Asebter amenzawi
Tinegwa n lbenyan: tenqes tfatuṛt n waǧaw deg 2015
LEZZAYER TAMANEɣT – Tenqes tfatuṛt n waǧaw n tnegwa n lbenyan deg 2015 yerna tesqam-d 2,54 n yimelyaṛen n yidulaṛen, deg wakud aydeg ay d-tesqam 3,35 n yimelyaṛen n yidulaṛen deg 2014. S waya, yella-d unqas n 24,1% deg 2015, ɣef wakken ay aɣ-d-tenna tedwant.
D acu kan, tasmekta (kammiyya) ay d-yettwaǧwen terna yerna tewweḍ ɣer 12,73 n yimelyunen n yiṭunen deg 2015, yili deg 2014, tasmekta tewweḍ ɣer 10,65 n yimelyunen n yiṭunen. S waya, terna tesmekta n tnegwa n lbenyan ay d-yettwaǧwen s 19,45%, ɣef wakken ay d-yenna Wammas Aɣelnaw n Tsenselkimt d Taddadanin n Tedwant.
Tafatuṛt n waǧaw n usiman (win n Portland, asiman ur yettwaneɣdem, asiman yellummnen, asiman imeswi, atg.) tewweḍ ɣer 473,81 n yimelyunen n yidulaṛen (6,6 n yimelyunen n yiṭunen), ma d deg 2014, tuǧew-d Lezzayer 537,8 n yimelyunen n yidulaṛen n usiman (6 n yimelyunen n yiṭunen. S waya, yella-d unqas n 12% deg ssuma d tmerniwt n 9,55% deg tesmekta.
Deg wayen yerzan asɣar, tuǧew-d Lezzayer 639,82 n yimelyunen n yidulaṛen (3,08 n yimelyunen n yiṭunen) deg 2015, yili deg 2014, tuǧew-d 846,65 n yimelyunen n yidulaṛen (1,53 d amelyun n yiṭunen). Yella-d, s waya, unqas n 24,43% deg wazal d tmerniwt n 101% deg tesmekta.
Tafatuṛt n waǧaw n wuzzal d unfed (fulad) tenqes-d ɣer 1,38 d amelyun n yidulaṛen, yili deg 2014, tuǧew-d Lezzayer 1,88 d amelyun n yidulaṛen (d anqas n 26,7%), yerna ula d tasmekta tenqes-d ɣer 2,99 n yimelyunen n yiṭunen yili deg 2014, ttwaǧwen-d 3,04 n yimelyunen n yiṭunen n wuzzal d unfed (d ansaq s 1,6%).
Deg wayen yerzan aǧaw n yifarisen n tsiṛamit (alajuṛ, timedlin, tiblaḍin d tɣawsiwin icuban aya), tenqes-d tfatuṛt ɣer 47,65 n yimelyunen n yidulaṛen deg wakud aydeg deg 2014, tuǧew-d Lezzayer 80,71 n yimelyunen n yidulaṛen (d anqas n 41%), ma d tasmekta ay d-yettwaǧwen tenqes-d ɣer 48.554,51 n yiṭunen, yili deg 2014, tasmekta tewweḍ ɣer 53.025,89 n yiṭunen (d anqas n 8,43%).
S umata, anqas-a deg tfatuṛt n waǧaw n tnegwa n lbenyan yebda-d seg tezwara n 2015, yerna yella-d ladɣa imi ay tenqes ssuma n umur ameqran seg tnegwa-a deg umaḍal, am wakken daɣ ay d-yella ɣef lǧal n ussebɣes n uwanak (dawla) adzayri akken ad ttwasseqdacent tnegwa n lbenyan ay d-yettwaxedmen deg tmurt i usmal (tarqiya) n sselɛa taɣelnawt d uḥbas n waǧaw.
