Asebter amenzawi

Amciweṛ gar Fṛansa d Lezzayer werǧin yeǧhid akken yella ass-a

MARSEILLE – Amciweṛ gar Fṛansa d Lezzayer werǧin « yeǧhid neɣ yeggit » anect yella ass-a, ɣef wakken ay d-twekked, ass n ttlata deg Marseille, tneɣlaft tafṛensist n yidles d teɣwalt, Fleur Pellerin, i lmend n urẓam n tzikkent n « Made in Algeria ».

« Amciweṛ-nneɣ werǧin yeǧhid neɣ yeggit akken yella ass-a, yerna umareɣ (feṛḥeɣ) s waya », ɣef wakken ay d-tenna tneɣlaft ay d-iwekkden d akken inabaḍen (ḥukumat) n snat-a n tmura « fernent ad ssuggtent amciweṛ s lecɣal n umɛawen adelsan, ladɣa deg yinurar n udlis, ssinima, asliẓri d tgemmi ».

Dɣa tenna-d, deg temsalt-a, d akken la ssefrayen ad d-ilin yimbaddlen « iluganen » gar yixeddamen n yidles n snat-a n tmura deg yiseggasen n 2016 d 2017, am wakken ay d-tesmekti d akken deg Tubeṛ yezrin, d Fṛansa ay d-yellan d tinebgit n yiseɣ deg Tmesrit Tagraɣlant n Udlis n Lezzayer Tamaneɣt.

« Walaɣ lwelha tameqrant ay d-yefka ugdud adzayri i yimeskaren (mu’allifin) ifṛensisen, d tin ay d-fkan teẓrigin tifṛensisin i Lezzayer. Deg Meɣres ay d-yetteddun, Qsenṭina, yellan d tamaneɣt n yidles aɛṛab, ad tili daɣ d tinebgit tuzzigt (xaṣṣa) n Tmesrit n Udlis n Paris », ɣef wakken ay d-tenna.

ɣef leḥsab-nnes, timzikkent-a ad yeqqimen arma d Mayu ad tili d tagnit akken « yal yiwen ad iẓer acḥal ay d ilqayanen wassaɣen ay aɣ-icerken d wacḥal ay ǧehden yerna mcubbaken. Yal yiwen yezmer ad d-yas ad d-yagem ayen ayyes ad yebnu imal-nnes (mustaqbal) d win ad t-icerken d wiyaḍ, d imal aydeg kullec iban, d win n lehna d uhedden ».

Deg wayen yerzan amezruy, tenna-d tneɣlaf tafṛensist d akken yessefk ad d-ilin yixeddimen d tedyanin « ad d-yesbanen s tmuɣli tucrikt tiɣawsiwin yeqqnen ɣer umezruy ucrik », yerna tenna-d d akken axeddim n yinmezruyen d yinaẓuren « yesɛa azal i lebni n yimal arusan ».