Asebter amenzawi

Yessawel Lamamra d umtil-nnes ityupi d uselway n umni afriqi

LEZZAYER TAMANEɣT – Yessawel uneɣlaf n tɣawsiwin n uzɣar, Ramtane Lamamra, deg Mekele (Ityupya) d uselway n umni (barlaman) akkafriqi deg ukatar n Useqqamu Aslekman n Tdukli Tafriqit, ɣef wakken ay d-yenna ass n ttlata uɣlif n tɣawsiwin n uzɣar deg yiwen n ulɣu (bayan).

Aselway n Umni Akkafriqi, Roger Nkondo Dang, ifuṛes tagnit-a akken ad yerr tajmilt i Lezzayer ɣef ubdad-nnes « yezgan » ɣer yidis n Tdukli Tafriqit d uɛahed n uselway n tegduda, Abdelaziz Bouteflika, akken ad yexdem i lmend n « usseǧhed n uwanak (dawla) n lqanun d tugdut timgensest deg Tefriqt », ɣef wakken ay d-yenna ulɣu-a.

Seg yidis niḍen, ixebber uselway n Umni Akkafriqi Mass Lamamra ɣef lecɣal ay iga umni-a i lmend n usmal (tarqiya) n nnfeɛ n Tefriqt ama deg umenẓaw (qarra), ama deg umaḍal, ɣef wakken ay d-yenna ulɣu-nni.

Aneɣlaf adzayri n tɣawsiwin n uzɣar yemlal daɣ amtil-nnes ityupi, Tedros Adhanom Guebreyesus, yerna mbaddalen timuɣliwin « ɣef uḍfar d ussefɛel n wayen ay d-yefrurin seg terzi n uwanak ay iga uneɣlaf amenzu n Ityupya deg Meɣres n 2015 ɣef Lezzayer, d urẓam n tmahelt (safara) tityupit deg Lezzayeré », ɣef wakken ay d-yebder ulɣu-a.

Awal-nsen iḥuza-d daɣ timsal timeqranin yettwammeṛkan deg wahil n unnummed (indimaǧ) gar tmura n Tefriqt, ɣef wakken ay tt-id-yextem ulɣu-a.