Asebter amenzawi

Ttawilat n lgaz: iḥezziben imaynuten i usseǧhed n ussefqed

LEZZAYER TAMANEɣT – Ur ttɛeḍḍilen ara ad d-ffɣen yiḥezziben imaynuten n lqanun i ussefqed n yisuga (aǧhiza) n lgaz ɣef uqader n tɣellist (salama), ɣef wakken ay d-yenna ass n lexmis deg Lezzayer Tamaneɣt yiwen n umasay n uɣlif n tnezzut.

Iḥezziben-a ttqadaren ilugan igraɣlanen yerna ad d-ddun deg yiwen n uɣtas agraɣlif ad stenyin yiɣlifen yemgerraden am win n tnezzut (tiǧara), win n temguri (ṣinaɛa) d win n teẓwert, ɣef wakken ay d-yenna unemhal n tɣara ɣer uɣlif n tnezzut, Sami Koli, deg yiwet n terzi ay iga uneɣlaf ɣef Yinegmi Aɣelnaw n Uɛṛaḍ.

S waya, yenna-d Mass Koli d akken iḥezziben-a ad ččaṛen ilem-nni yellan deg lqanun deg unrar-a, yerna ad uɣalen yisuga n lgaz (tisewwayin, iḥemmayen n yixxamen d yiḥemmayen n waman) ad ttwassefqaden ɣef tɣellist-nsen, yerna aya ad d-iḥaz ama d sselɛa ay d-yettwaǧawen, ama d tin ay yettwaxdamen deg tmurt.

« S lqanun-a, ala sselɛa ay iḍemnen aswir unnig n tɣellist yerna tettqadar ilugan igraɣlanen ad ilin deg ssuq aɣelnaw », ɣef wakken ay d-yenna.

ɣef leḥsab n umasay-a, isuga-a ad ten-tessefqad tgezmi n ussefqed n tɣara n yifarisen imguranen (ṣinaɛiyya) n Qsenṭina yerna d nettat ay d-yefrun ma yella sselɛa tettqadar ilugan n tɣellist neɣ uhu.

Yerna mliḥ umḍan (ɛadad) n medden ay la yettmettaten seg lgaz deg yiseggasen-a ineggura deg Lezzayer. Amunuksid n ukeṛbun d netta ay d ssebba tamezwarut n tmettant s ssem deg yixxamen, ɣef wakken ay d-yenna uɣlif n tnezzut.