Asebter amenzawi

Tɛawed twekked-d Tdukli Tuṛufit abdad-nnes ɣer yidis n Useqqamu aselwayan alibi

BRUXELLES – Tɛawed twekked-d Tdukli Tuṛufit, ass n letniyen, abdad-nnes ɣer Useqqamu Aselwayan ay d-yelhan s ussebded n unabaḍ (ḥukuma) n tdukli taɣelnawt deg Libya, deffir ustenyi n umtawa (ittifaq) ayyur yezrin ddaw leɛnaya n Yiɣlanen Yeddukklen. Nnig waya, tesmekti-d Tdukli Tuṛufit i wakk timura n Tuddsa n Yiɣlanen Yeddukklen dakken yessefk ad ḥebsent axeddim d unabaḍ ay yeḍḍfen Ṭrables (war ma steɛṛfen yes-s leǧnas).

« Tadukli Tuṛufit d tmura ay yettekkan deg-s ad beddent ɣer yidis n unabaḍ n tdukli taɣelnawt s yisem-nnes d anabaḍ uzrif (carɛi) awḥid n Libya yerna tessutur i wakk tisuda (mu’assasat) tilibiyin, ula d tid n tedrimt d tdamsa, ad qeblent, war leɛḍil, adabu n unabaḍ-a », ɣef wakken ay d-tenna Tdukli Tuṛufit deg yiwen n ulɣu.

« Tesmekti-d Tdukli Tuṛufit dakken taneɣtust (qarar) tis 2259 tessutur seg wakk imaslaḍen (aɛḍa’) n Yiɣlanen Yeddukklen ad ḥebsen aɛawen d yinermisen unṣiben d tsuda timsadaɣin » ay yerran iman-nsent d adabu uzrif , ɣef wakken ay d-yenna.

Tɛawed daɣ twekked-d Tdukli Tuṛufit « adhal-nnes (daɛm) ummid » i Umtawa aserti alibi ay yettwastenyan ass n 17 Dujembeṛ ddaw leɛnaya n Yiɣlanen Yeddukklen, yerna tumar (tefṛeḥ) s ussebded n Useqqamu n Tselwit yellan ddaw ṛṛay n Fayez Al-Sarraj.

Tadukli Tuṛufit tger-d tiɣri i wakk Ilibiyen akken ad ddukklen ɣer yidis n unabaḍ amaynu, yerna twekked-d dakken « iḥar lḥal » i ussefɛel n umtawa aserti alibi, ladɣa deg wayen yerzan assebded n unabaḍ n tdukli taɣelnawt, am wakken ay tɛawed twekked-d « aɛewwel-nnes ummid » i ubdad ɣer yidis n Libya d uḍfar n ussefɛel ummid n umtawa-nni, s uxeddim d umɛawen uqrib d unabaḍ amaynu.

Aseqqamu aselwayan yelha-d s usemmi n wid ad yettekkin deg unabaḍ n tdukli taɣelnawt deg Libya, yerna iwexxer s 48 n tsaɛtin asseɣret (iɛlan) n yismawen n wid ad yettekkin deg unabaḍ-a.