Asebter amenzawi

Tennerna tkerrazt s 7,5% deg 2015

LEZZAYER TAMANEɣT – Tennerna tkerrazt (ziraɛa) s 7,5% deg 2015, yili deg 2014, tennerna kan s 1%. Annerni-a n 2015 d win ay d-yessadfen 2.900 n yimelyaṛen n yidinaṛen n lɣella n tkerrazt d 46 n yimelyaṛen n yidinaṛen n lɣella n ṣṣyada d tkessawt n yiselman, ɣef wakken ay d-yenna uneɣlaf n tkerrazt, Sid Ahmed Ferroukhi.

Aneɣlaf, ay d-yessawlen ass n letniyen deg Unmager n El Moudjahid, iqeddem-d tacrawt (ḥaṣila) tuɛḍilt n useggas akerrazan gar Tubeṛ 2014 d Tubeṛ n 2015, yerna iwekked-d dakken deg 2015 d win aydeg yerked ussiweḍ n sselɛa ɣer leswaq, ladɣa akeffay, imendi (ḥubub) d lbaṭaṭa, am wakken ay ttunefken 173.000 n yizwal n yinif.

Deg wayen yerzan tasuddest (istratiǧiyya) n uɣlif-nnes deg yiseggasen ay d-yetteddun, yenna-d Mass Ferroukhi dakken ad ilin yiswan ibanen ugar yerna yessefk ad awḍen ɣer-sen kra n yiḥricen n tkerrazt seg 2016 d asawen.

Yiwen seg yiswan-a netta d assiweḍ n Ldzayer akken ad d-tqam iman-nnes deg yirden iquranen, ladɣa imi 50% seg yirden-a d aǧaw ay ten-id-tettaǧew Ldzayer: « Nesɛa tizemmar ad aɣ-yeǧǧen ad neḥbes aǧaw n yirden yerna ad d-nwehhi akk ussisen-nneɣ (maǧhudat) ɣer uḥric-a », ɣef wakken ay d-iwekked.

Yenna-d daɣ uneɣlaf dakken aɣlif-nnes ad iɛawen tiɣin n zzerriɛat n yimɣan n umɛic n lmal akken ad yessebɣes afares (intaǧ) n umɛic-a, acku aya d aḥric s wazal-nnes deg tmerniwt n ufares n ukeffay.

S waya, aɣlif la yessaram ad tuɣal Ldzayer ur d-tettaǧew ara akk aɣebbar n ukeffay seg-a ɣer 2019.

Aḥric niḍen ay terza temsalt n win n ulummis (murakkaz) n ṭumaṭic, yerna iswi netta d assiweḍ n Ldzayer arma tessaǧaw afaris-a ɣer uzɣar seg-a ɣef 3 n yiseggasen.

Ldzayer tqam-d iman-nnes deg wayen yerzan lbaṭaṭa n ussuder (istihlak), maca la txeddem daɣ akken ad tessiweḍ ad d-tqam iman-nnes deg zzerriɛa n lbaṭaṭa.