Asebter amenzawi

Aseqqef n tcehṛiyin: « Ssarameɣ ad yettwassefɛel waya » (Arab)

LEZZAYER TAMANEɣT – Yenna-d uselway n useqqamu n tedbelt n ES Sḍif, Azzedine Arab, ass n ttlata, d akken yesteṛḥeb s ṛṛay ay ddmen yiselwayen n teɣlamin akken ad seqqfen ticehṛiyin, yerna yenna-d d akken yessefk ad yettwassefɛel waya seg tsemhuyt (mawsim) ay d-yetteddun d asawen.

« Steṛḥibeɣ s tidet s ṛṛay-a ay ifuken yiwen n uskasi (niqac) d aɣezfan. Seg zik ay la kkateɣ akken ad d-yili useqqef n tcehṛiyin akken ad nefru uguren n tedrimt ay d-yekkan seg ssumat timeqranin ay d-ssuturen yimariren. Ssarameɣ kan ad yettwassefɛel uḥezzib-a yerna ur d-yettɣimi ara d awal kan deg waḍu », ɣef wakken ay aɣ-d-yenna umasay-a (mas’ul) n ES Sḍif.

Iselwayen n teɣlamin n Temɣunt 1ut mlalen ass n letniyen d uselway n Tfidiṛalit Tadzayrit n Tcirt n Uḍar, Mohamed Raouraoua, yerna yefran-tt-id s umsefham, gar akk wid yettekkan, akken ad seqqfen ticehṛiyin n yimariren ad yuɣalen ad ttaɣen, ma aṭas, amelyun n yidinaṛen, yerna ṛṛay-a, lemmer d lebɣi, ad yettwassefɛel seg tsemhuyt n 2016-2017 d asawen.

« Tamɣunt n Tcirt n Uḍar Tasadurant ur yessefk ara ad testeɛṛef s leɛqed n umarir ad yesɛun tacehṛit yekkan i umelyun n yidinaṛen. D wa ay d ccerḍ akken ad yettwassefɛel uḥezzib-a », ɣef wakken ay d-yenna Arab, yerna ixebber-d d akken seg yimir-a d asawen, « yettwagdel (mamnuɛ) uxelleṣ n tcehṛit seg tazwara ».

Aseqqef n tcehṛiyin ad yeǧǧ tiɣlamin « ad sneqsent seg wayen ay ttṣerrifent ɣef tcehṛiyin », yerna ad zemrent, s waya, ad sseddayent xir tadrimt-nsent, ɣef wakken ay d-yenna. « Tiɣlamin la ttxelliṣent ticehṛiyin d timeqranin, sakkin ttafent-d iman-nsent deg tezɣinin (azamat) n tedrimt, yerna d aya ay tent-yettaǧǧan ttɛeḍḍilent ad xellṣent ticehṛiyin, yerna yessawaḍ, deg tgara, imariren ad ccetkin i tseqqamut n ferru n lxilafat. S useqqef-a, tiɣlamin ad zemrent ad sseddayent tadrimt-nsent i yiman-nsent », ɣef wakken ay d-yessefhem Arab.