Asebter amenzawi
Yessaweḍ uneɣlaf n yimjahden ṛṛeḥma i Yidzayriyen yemmuten ass n 17 Tubeṛ deg Paris
PARIS – Yessaweḍ uneɣlaf n yimjahden, Tayeb Zitouni, ṛṛeḥma, ass n laṛeḅɛa tameddit, deg Paris, i Yidzayriyen yemmuten deg tnegzarin n 17 Tubeṛ 1961.
Deg wass wis sin n terzi-nnes ɣef Fṛansa (d tamezwarut seg ṣṣenf-nnes), yessaweḍ uneɣlaf ṛṛeḥma i twinas-nni (mi’at) n Yidzayriyen ay zellin ɣer wasif n Seine, mi yerza ɣef tleggit n Saint-Michel. Aneɣlaf n yimjahden yedda ɣer din d umaru n uwanak (dawla) afṛensis d-yelhan s yimenɣan iqburen, Jean-Marc Todeschini.
Deg wass n 17 Tubeṛ, tamsulta (curṭa) tafṛensist, yellan imir-nni ddaw ṛṛay n Maurice Papon, tenɣa yerna tiwinas n Yidzayriyen ay d-yeffɣen ad gen tamesbanit tamelwit mgal ugdal n tuffɣa ay d-yettwaḥettmen ala fell-asen, yerna kra seg wid yettwenɣen, zellin-ten ɣer wasif n Seine.
Uqbel waya, yessers Tayeb Zitouni tameqqunt n tjejjigin sdat uẓekka n Userdas ur yettwassnen yettwebnan d tajmilt i wid yemmuten deg Umgaru Amaḍlan Amezwaru deg Ukmir n Trennawt (deg Paris).
Taṣebḥit n wass n laṛebɛa, yedda uneɣlaf ɣer Verdun, d taɣiwant tafṛensist d-yezgan deg Lorraine, anda ay d-yella yimenɣi ameqran ay yeglan s waṭas n tmeddurin, deg Umgaru Amaḍlan Amezwaru (1914-1918), anda ay yessaweḍ ṛṛeḥma sdat 592 n yiẓekwan n Yidzayriyen ay tewwi Fṛansa akken ad nnaɣen fell-as.
Azal n 20.000 n Yidzayriyen ay yettekkan deg yimenɣi-a ay yeqqimen 300 n wussan. D igiman (alaf) seg-sen ay yemmuten yerna ala 592 seg-sen ay yettwaɛeqlen yerna ttwameḍlen deg Verdun.
Todeschini, ay yeddan d uneɣlaf adzayri ɣer Verdun, yesmekti-d d akken « aṭas n yiserdasen ay d-yusan deg Lezzayer ay yemmuten deg Umgaru Amaḍlan Amezwaru d Umgaru Amaḍlan Wis Sin ɣef tlelli-nneɣ, tilelli n Fṛansa d tin n Tuṛuft n wass-a ».
Aneɣlaf n yimjahden iga tirzi n 3 n wussan ɣef Fṛansa yerna tirzi-a ad tfak ass n lexmis s udiwenni (ḥiwar) gar uselway n Ugraw afṛensis, Claude Bartolone, d uneɣaf n yimjahden ay yessawlen yagi, ass n ttlata, d umaru n uwanak afṛensis d-yelhan s yimenɣan iqburen d uselway n Usinat, Gerard Larcher.
Ad yessiwel daɣ uneɣlaf n yimjahden, ass n lxmis, d uneɣlaf afṛensis n temḥaddit, Jean-Yves Le Drian.
