Asebter amenzawi

Asseṛced n uṣerref yesseǧhed ttawilat iɣelnawen n ufares

MESTɣANEM – Yenna-d uneɣlaf n tnezduɣt, Abdelmadjid Tebboune, ass n lḥedd, deg Mestɣanem, d akken asseṛced n uṣerref deg uḥric n lebni d ayen ay yeǧǧan Lezzayer ad tesseǧhed ttawilat-nnes iɣelnawen n ufares (intaǧ).

Mi yerza ɣef tzikkent n tnegwa (mawadd) n lebni deg lluzin n tsiṛamit n tɣiwant n Swafleyya, yenna-d uneɣlaf d akken tasertit n usseṛced n uṣerref teǧǧa tiṛmisin tidzayriyin ay d-ixeddmen tinegwa-a ad d-dduqqsent, yerna yenna-d d akken afares aɣelnaw yesseṛwa assuter ay teḥwaǧ tmurt am wakken ay d-yesnulfa aṭas n yimukan n uxeddim.

Ula ma teɣli ssuma n upitṛul, aḥric n lebni yennerna s 4%, ɣef wakken ay d-yenna Mass Tebboune, yerna yenna-d d akken deg 2016 ad yili d aseggas n tukci n tnezduɣt deg twilayt n Mestɣanem s ufraq n 8.000 n tnezduɣin, gar-asent 6.000 n tnezduɣin n wahilen yemgerraden d 2.000 n tnezduɣin n ussenzi s lekra n AADL.

Wid ay yemmeṛkan deg wahilen n AADL n 2001 d 2002 deg Mestɣanem ad asen-ferqen lekwaɣeḍ n uḥazi n tnezduɣt deg wayyur n Meɣres (410 n twaculin), am wakken ad ttwaferqen lekwaɣeḍ-a daɣ i 5.400 seg wid yemmeṛkan deg 2013, ɣef wakken ay d-yenna uneɣlaf.