Asebter amenzawi

Ticcurka tadzayrit-tacinwat i lebni n usagen n Tlemmast n Lḥemdaneyya

LEZZAYER TAMANEɣT – Testenya Tegrawt Taɣelnawt n Yimeẓla Isagnanen (Lezzayer) yiwen n umtawa (ittifaq) d snat n teṛmisin ticinwatin ass n lḥedd deg Lezzayer i lebni n yiwen n usagen (lmerṣa) amsenzi deg tlemmast n tmurt n Lezzayer, deg umkan n Lḥemdaneyya, deg temnaḍt n Cercal (tawilayt n Tipaza).

Aneggaf-a (bruṭukul) n umtawa d win aydeg ssefrayen ad d-sbedden taṛmist (carika) ad yilin ddaw lqanun adzayri yerna ad ttekkint deg-s Tegrawt n Yimeẓla Isagnanen d teṛmisin ticinwatin n CSCEC (China State Construction Corporation) d CHEC (China Harbour Engineering Company).

Taṛmist-a tuxliḍt tamaynut ad d-tesswassebded s ulugen n 51/49% n ṛaselmal, yerna ad d-telhu s tezrawt (dirasa), lebni, aɣellet d ussefrek (tasyir) n usagen-a, ɣef wakken ay d-yenna uneɣlaf n umesni, Boudjema Talai, deg tfugla n ustenyi.

Assebded n tidet n teṛmist-a ad d-yili seg-a ɣer tgara n Meɣres n 2016, mi ad ttwaqeblen yiẓuyar-nnes deg Useqqamu n Yittekkiyen n Uwanak d ustenyi n urkawal-nnes n tfulin, ɣef wakken ay d-yenna Mass Talai.

Asenfar-a ad d-yesqam 3,3 n yimelyaṛen n yidulaṛen, yerna tadrimt-nnes ad d-tekk seg yiwen n ureḍḍal acinwat s lqis aɣezfan, ɣef wakken ay d-ixebber unemhal n yisugan ɣer uɣlif n umesni (naql), Mohamed Benboushaki.

Asagen n Lḥemdaneyya ad yettwabnu deg 7 n yiseggasen, maca ad yebdu ad ireẓẓem seg-a ɣer 4 n yiseggasen, asmi ad d-tas teṛmist tacinwat n Shanghai Ports akken ad tebdu aɣellet-nnes, ɣef wakken ay d-yenna uneɣlaf.

Yenna-d daɣ d akken asagen-a ad yeǧǧ Lezzayer ad teqqen d Asya n Unẓul-Agmuḍan (ǧanub-carqi), timura n Temrikt d tid n Tefriqt, imi ad yernu umḍan (ɛadad) n yiɣerruba igraɣlanen ad d-yettasen ɣer tmurt.

I usmekti, asenfar n lebni n usagen-a yeqbel-it Useqqamu n Yineɣlafen ay d-yellan deg Dujembeṛ yezrin.