Asebter amenzawi

Amarir Merzougui n MC Lezzayer ḥebsen-t 4 n yiseggasen ɣef wurar

LEZZAYER TAMANEɣT – Amenṭag n MC Lezzayer, Kherreddine Merzougui, ay d-ufan yesseqdec iseǧhaden deg temlilit ay turar teɣlamt-nnes d USM Lezzayer (0-0) deg wass wis 11 n telɣuɣa n Temɣunt 1ut n Mobilis, ḥebsen-t 4 n yiseggasen ɣef wurar, ɣef wakken ay d-tenna ass n letniyen tseqqamut n tugrint (inḍibaṭ) n Temɣunt n Tcirt n Uḍar Tasadurant.

Merzougui yella, naqal, yettwaḥbes seg leɛḍil imi ay d-yettwakcef d akken yesseqdec iseǧhaden, sakkin tefra-tt-id tseqqamut akken ad yettwaḥbes 4 n yiseggasen seg 21 Yennayer 2016 d asawen, s uqader n uslugen (qanun) n uḥaṛeb n usseqdec n yiseǧhaden n Tfidiṛalit Tagraɣlant n Tcirt n Uḍar, ɣef wakken ay d-tenna Temɣunt (rabiṭa) n Tcirt n Uḍar Tasadurant.

Merzougui ufan-t yesseqdec tamitiliksamint yellan d asdaqqas yettwagedlen deg umsizwer. Tanga-a (madda) tettwasseqdac deg kra n yisafaren yettserriḥen anzaren d kra n yinesmaden n tuččit i uḥkam deg lmizan.

Seg yidis niḍen, tɛuqeb tseqqamut n tugrint taɣlamt n MC Lezzayer s 4 n temliliyin tumdilin ɣef lǧal n tedyanin ay d-yeḍan deg temlilit ay turar mgal RC Ɣilizan (1 ɣer 0) ass n ssebt yezrin, deg wass wis 17 n telɣuɣa n Temɣunt 1ut n Mobilis.

ɣef lǧal n tedyanin-a, tettwaxeḍḍa daɣ MC Lezzayer s 200.000 n yidinaṛen.

Teḥkem-d tseqqamut daɣ s yiwet n temlilit tumdilt ɣef ES Sḍif d JSM Skikda ɣef lǧal n « uṛjam » deg usarir deg temliliyin-nsent tineggura ay d-yellan deg wass wis 17 n telɣuɣa n Temɣunin 1ut d tis snat n Mobilis, yerna ula d tiɣlamin-a ttwaxeḍḍant ad xellṣent, yal yiwet, 200.000 n yidinaṛen.