Asebter amenzawi

Ticcurka gar Lezzayer d Tdukli Tuṛufit i ussizdeg n waman

LEZZAYER TAMANEɣT – Iheyya-d Wahil Uṛufi n Tedhelt i Uḥric n Waman d Uɣram (EAU II) 4 n tezrawin (dirasat) i ussetrer (ɛaṣrana) n uɣram n waman, yerna ad d-yili ccɣel-a s tarrayin timaynutin deg uɣram d usseqdec n waman yumsen i wayen inefɛen, ɣef wakken ay d-nnan kra n yimasayen (mas’ulin) n wahil-a.

Yebda-d usenfar-a deg 2012, yerna ifuk aseggas-a s ussiweḍ ɣer yiswan-nnes s 100%, ɣef wakken ay d-tenna Hassina Hammouche, tanemhalt (mudira) n wahil n EAU II.

Gar yigmaḍ wuɣur yessaweḍ wahil-a, tebder-d aheyyi n tezrawin yeqqnen ɣer Uzenziɣ aɣelnaw n usnefli n uɣram n waman, tasuddest (istratiǧiyya) taɣelnawt n uḥezzeb ɣef yiḥemmalen, taseuddest n uɣram n waman deg temnaḍin n ugama d usseqdec n wayen ay d-yetteffɣen seg teɣsar (maḥaṭṭat) n ussizdeg n waman i wayen inefɛen.

Asseqdec n waluḍ ay d-yeffɣen seg ussizdeg n waman yumsen n yixxamen d yiwen seg wuguren imeqranen akk n uḥric-a yerna yessefk ad d-lhun yes-s i lqis alemmas d uɣezfan.

Lezzayer tesɛa, imir-a, 171 n teɣsar n ussizdeg n waman yumsen s tezmert n 900 n yimelyunen n yimitren igasasen (m3), yili deg 2000, tella tesɛa ala 10 n teɣsar.

« Simal la trennu tesmekta (kammiyya) n waluḍ. Ihi, yessefk ad d-naf tifrat ɣef zik lḥal », ɣef wakken ay d-tenna Massa Hammouche ay la ixeddmen daɣ d tadunemhalt n uɣram d uḥuddu n twennaḍt deg uɣlif n teɣbula (mawarid) n waman.

Ahil-a tettekka deg-s Tdukli Tuṛufit s 30 n yimelyunen n wuṛuten, ma d Lezzayer, tettekka deg-s s 10 n yimelyunen n wuṛuten. Deg ukatar n wahil-a, heyyan-d aɣawas (muxaṭṭaṭ) n ussileɣ s lqis aɣezfan deg yinurar n uɣram n waman, aheyyi n 5 n tɣerɣrin tisensegmanin d tlujistit i ussileɣ n yimsilɣen deg uḥric-a.