Asebter amenzawi

Timsizzelt tamnaḍant n usnasɣel ass n ljemɛa deg Tafrawi (Wehṛan)

WEHṚAN – Ad d-tili ass n ljemɛa yiwet n temsizzelt tamnaḍant (ǧihawiyya) deg tɣiwant n Tafrawi, deg Wehṛan, ɣef wakken ay aɣ-d-tenna temɣunt (rabiṭa) tawehṛanit n usnasɣel, ass n letniyen.

Timsizzelt-a ad tt-teg temɣunt-a ɣer yidis n tmehla (mudiriyya) n yilemẓiyen d waddal n twilayt n Wehṛan, yerna ad ttekkin deg-s 90 n yinaddalen seg teɣlamin n temɣunin n Cclef, Sidi Belɛebbas, Mɛeskeṛ, Ɛin Timucent, Mestɣanem d Wehṛan deg taggayin (fi’at) n waddayen, imeẓyanen, ilemẓiyen d yimeqranen.

Timsizzelt-a tamnaḍant ad d-tili deg umnenniḍ umdil n 30 n yikilumitren.

Beddu ad d-yili seg Tafrawi yerna imesnasɣalen ad d-uɣalen arma d amkan-nni ayseg qelɛen deffir ma ɛeddan ɣef tɣiwant n Tamzura d taddart n El Hamoul.

Addayen yessefk ad azzlen amnenniḍ-a deg yiwet kan n tuzzya, ma d imeẓyanen deg snat n tuzzyiwin. Ilemẓiyen d yimeqranen ad d-zzin ɣef umnenniḍ 3 n tikkal.

Timsizzelt-a tella-d d aḥric seg wahil n temɣunt tamnaḍant n usnasɣel, yerna d nettat ay d tadyant tis 3 ay d-yellan deg temnaḍt-a deffir tin ay d-yellan yagi deg Buṣfer, deg Nwembeṛ yezrin.