Asebter amenzawi
Tebder-d Massa Benghabrit amɛawen gar uɣlif d British Council
LONDON – Tessawel tneɣlaft n ussegmi aɣelnaw, Nouria Benghabrit, ass n letniyen deg London, d yimasayen (mas’ulin) n British Council yerna tessukk-d yid-sen tiṭ ɣef tegnit n umɛawen gar Ldzayer d uɣerbaz-a n usselmed.
Massa Beghabrit, ay yeddan ɣer London akken ad tettekki deg Unmager Amaḍalan ɣef Ussegmi (WEF-2016) terza ɣef British Council yerna tesqerdec ɣef umɛawen ucrik d uselway n useqqamu aslekman (tanfidi) n tsudut-a, Ciaran Devane, tanemhalt n British Council deg temnaḍt n Ugmuḍ Alemmas d Tefriqt n Ugafa, d tnemhalt n ussegmi, Massa Jo Beall.
Tenna-d tneɣlaft dakken tessaram ad yimɣur umɛawen-a yerna ad d-iḥaz tiɣawsiwin niḍen meɣir asselmed n tanglizit, ladɣa imi Ldzayer telha-d d tsemmeskelt (iṣlaḥ) n unagraw-nnes (niḍam) n ussegmi.
Tebder-d, s waya, 4 n yinurar niḍen n umɛawen d British Council, yerna wi d tasnarrayt (manhaǧiyya) deg uheyyi n wahilen, tasnalmudt, assileɣ n yimsilɣen (mukawwinin) d unagraw n uḥkam n yiɣerbazen.
Mi terza Massa Benghabrit ɣef uxxam n British Council, teḍfer yiwen n uqeddem ɣef unagraw asegman abriṭani, tisenfal-nnes deg temnaḍin yemgerraden n Tgelda Yeddukklen, ahil-nnes d unagraw-nnes n uswaḍ (taftic).
Deg wayen yerzan anagraw n uswaḍ d ussileɣ n yimaswaḍen (mufatticin), twekked-d tneɣlaft ɣef wazal ay yesɛa waya deg uḥric n ussegmi deg Ldzayer.
Seg yidis niḍen, tebder-d Massa Benghabrit ayen wuɣur yebɣa ad yaweḍ uɣerbaz adzayri d ccɣel ay yeggunin i waya, am wakken ay d-twekked dakken Ldzayer la tetteg ussisen akken « ad d-tessebded anagraw asegman (tarbawi) aydeg ad ilin wazalen imeɣradanen (ɛalamiyya) » yerna d win ad yeqqnen assegmi ɣer tiɣɣermi d tmurt.
Seg yidis-nnes, yenna-d uselway n useqqamu aslekman n British Council, Mass Devane, dakken yumar s uxeddim ay iga British Council deg Ldzayer, yerna yessarem dakken « amɛawen-a ad yeǧhed ugar ».
Iɛawed daɣ iwekked-d dakken « lebɣi » n tsudut-a (hay’a) netta d « assalqey n wassaɣen n umɛawen deg wakk inurar n ussegmi ».
Ma d Massa Jo Beall, ay d-yerzan yagi ɣef Ldzayer deg Ctembeṛ yezrin, twekked-d dakken « Ldzayer d tamurt yesɛan azal ɣer Tgelda Yeddukklen », yerna twekked-d « azal ay yettakf uneɣlaf amenzu, David Cameron, i umɛawen-a ».
