Asebter amenzawi
Iger-d Lamamra tiɣri i usseɛjel n ussefɛel n Umtawa n Talwit deg Mali
LEZZAYER TAMANEɣT – Iger-d uneɣlaf n tɣawsiwin n uzɣar, Ramtane Lamamra, tiɣri ass n letniyen deg Ldzayer Tamaneɣt, i usseɛjel n ussefɛel n Umtawa (ittifaq) n Talwit d Umsuɣal deg Mali.
« Yessefk s tidet ad ttwasqedcen akk ttawilat i usseɛjel n ussefɛel n Umtawa akken ad zemren yimezdaɣen ay d-yesfaydin seg-s ad ḥulfun i ubeddel deg tmeddurt-nsen, ula ma cwiṭ, cwiṭ », ɣef wakken ay d-yenna Mass Lamamra deg yiwet n tinawt (kalima) deg tezwara n temlilit n umciweṛ n uswir unnig n Useqqamu n Uḍfar n Ussefɛel n Umtawa.
ɣef leḥsab n uneɣlaf adzayri n tɣawsiwin n uzɣar, « d ayen ibanen yella ḍḍmeɛ d ameqran yerna ggten wuguren deg temsalt-a, maca yezmer ad d-yili wussis (maǧhud) ladɣa ɣef lecɣal yezwaren yerzan kra n yiḥricen ibanen yerna dindin kan ad d-tban lfayda-nsen ».
« D ayen ibanen, akala (masar) n talwit deg Mali la yetteddu deg ubrid iṣeḥḥan. D acu kan, yegguni waṭas n ccɣel i usseqneɛ n yimezdaɣen ay d-yesfaydin seg waya, ladɣa imi ay la ttṛajun aṭas n tɣawsiwin yerna ḥaren melmi ad d-sfaydin seg nnfeɛ ay d-tewwi talwit, d ufran-nsen iṣeḥḥan asmi ay qeblen amtawa, nnig waya, aya ad ten-id-yessebɛed ɣef yiɣallen yugin talwit », ɣef wakken ay d-yenna.
Seg yidis niḍen, yenna-d Mass Lamamra dakken yumar mi yeẓra dakken aṭas n yizwuren (mubadarat) n Umtawa n Talwit ay yebdan la ttwassefɛalent, ladɣa tin n tukksa n lewṣayat n tuḍḍfa ay d-yeffɣen ɣef kra n yimḍebbren n yimussa (ḥarakat) isertiyen-iserdasanen n Ugafa n Mali, ambaddel n yimeḥbas ay yettwaḍḍfen deg tallit-nni n yimenɣi, assebded n « Tseqqamut n Teɣdemt, Tidet d Umsuɣal » d ussemɣer-nnes akken ad ttekkin deg-s yidisan yestenyan amtawa d uɛawed n urẓam n yiɣerbazen (s tin n uzamul) deg Kidal.
« ɣef leḥsab n wahil ay d-yessefra Umtawa, isurifen-a ay d-yellan ɣer sdat ur uẓin ara akken ay neḍmeɛ yerna neṛja-t », ɣef wakken ay d-yesḥassef, yerna iɛeyyen-d dakken ur yessefk ara ad d-yili uɛeḍḍel, ma ulac ad t-ɣellten wid yugin talwit d umsuɣal gar Yimaliyen, « ladɣa imi ay la ssaramen ad tkemmel lqella n laman d urkad » akken ad ilint temnaḍin aydeg ulac lqanun.
Seg yidis n ussuddes (tanḍim), yenna-d uneɣlaf dakken tacrawt (ḥaṣila) « tessebɣas, ula ma llan-d kra n yiɛewwiqen deg tazwara, maca aya d ayen ibanen », am wakken ay d-yesmekti dakken Aseqqamu n Uḍfar n Umtawa d 4 n tseqquma yellan ddaw ṛṛay-nnes ttwasbedden-d yagi.
Aseqqamu n Uḍfar iga, ar ass-a, 6 n temliliyin tinumanin (ɛadiyya), yiwet i wayyur, akken ay d-yessefra umtawa. 4-nni n tseqquma yellan ddaw Useqqamu n Uḍfar d nitenti ay d-yessewjaden timliliyin yerna zgant ttemlilit, ula d nitenti, ladɣa imi assefɛel n Umtawa-a yeḥwaǧ axeddim taswiɛt-a, ɣef wakken ay d-yessefhem uneɣlaf.
