ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵓⴳⴳⵓⴳⴻⵏ: ⴰⵏⴻⵛⵜ ⵢⴻⵍⵍⴰⵏ ⴷⴻⴳ-ⵙⴻⵏ ⴷ ⴰⵎⴰⵏ ⴰⴷ ⴷ-ⵉⵇⴰⵎ ⵉ ⵙⵉⵏ ⵏ ⵢⵉⵙⴻⴳⴳⴰⵙⴻⵏ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵏⵏⴰ-ⴷ ⵓⵏⴻⵖⵍⴰⴼ ⵏ ⵜⴻⵖⴱⵓⵍⴰ (ⵎⴰⵡⴰⵔⵉⴷ) ⵏ ⵡⴰⵎⴰⵏ ⴷ ⵜⵡⴻⵏⵏⴰⴹⵜ, ⴰⴱⴷⴻⵍⵡⴰⵀⴰⴱ ⵏⵧⵓⴻⵔⵉ, ⴰⵙⵙ ⵏ ⵍⵃⴻⴷⴷ, ⴷ ⴰⴽⴽⴻⵏ ⴰⵏⴻⵛⵜ ⵢⴻⵍⵍⴰⵏ ⴷ ⴰⵎⴰⵏ ⴷⴻⴳ ⵡⵓⴳⴳⵓⴳⴻⵏ (ⵙⵓⴷⵓⴷ) ⴰⴷ ⴷ-ⵉⵇⴰⵎ ⵉ ⵙⵉⵏ ⵏ ⵢⵉⵙⴻⴳⴳⴰⵙⴻⵏ, ⵎⴰ ⵎⴰⵛⵉ ⵓⴳⴰⵔ, ⴷ ⴰⵛⵓ ⴽⴰⵏ, ⵉⴳⴻⵔ-ⴷ ⵜⵉⵖⵔⵉ ⵉ ⵓⵙⵙⴻⵕⵛⴻⴷ ⵏ ⵓⵙⵙⴻⵇⴷⴻⵛ ⵏ ⵡⴰⵎⴰⵏ.

« ⴰⴼⵎⵉⴹⵉ (ⵏⵉⵙⴱⴰ) ⵏ ⵜⴰⵛⴻⵕⵜ ⵏ ⵡⵓⴳⴳⵓⴳⴻⵏ ⵎⴻⵖⵖⵔⴻⵜ ⵢⴻⵔⵏⴰ ⵜⴻⴽⴽⴰ ⵉ 70% », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵏⵧⵓⵔⵉ ⴷⴻⴳ ⵜⴻⵎⵍⵉⵍⵉⵜ ⵏ ⵓⵇⴻⵢⵢⴻⵎ ⵏ ⵢⵉⴽⴰⵜⴰⵔⴻⵏ (ⵉⵟⴰⵔⴰⵜ) ⴰⵢ ⵉⵅⴻⴷⴷⵎⴻⵏ ⴷⴻⴳ ⵓⵃⵔⵉⵛ ⵏ ⵡⴰⵎⴰⵏ, ⵢⴻⵔⵏⴰ ⵉⵡⴻⴽⴽⴻⴷ-ⴷ ⴷ ⴰⴽⴽⴻⵏ ⵓⵍⴰ ⵎⴰ « ⴰⵟⴰⵙ ⵏ ⵡⴰⵎⴰⵏ ⴰⵢ ⵢⴻⵜⵜⵡⴰⵙⵇⴻⴷⵛⴻⵏ ⴷⴻⴳ ⵓⵏⴻⴱⴷⵓ ⵢⴻⵣⵔⵉⵏ, ⵏⴻⵙⵙⴰⵡⴻⴹ ⴰⴷ ⵏⴻⵊⵎⴻⵄ ⴰⵎⴰⵏ ⵏ ⵜⵉⵙⵙⵉⵜ ⴷⴻⴳ ⵜⴻⵎⵏⴰⴹⵉⵏ ⵢⴻⵎⴳⴻⵔⵔⴰⴷⴻⵏ ⵏ ⵜⵎⵓⵔⵜ ».

ⴰⴳⴻⴼⴼⵓⵔ ⴰⵢ ⵢⴻⵜⵜⵡⴰⵊⴻⵎⵄⴻⵏ ⴷⴻⴳ ⵛⵜⴻⵎⴱⴻⵕ ⴷ ⵜⵓⴱⴻⵕ ⵢⴻⵣⵔⵉⵏ ⵢⴻⵜⵜⴻⴽⴽⴰ ⴷⴻⴳ ⵓⵙⵙⵉⵡⴻⴹ ⵏ ⵓⴼⵎⵉⴹ ⵏ ⵜⴰⵛⴻⵕⵜ ⵏ 75 ⵏ ⵡⵓⴳⴳⵓⴳⴻⵏ ⴰⵢ ⵍⴰ ⵢⴻⵜⵜⵡⴰⵖⴻⵍⵍⴰⵜⴻⵏ, ⵢⴻⵔⵏⴰ ⴰⵊⴻⵎⵎⴰⵍ ⵏ ⵓⵅⵣⴰⵏ-ⵏⵙⴻⵏ ⵢⴻⵡⵡⴻⴹ ⵖⴻⵔ 4,6 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ (ⵎ3).

ⵡⴰ ⴷ ⴰⴼⵎⵉⴹⵉ ⴰⵎⴻⵇⵔⴰⵏ ⵢⴻⵔⵏⴰ ⵢⴻⵣⵎⴻⵔ ⴰⴷ ⵢⴻⴹⵎⴻⵏ ⴰⵢⴻⵏ ⵜⴻⵃⵡⴰⴵ ⵜⵎⵓⵔⵜ ⴷ ⴰⵎⴰⵏ ⵉ ⵙⵉⵏ ⵏ ⵢⵉⵙⴻⴳⴳⴰⵙⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ. ⵏⵏⵉⴳ ⵡⴰⵢⴰ, ⵢⴻⵏⵏⴰ-ⴷ ⴷ ⴰⴽⴽⴻⵏ ⵖⴻⴼ ⵍⴻⵃⵙⴰⴱ ⵏ ⵡⴰⵢⴻⵏ ⴷ-ⵏⵏⴰⵏ ⵢⵉⵎⴰⵣⵣⴰⵢⴻⵏ (ⵅⵓⴱⴰⵔⴰ’), ⵍⴻⵅⵚⴰⵚ-ⴰ ⵏ ⵓⴳⴻⴼⴼⵓⵔ ⵢⴻⵇⵇⴻⵏ ⵖⴻⵔ ⵓⴱⴻⴷⴷⴻⵍ ⵏ ⵓⵏⴻⵣⵡⵉ (ⵎⴰⵏⴰⵅ).

ⵉⵡⴻⴽⴽⴻⴷ-ⴷ ⵓⵏⴻⵖⵍⴰⴼ ⴷ ⴰⴽⴽⴻⵏ ⴽⵔⴰ ⵏ ⵡⵓⴳⴳⵓⴳⴻⵏ ⵏ ⵡⵉⵏ ⵏ ⴱⵏⵉ ⵀⴰⵕⵓⵏ, ⵄⵉⵏ ⵣⴰⴷⴰ ⴷ ⵇⵓⴷⵢⴻⵜ ⴰⵙⴻⵔⴷⵓⵏ ⵞⵞⵓⵕⴻⵏ ⴰⵔⵎⵉ ⴷ ⴹⴹⴻⵔⴼⵏ, « ⵢⴻⵔⵏⴰ ⴰⴷ ⴰⵖ-ⴵⴵⴻⵏ ⴰⴷ ⵏⵇⴰⴱⴻⵍ ⵍⴻⵅⵚⴰⵚ ⵏ ⵓⴳⴻⴼⴼⵓⵔ ».

ⵍⴻⵣⵣⴰⵢⴻⵔ ⵎⴰⵣⴰⵍ ⴰⴷ ⵜⴻⵔⵏⵓ ⴰⴷ ⵜⴻⵙⵄⵓ ⵓⴳⴰⵔ ⵏ ⵡⵓⴳⴳⵓⴳⴻⵏ ⴷⴻⴳ 2016 ⴷ 2017.