ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⵉⵖⵍⴰⵎⵉⵏ ⵏ ⵜⵛⵉⵔⵜ ⵏ ⵓⴼⵓⵙ, ⵏ ⵓⵇⴻⵛⵡⴰⵍ ⴷ ⵜⵎⴰⴼⴰⴳⵜ ⴳⴳⵣⴻⵏⵜ ⴰⴷ ⵖⴰⵏⵣⵓⵏⵜ ⴰⴷⴷⴰⵍ ⴷⴻⴳ ⵜⴳⴰⵔⴰ ⵏ ⴷⴷⵓⵕⵜ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⴳⴳⵣⴻⵏⵜ (ⵀⴰⴷⴷⴰⴷⴰⵜ) ⵜⴻⵖⵍⴰⵎⵉⵏ ⵏ ⵜⴻⵍⵖⵓⵖⵉⵡⵉⵏ ⵜⵉⵖⴻⵍⵏⴰⵡⵉⵏ ⵏ ⵜⵛⵉⵔⵜ ⵏ ⵓⵇⴻⵛⵡⴰⵍ, ⵜⴰⵛⵉⵔⵜ ⵜⴰⵎⴰⴼⴰⴳⵜ ⴷ ⵜⵛⵉⵔⵜ ⵏ ⵓⴼⵓⵙ, ⴰⴷ ⵖⴰⵏⵣⵓⵏⵜ ⴰⴷⴷⴰⵍ ⴷⴻⴳ ⵜⴳⴰⵔⴰ-ⴰ ⵏ ⴷⴷⵓⵕⵜ ⴰⴽⴽⴻⵏ ⴰⴷ ⴷ-ⵛⵛⴻⵜⴽⵉⵏⵜ ⵖⴻⴼ ⵓⵎⴰⴳⵔⴰⴷ ⵡⵉⵙ 6 ⵏ ⵍⵇⴰⵏⵓⵏ ⴰⵙⵍⴻⴽⵎⴰⵏ 15-74 ⵏ 26 ⴼⵓⵕⴰⵕ 2015, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵙⴻⵍⵡⴰⵢ ⵏ ⵜⴳⴻⵣⵎⵉ ⵏ ⵜⵛⵉⵔⵜ ⵏ ⵓⵇⴻⵛⵡⴰⵍ ⵏ ⵏⴰ ⵃⵓⵙⵉⵏ ⴷⴰⵢ, ⴷⵊⴰⵎⴻⵍ ⴱⴻⵏⴰⵍⵉⵧⵓⴰ, ⵢⴻⵍⵍⴰⵏ ⴷ ⴰⵎⵓⵜⵍⴰⵢ (ⵏⴰⵟⵉⵇ) ⵏ ⵜⴻⵖⵍⴰⵎⵉⵏ-ⴰ ⴰⵢ ⵍⴰ ⴷ-ⵢⴻⵜⵜⵛⴻⵜⴽⵉⵏ.
« ⵜⴻⵍⵍⴰ-ⴷ, ⴰⵙⵙ ⵏ ⵍⴻⵜⵏⵉⵢⴻⵏ, ⵢⵉⵡⴻⵜ ⵏ ⵜⴻⵎⵍⵉⵍⵉⵜ ⵏ ⵓⵅⴻⵎⵎⴻⵎ ⴳⴰⵔ ⵢⵉⵎⴰⵙⴰⵢⴻⵏ (ⵎⴰⵙ’ⵓⵍⵉⵏ) ⵏ ⵜⴻⵖⵍⴰⵎⵉⵏ ⵉ ⵓⵙⵇⴻⵔⴷⴻⵛ ⵏ ⵓⵎⴰⴳⵔⴰⴷ-ⴰ. ⴷⴻⴳ ⵜⴳⴰⵔⴰ ⵏ ⵜⴻⵎⵍⵉⵍⵉⵜ-ⵏⵏⵉ, ⵏⴻⴼⵔⴰ-ⵜⵜ-ⵉⴷ ⴰⴷ ⵏⴻⵎⵍⵉⵍ ⴷ ⵓⵏⴻⵖⵍⴰⴼ ⵏ ⵢⵉⵍⴻⵎⵥⵉⵢⴻⵏ ⴷ ⵡⴰⴷⴷⴰⵍ ⴰⴽⴽⴻⵏ ⴰⴷ ⵏⴻⵙⵙⵓⵜⴻⵔ ⵜⵓⴽⴽⵙⴰ ⵏⴻⵖ ⴰⵙⴱⴰⴽ ⵏ ⵓⵎⴰⴳⵔⴰⴷ-ⴰ. ⴷⴻⴳ ⵜⴻⴳⵏⵉⵜ ⴰⵢⴷⴻⴳ ⴰⵙⵙⵓⵜⴻⵔ-ⵏⵏⴻⵖ ⵓⵔ ⵢⴻⵜⵜⵡⴰⵇⴱⴻⵍ, ⵏⴻⵣⵎⴻⵔ ⴰⴷ ⵏⵖⴰⵏⵣⵓ ⴰⵙⵙ ⵏ ⵡⵓⵔⴰⵔ ⴰⵢ ⴷ-ⵢⴻⵜⵜⴻⴷⴷⵓⵏ ⴷⴻⴳ ⵡⴰⴷⴷⴰⵍⴻⵏ-ⵏⵏⴻⵖ, ⴷ ⴰⵙⵙ ⴰⴷ ⴷ-ⵢⵉⵍⵉⵏ ⴷⴻⴳ ⵜⴳⴰⵔⴰ ⵏ ⴷⴷⵓⵕⵜ-ⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵎⴰⵙⴰⵢ-ⴰ.
ⴰⵎⴰⴳⵔⴰⴷ-ⴰ, ⴰⴷ ⵢⴻⵜⵜⵡⴰⵙⴼⴻⵄⵍⴻⵏ ⵙⴻⴳ ⵡⴰⵢⵢⵓⵔ-ⴰ ⵏ ⴼⵓⵕⴰⵕ ⴰⵢ ⴷ-ⵢⴻⵜⵜⴻⴷⴷⵓⵏ, ⴷ ⵡⵉⵏ ⴰⵢ ⵢⴻⵙⵙⴻⴼⵔⴰⵏ ⴰⵄⴰⵇⴻⴱ ⵏ ⵓⵎⴰⵙⴰⵢ ⵏ ⵜⴻⵖⵍⴰⵎⵜ ⴰⴷ ⵉⵅⴻⵍⵍⵚⴻⵏ ⵜⴰⵛⴻⵀⵕⵉⵜ ⵉ ⵓⵏⴰⴷⴷⴰⵍ.
« ⴰⵎⵓⵔ ⴰⵎⴻⵇⵔⴰⵏ ⵙⴻⴳ ⵢⵉⵏⴰⴷⴷⴰⵍⴻⵏ ⴷ ⵉⵏⴻⵍⵎⴰⴷⴻⵏ ⵢⴻⵔⵏⴰ ⵍⴻⵅⵍⴰⵚ-ⴰ ⵢⴻⵜⵜⴰⴵⴵⴰ-ⵜⴻⵏ ⴰⴷ ⵙⵄⵓⵏ ⴰⵎⴻⵚⵔⵓⴼ ⴰⵢ ⵃⵡⴰⴵⴻⵏ. ⵙ ⵓⵎⴰⴳⵔⴰⴷ-ⴰ, ⴰⵟⴰⵙ ⵙⴻⴳ ⵢⵉⵏⴰⴷⴷⴰⵍⴻⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ, ⴰⴷ ⵉⵃⴻⴱⵙⴻⵏ ⵓⵔⴰⵔ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴱⴻⵏⴰⵍⵉⵧⵓⴰ.
