Asebter amenzawi

Uggugen: anect yellan deg-sen d aman ad d-iqam i sin n yiseggasen

LEZZAYER TAMANEɣT – Yenna-d uneɣlaf n teɣbula (mawarid) n waman d twennaḍt, Abdelwahab Noueri, ass n lḥedd, d akken anect yellan d aman deg wuggugen (sudud) ad d-iqam i sin n yiseggasen, ma maci ugar, d acu kan, iger-d tiɣri i usseṛced n usseqdec n waman.

« Afmiḍi (nisba) n taceṛt n wuggugen meɣɣret yerna tekka i 70% », ɣef wakken ay d-yenna Mass Nouri deg temlilit n uqeyyem n yikataren (iṭarat) ay ixeddmen deg uḥric n waman, yerna iwekked-d d akken ula ma « aṭas n waman ay yettwasqedcen deg unebdu yezrin, nessaweḍ ad nejmeɛ aman n tissit deg temnaḍin yemgerraden n tmurt ».

Ageffur ay yettwajemɛen deg Ctembeṛ d Tubeṛ yezrin yettekka deg ussiweḍ n ufmiḍ n taceṛt n 75 n wuggugen ay la yettwaɣellaten, yerna ajemmal n uxzan-nsen yewweḍ ɣer 4,6 n yimelyaṛen n yimitren igasasen (m3).

Wa d afmiḍi ameqran yerna yezmer ad yeḍmen ayen teḥwaǧ tmurt d aman i sin n yiseggasen, ɣef wakken ay d-yenna. Nnig waya, yenna-d d akken ɣef leḥsab n wayen d-nnan yimazzayen (xubara’), lexṣaṣ-a n ugeffur yeqqen ɣer ubeddel n unezwi (manax).

Iwekked-d uneɣlaf d akken kra n wuggugen n win n Bni Haṛun, Ɛin Zada d Qudyet Aserdun ččuṛen armi d ḍḍerfn, « yerna ad aɣ-ǧǧen ad nqabel lexṣaṣ n ugeffur ».

Lezzayer mazal ad ternu ad tesɛu ugar n wuggugen deg 2016 d 2017.