Asebter amenzawi
Lezzayer testeṛḥeb s ussefɛel n umtawa imiɣes n Iṛan
LEZZAYER TAMANEɣT – Testeṛḥeb Lezzayer ass n lḥedd assefɛel n umtawa ɣef wahil imiɣes (nawawi) n Iṛan, yerna tenna-d d akken aya d « asurif s wazal-nnes » deg ukala (masar) n uhedden n ccwal d uḥraz n talwit d tɣellist tigraɣlanin, ɣef wakken ay d-yenna ass n lḥedd yiwen n ulɣu n uɣlif n tɣawsiwin n uzɣar.
« Testeṛḥeb Lezzayer s ussefɛel, iḍelli, n Umtawa (ittifaq) ɣef wahil imiɣen n Iṛan yerna tettwali-t d asurif s wazal-nnes deg ukala amezruyan n uhedden n taluft i lmend n uḥraz n talwit d tɣellist tigraɣlanin d usnefli (tanmiya) i lfayda n wakk iɣerfan », ɣef wakken ay d-yenna ulɣu-nni.
Testeṛḥeb daɣ Lezzayer s wussisen (maǧhudat) d ṣṣber n yidisan ay yemcawaṛen yerna stenyan amtawa-nni, imi d aya ay yessawḍen ɣer d-yeglu s wayen yelhan, ɣef wakken ay d-yenna ulɣu-a, am wakken ay d-yerna d akken tukksa, cwiṭ, cwiṭ, n uɛaqeb ɣef Iṛan d lfayda tameqrant ayyes d-yegla umtawa-a ay yessefken ad yettwassefɛel seg wul zeddigen.
Lezzayer tenna-d d akken mazal-itt teḍḍef deg takti n tukksa n leslaḥ imiɣes d uḥbas n uzraɛ-nnes deg umaḍal, yerna tenna-d d akken tumar (tefṛeḥ) imi amtawa-a yesteɛṛef s uzref anayan (siyadi) n tmura akken ad sqedcent tasnatwilt timiɣest i tɣawsiwin yexḍan ṭṭrad.
« Lezzayer tessaram d akken asurif-a amezruyan ad d-yesduqqes axeddim i lmend n tukksa n leslaḥ n truẓi s ujemmal seg Ugmuḍ Alemmas yerna ad yettekki deg ussebded n tegnewt n laman d tinnaregt (ǧiwar) yelhan ad d-igen abrid i tallit n talwit, n urkad d lehna deg temnaḍt-a d temnaḍin niḍen », ɣef wakken ay tt-id-yextem ulɣu n uɣlif n tɣawsiwin n uzɣar.
