Asebter amenzawi

Ifuk uselway n Useqqamu Aselwayan alibi ifuk tirzi-nnes ɣef Lezzayer

LEZZAYER TAMANEɣT (25 Yennayer 2016) – Ifuk uselway n Useqqamu Aselwayan alibi, Faiz Serradj, ass n letniyen tameddit, tirzi-nnes n uxeddim n yiwen wass ɣef Lezzayer anda ay t-yemmuger uselway n tegduda Abdelaziz Bouteflika d uneɣlaf amenzu Abdelmalek Sellal.

Yerra tajmilt Mass Serradj, mi d-yewweḍ ɣer Lezzayer, i « ubdad ay tebded Lezzayer ɣer yidis n umciweṛ aserti gar Yilibiyen ay yessawḍen ɣer ussebded n unabaḍ n tdukli taɣelnawt ». « Nesnemmir Lezzayer ɣef ubdad-nnes ɣer yidis n umciweṛ alibi deg wakk isurifen-nnes, yerna d wa ay d amciweṛ ay yessawḍen ɣer ussebded n unabaḍ n tdukli taɣelnawt », ɣef wakken ay d-yenna.

Yerna-d Mass Faiz Serradj dakken tirzi-nnes tella-d i lmend n « ussalqey d usnefli (tanmiya) n wassaɣen izaden gar Lezzayer d Libya ay sdukklent tɣawsiwin tucrikin ».

Tirzi-a tella-d daɣ i lmend n « ukemmel n wussisen (maǧhudat) i ussmad n tifrat tasertit s umsefham gar Yilibiyen, yerna d nettat ay d tawḥidt ay izemren ad teḥrez tanaya (siyada) n tmurt-a taweltmat tanaragt, tummda n wakal-nnes d tdukli n uɣref-nnes ».

Tirzi-a tella-d daɣ d talemmiẓt (furṣa) i uqeyyem n tegnit deg Libya d tmura n temnaḍt ussan-a, am wakken ay d-yella daɣ deg-s ussukku n tiṭ ɣef wayen ay izemren ad yesseǧhed assaɣen gar Lezzayer d Libya deg yinurar yemgerraden.