ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵢⴻⵏⵇⴻⵙ ⵡⴰⴵⴰⵡ ⵏ ⵙⵙⴽⴻⵕ ⴷⴻⴳ 2015

ⵍⴻⵣⵣⴰⵢⴻⵔ ⵜⴰⵎⴰⵏⴻƔⵜ – ⵢⴻⵏⵇⴻⵙ ⵡⴰⴵⴰⵡ ⵏ ⵙⵙⴽⴻⵕ (ⴰⴱⵉⵟⵔⴰⴱ, ⴰⵖⴰⵏⵉⵎ ⵏ ⵙⵙⴽⴻⵕ, ⴰⵙⵉⵔⵓ ⵏ ⵜⵍⴰⴽⵟⵓⵣⵜ ⴷ ⵜⵍⴰⴽⵟⵓⵣⵜ ⵢⴻⵇⵇⵓⵔⴻⵏ) ⵖⴻⵔ 714,76 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ ⴷⴻⴳ 2015 ⵢⵉⵍⵉ ⵜⴻⵙⵇⴰⵎ-ⴷ ⵜⴼⴰⵜⵓⵕⵜ ⵏ ⵙⵙⴽⴻⵕ 861,04 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ ⴷⴻⴳ 2014, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵜⴻⵏⵏⴰ ⵜⴻⴷⵡⴰⵏⵜ.

ⵎⴰ ⴷ ⵜⴰⵙⵎⴻⴽⵜⴰ (ⴽⴰⵎⵎⵉⵢⵢⴰ) ⵏ ⵙⵙⴽⴻⵕ ⴰⵢ ⴷ-ⵢⴻⵜⵜⵡⴰⴵⵡⴻⵏ ⵜⴻⵔⵏⴰ ⵛⵡⵉⵟ ⵢⴻⵔⵏⴰ ⵜⴻⵡⵡⴻⴹ ⵖⴻⵔ 1,93 ⴷ ⴰⵎⴻⵍⵢⵓⵏ ⵏ ⵢⵉⵟⵓⵏⴻⵏ ⵢⵉⵍⵉ ⴷⴻⴳ 2014, ⵜⵓⴵⴻⵡ-ⴷ ⵍⴻⵣⵣⴰⵢⴻⵔ 1,92 ⴷ ⴰⵎⴻⵍⵢⵓⵏ ⵏ ⵢⵉⵟⵓⵏⴻⵏ, ⵖⴻⴼ ⵍⴻⵃⵙⴰⴱ ⵏ ⵡⴰⵎⵎⴰⵙ ⴰⵖⴻⵍⵏⴰⵡ ⵏ ⵜⵙⴻⵏⵙⴻⵍⴽⵉⵎⵜ ⴷ ⵜⴰⴷⴷⴰⴷⴰⵏⵉⵏ ⵏ ⵜⴻⴷⵡⴰⵏⵜ.

ⵙ ⵡⴰⵢⴰ, ⵜⴻⵏⵇⴻⵙ ⵜⴼⴰⵜⵓⵕⵜ ⵏ ⵡⴰⴵⴰⵡ ⵏ ⵙⵙⴽⴻⵕ ⵙ 17% ⴷⴻⴳ 2015 ⵖⴻⴼ ⵍⴻⵃⵙⴰⴱ ⵏ 2014, ⵎⴰ ⴷ ⵜⴰⵙⵎⴻⴽⵜⴰ ⵜⴻⵔⵏⴰ ⵙ 0,44%.

ⴰⵏⵇⴰⵙ-ⴰ ⵏ ⵜⴼⴰⵜⵓⵕⵜ ⵢⴻⵍⵍⴰ-ⴷ ⵖⴻⴼ ⵍⴵⴰⵍ ⵏ ⵓⵏⵇⴰⵙ ⴷⴻⴳ ⵙⵙⵓⵎⴰ ⵏ ⵙⵙⴽⴻⵕ ⴰⵣⵓⴱⴰⵖ ⴷ ⵙⵙⴽⴻⵕ ⴰⵎⴻⵍⵍⴰⵍ ⴷⴻⴳ ⵓⵎⴰⴹⴰⵍ ⵉⵎⵉ ⴰⵢ ⵜⴻⵔⴱⴻⵃ ⵍⵖⴻⵍⵍⴰ ⵏ ⵓⵖⴰⵏⵉⵎ ⵏ ⵙⵙⴽⴻⵕ ⵢⴻⵔⵏⴰ ⵜⴻⵖⵍⵉ ⵙⵙⵓⵎⴰ ⵏ ⵓⵇⴰⵔⵉⴹ (ⵄⵓⵎⵍⴰ) ⴰⴱⵔⵉⵣⵉⵍⵉ ⵖⴻⴼ ⵍⴻⵃⵙⴰⴱ ⵏ ⵓⴷⵓⵍⴰⵕ.

ⴱⵔⵉⵣⵉⵍ ⴷ ⵏⴻⵜⵜⴰⵜ ⴰⵢ ⴷ ⵜⴰⵏⴼⴰⵔⴰⵙⵜ (ⵎⵓⵏⵜⵉⴵⴰ) ⵜⴰⵎⴻⵣⵡⴰⵔⵓⵜ ⴰⴽⴽ ⵏ ⵙⵙⴽⴻⵕ ⴷⴻⴳ ⵓⵎⴰⴹⴰⵍ ⵢⴻⵔⵏⴰ ⵜⴻⵙⵙⴻⴼⵔⴰ ⴰⴷ ⴷ-ⵜⴻⵎⴳⴻⵔ 604 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵟⵓⵏⴻⵏ ⵏ ⵙⵙⴽⴻⵕ ⵉ 2015-2016 (ⴷ ⵜⴰⵙⵎⴻⴽⵜⴰ ⵜⴰⵎⴻⵇⵔⴰⵏⵜ ⴰⴽⴽ ⴷⴻⴳ ⵓⵎⴻⵣⵔⵓⵢ-ⵏⵏⴻⵙ). 80% ⵙⴻⴳ ⵙⵙⴽⴻⵕ ⴰⴽⴽ ⴰⵢ ⵢⴻⵜⵜⵏⵓⵣⵓⵏ ⴷⴻⴳ ⵓⵎⴰⴹⴰⵍ ⵢⴻⵜⵜⴻⴽⴽ-ⴷ ⵙⴻⴳ ⵓⵖⴰⵏⵉⵎ ⵏ ⵙⵙⴽⴻⵕ.