Asebter amenzawi

Tuzwirt i ussefti ay d-yettawin rrbeḥ (Bedoui)

WAREGLA – Yenna-d uneɣlaf n tɣawsiwin n daxel, Noureddine Bedoui, ass n laṛebɛa deg Waregla, d akken yessefk « ad tettunefk tuzwirt d tameqrant i ussefti ay d-yettawin rrbeḥ d ussugget n tkerrazt deg temnaḍin n uneẓruf (ṣaḥra’) ».

Amecwaṛ aydeg tella tmurt ass-a d win aydeg yessefk ad tqabel acqirrew n unewweɛ n tdamsa taɣelnawt yerna ad d-teffeɣ « ɣef zik lḥal » seg uttkal ay tettkel ɣef tmerɣa (maḥruqat) ɣef wakken ay d-iwekked uneɣlaf deg yiwen n umyager d wufrinen d yikataren (iṭarat) n twilat d yigensanen n tmetti taɣarimt ay d-yellan deg uxxam n twilayt.

Deg temsalt-a, iger-d Mass Bedoui tiɣri i wid ay terza temsalt akken ad ttekkin deg tiddit-a, ladɣa deg twilayin n unẓul (ǧanub) s umata, d twilayt n Waregla, imi tiwilayin-a sɛant tizemmar d timeqranin deg temguri (ṣinaɛa), takerrazt d tmerrit, yerna tizemmar-a ad asent-ḍemnent tadinamit tadamsant ad d-yawin lfayda.

Deg wayen yerzan dduṛ ay zerment ad t-urarent tmazdayin tidiganin (ǧamaɛat maḥalliyya) deg unewweɛ n tdamsa taɣelnawt, yenna-d Mass Bedoui d akken yettwali-t yesɛa azekka igerrzen deg twilayt-a s uttekki-nsen deg ussefrek n tɣawsiwin n tɣiwanin-nsen.

Dɣa ixebber-d, deg temsalt-a, yenna-d d akken yeddem uɣlif n tɣawsiwin n daxel iḥezziben akken ad yefk i twilayt-a ttawilat ay teḥwaǧ akken ad taweḍ ɣer yiswan-nnes s ussidef n rrbeḥ d usnulfu n yimukan n uxeddim.