudo n 2016.