ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⵙⴻⵇⵇⴻⴼ ⵏ ⵜⵛⴻⵀⵕⵉⵢⵉⵏ: « ⵙⵙⴰⵔⴰⵎⴻⵖ ⴰⴷ ⵢⴻⵜⵜⵡⴰⵙⵙⴻⴼⵄⴻⵍ ⵡⴰⵢⴰ » (ⴰⵔⴰⴱ)
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵏⵏⴰ-ⴷ ⵓⵙⴻⵍⵡⴰⵢ ⵏ ⵓⵙⴻⵇⵇⴰⵎⵓ ⵏ ⵜⴻⴷⴱⴻⵍⵜ ⵏ ⴻⵙ ⵙⴹⵉⴼ, ⴰⵣⵣⴻⴷⵉⵏⴻ ⴰⵔⴰⴱ, ⴰⵙⵙ ⵏ ⵜⵜⵍⴰⵜⴰ, ⴷ ⴰⴽⴽⴻⵏ ⵢⴻⵙⵜⴻⵕⵃⴻⴱ ⵙ ⵕⵕⴰⵢ ⴰⵢ ⴷⴷⵎⴻⵏ ⵢⵉⵙⴻⵍⵡⴰⵢⴻⵏ ⵏ ⵜⴻⵖⵍⴰⵎⵉⵏ ⴰⴽⴽⴻⵏ ⴰⴷ ⵙⴻⵇⵇⴼⴻⵏ ⵜⵉⵛⴻⵀⵕⵉⵢⵉⵏ, ⵢⴻⵔⵏⴰ ⵢⴻⵏⵏⴰ-ⴷ ⴷ ⴰⴽⴽⴻⵏ ⵢⴻⵙⵙⴻⴼⴽ ⴰⴷ ⵢⴻⵜⵜⵡⴰⵙⵙⴻⴼⵄⴻⵍ ⵡⴰⵢⴰ ⵙⴻⴳ ⵜⵙⴻⵎⵀⵓⵢⵜ (ⵎⴰⵡⵙⵉⵎ) ⴰⵢ ⴷ-ⵢⴻⵜⵜⴻⴷⴷⵓⵏ ⴷ ⴰⵙⴰⵡⴻⵏ.
« ⵙⵜⴻⵕⵃⵉⴱⴻⵖ ⵙ ⵜⵉⴷⴻⵜ ⵙ ⵕⵕⴰⵢ-ⴰ ⴰⵢ ⵉⴼⵓⴽⴻⵏ ⵢⵉⵡⴻⵏ ⵏ ⵓⵙⴽⴰⵙⵉ (ⵏⵉⵇⴰⵛ) ⴷ ⴰⵖⴻⵣⴼⴰⵏ. ⵙⴻⴳ ⵣⵉⴽ ⴰⵢ ⵍⴰ ⴽⴽⴰⵜⴻⵖ ⴰⴽⴽⴻⵏ ⴰⴷ ⴷ-ⵢⵉⵍⵉ ⵓⵙⴻⵇⵇⴻⴼ ⵏ ⵜⵛⴻⵀⵕⵉⵢⵉⵏ ⴰⴽⴽⴻⵏ ⴰⴷ ⵏⴻⴼⵔⵓ ⵓⴳⵓⵔⴻⵏ ⵏ ⵜⴻⴷⵔⵉⵎⵜ ⴰⵢ ⴷ-ⵢⴻⴽⴽⴰⵏ ⵙⴻⴳ ⵙⵙⵓⵎⴰⵜ ⵜⵉⵎⴻⵇⵔⴰⵏⵉⵏ ⴰⵢ ⴷ-ⵙⵙⵓⵜⵓⵔⴻⵏ ⵢⵉⵎⴰⵔⵉⵔⴻⵏ. ⵙⵙⴰⵔⴰⵎⴻⵖ ⴽⴰⵏ ⴰⴷ ⵢⴻⵜⵜⵡⴰⵙⵙⴻⴼⵄⴻⵍ ⵓⵃⴻⵣⵣⵉⴱ-ⴰ ⵢⴻⵔⵏⴰ ⵓⵔ ⴷ-ⵢⴻⵜⵜⵖⵉⵎⵉ ⴰⵔⴰ ⴷ ⴰⵡⴰⵍ ⴽⴰⵏ ⴷⴻⴳ ⵡⴰⴹⵓ », ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵢⴻⵏⵏⴰ ⵓⵎⴰⵙⴰⵢ-ⴰ (ⵎⴰⵙ’ⵓⵍ) ⵏ ⴻⵙ ⵙⴹⵉⴼ.
ⵉⵙⴻⵍⵡⴰⵢⴻⵏ ⵏ ⵜⴻⵖⵍⴰⵎⵉⵏ ⵏ ⵜⴻⵎⵖⵓⵏⵜ 1ⵓⵜ ⵎⵍⴰⵍⴻⵏ ⴰⵙⵙ ⵏ ⵍⴻⵜⵏⵉⵢⴻⵏ ⴷ ⵓⵙⴻⵍⵡⴰⵢ ⵏ ⵜⴼⵉⴷⵉⵕⴰⵍⵉⵜ ⵜⴰⴷⵣⴰⵢⵔⵉⵜ ⵏ ⵜⵛⵉⵔⵜ ⵏ ⵓⴹⴰⵔ, ⵎⵧⵀⴰⵎⴻⴷ ⵔⴰⵧⵓⵔⴰⵧⵓⴰ, ⵢⴻⵔⵏⴰ ⵢⴻⴼⵔⴰⵏ-ⵜⵜ-ⵉⴷ ⵙ ⵓⵎⵙⴻⴼⵀⴰⵎ, ⴳⴰⵔ ⴰⴽⴽ ⵡⵉⴷ ⵢⴻⵜⵜⴻⴽⴽⴰⵏ, ⴰⴽⴽⴻⵏ ⴰⴷ ⵙⴻⵇⵇⴼⴻⵏ ⵜⵉⵛⴻⵀⵕⵉⵢⵉⵏ ⵏ ⵢⵉⵎⴰⵔⵉⵔⴻⵏ ⴰⴷ ⵢⵓⵖⴰⵍⴻⵏ ⴰⴷ ⵜⵜⴰⵖⴻⵏ, ⵎⴰ ⴰⵟⴰⵙ, ⴰⵎⴻⵍⵢⵓⵏ ⵏ ⵢⵉⴷⵉⵏⴰⵕⴻⵏ, ⵢⴻⵔⵏⴰ ⵕⵕⴰⵢ-ⴰ, ⵍⴻⵎⵎⴻⵔ ⴷ ⵍⴻⴱⵖⵉ, ⴰⴷ ⵢⴻⵜⵜⵡⴰⵙⵙⴻⴼⵄⴻⵍ ⵙⴻⴳ ⵜⵙⴻⵎⵀⵓⵢⵜ ⵏ 2016-2017 ⴷ ⴰⵙⴰⵡⴻⵏ.
« ⵜⴰⵎⵖⵓⵏⵜ ⵏ ⵜⵛⵉⵔⵜ ⵏ ⵓⴹⴰⵔ ⵜⴰⵙⴰⴷⵓⵔⴰⵏⵜ ⵓⵔ ⵢⴻⵙⵙⴻⴼⴽ ⴰⵔⴰ ⴰⴷ ⵜⴻⵙⵜⴻⵄⵕⴻⴼ ⵙ ⵍⴻⵄⵇⴻⴷ ⵏ ⵓⵎⴰⵔⵉⵔ ⴰⴷ ⵢⴻⵙⵄⵓⵏ ⵜⴰⵛⴻⵀⵕⵉⵜ ⵢⴻⴽⴽⴰⵏ ⵉ ⵓⵎⴻⵍⵢⵓⵏ ⵏ ⵢⵉⴷⵉⵏⴰⵕⴻⵏ. ⴷ ⵡⴰ ⴰⵢ ⴷ ⵛⵛⴻⵔⴹ ⴰⴽⴽⴻⵏ ⴰⴷ ⵢⴻⵜⵜⵡⴰⵙⵙⴻⴼⵄⴻⵍ ⵓⵃⴻⵣⵣⵉⴱ-ⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵔⴰⴱ, ⵢⴻⵔⵏⴰ ⵉⵅⴻⴱⴱⴻⵔ-ⴷ ⴷ ⴰⴽⴽⴻⵏ ⵙⴻⴳ ⵢⵉⵎⵉⵔ-ⴰ ⴷ ⴰⵙⴰⵡⴻⵏ, « ⵢⴻⵜⵜⵡⴰⴳⴷⴻⵍ (ⵎⴰⵎⵏⵓⵄ) ⵓⵅⴻⵍⵍⴻⵚ ⵏ ⵜⵛⴻⵀⵕⵉⵜ ⵙⴻⴳ ⵜⴰⵣⵡⴰⵔⴰ ».
ⴰⵙⴻⵇⵇⴻⴼ ⵏ ⵜⵛⴻⵀⵕⵉⵢⵉⵏ ⴰⴷ ⵢⴻⴵⴵ ⵜⵉⵖⵍⴰⵎⵉⵏ « ⴰⴷ ⵙⵏⴻⵇⵙⴻⵏⵜ ⵙⴻⴳ ⵡⴰⵢⴻⵏ ⴰⵢ ⵜⵜⵚⴻⵔⵔⵉⴼⴻⵏⵜ ⵖⴻⴼ ⵜⵛⴻⵀⵕⵉⵢⵉⵏ », ⵢⴻⵔⵏⴰ ⴰⴷ ⵣⴻⵎⵔⴻⵏⵜ, ⵙ ⵡⴰⵢⴰ, ⴰⴷ ⵙⵙⴻⴷⴷⴰⵢⴻⵏⵜ ⵅⵉⵔ ⵜⴰⴷⵔⵉⵎⵜ-ⵏⵙⴻⵏⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ. « ⵜⵉⵖⵍⴰⵎⵉⵏ ⵍⴰ ⵜⵜⵅⴻⵍⵍⵉⵚⴻⵏⵜ ⵜⵉⵛⴻⵀⵕⵉⵢⵉⵏ ⴷ ⵜⵉⵎⴻⵇⵔⴰⵏⵉⵏ, ⵙⴰⴽⴽⵉⵏ ⵜⵜⴰⴼⴻⵏⵜ-ⴷ ⵉⵎⴰⵏ-ⵏⵙⴻⵏⵜ ⴷⴻⴳ ⵜⴻⵣⵖⵉⵏⵉⵏ (ⴰⵣⴰⵎⴰⵜ) ⵏ ⵜⴻⴷⵔⵉⵎⵜ, ⵢⴻⵔⵏⴰ ⴷ ⴰⵢⴰ ⴰⵢ ⵜⴻⵏⵜ-ⵢⴻⵜⵜⴰⴵⴵⴰⵏ ⵜⵜⵄⴻⴹⴹⵉⵍⴻⵏⵜ ⴰⴷ ⵅⴻⵍⵍⵚⴻⵏⵜ ⵜⵉⵛⴻⵀⵕⵉⵢⵉⵏ, ⵢⴻⵔⵏⴰ ⵢⴻⵙⵙⴰⵡⴰⴹ, ⴷⴻⴳ ⵜⴳⴰⵔⴰ, ⵉⵎⴰⵔⵉⵔⴻⵏ ⴰⴷ ⵛⵛⴻⵜⴽⵉⵏ ⵉ ⵜⵙⴻⵇⵇⴰⵎⵓⵜ ⵏ ⴼⴻⵔⵔⵓ ⵏ ⵍⵅⵉⵍⴰⴼⴰⵜ. ⵙ ⵓⵙⴻⵇⵇⴻⴼ-ⴰ, ⵜⵉⵖⵍⴰⵎⵉⵏ ⴰⴷ ⵣⴻⵎⵔⴻⵏⵜ ⴰⴷ ⵙⵙⴻⴷⴷⴰⵢⴻⵏⵜ ⵜⴰⴷⵔⵉⵎⵜ-ⵏⵙⴻⵏⵜ ⵉ ⵢⵉⵎⴰⵏ-ⵏⵙⴻⵏⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵙⵙⴻⴼⵀⴻⵎ ⴰⵔⴰⴱ.
