ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵉⵙⵕⴰⵢⵉⵍ ⵍⴰ ⵜⴻⵜⵜⴽⴻⵎⵎⵉⵍ ⵉⵙⴻⵏⴼⴰⵔⴻⵏ-ⵏⵏⴻⵙ ⵏ ⵜⵓⵟⵟⴼⴰ ⵏ ⵡⴰⴽⴰⵍ ⴰⴼⴰⵍⴻⵙⵟⵉⵏⵉ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵡⵜⴻⵏ-ⴷ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴷⴻⴳ ⵓⴽⴻⵎⵎⴻⵍ ⴰⵢ ⵍⴰ ⵜⴻⵜⵜⴽⴻⵎⵎⵉⵍ ⵉⵙⵕⴰⵢⵉⵍ ⴰⵙⵙⴻⵀⵔⴻⵙ (ⵉⵙⵜⵉⵄⵎⴰⵔ) ⵏ ⵢⵉⴽⴰⵍⴻⵏ ⵉⴼⴰⵍⴻⵙⵟⵉⵏⵉⵢⴻⵏ ⵢⴻⵜⵜⵡⴰⵟⵟⴼⴻⵏ ⵢⴻⵍⵍⴰⵏ ⴷ ⵙⵙⴻⴱⴱⴰ ⵉ ⵜⵎⴻⵔⵏⵉⵡⵜ ⵏ ⵛⵛⵡⴰⵍ ⴷ ⵓⵀⵓⴷⴷⵓ ⵏ ⵓⵙⵙⵉⵔⴻⵎ ⵏ ⵜⴰⵍⵡⵉⵜ, ⵉⵎⵉ ⴰⵢⴰ ⵢⴻⵔⴳⴻⵍ ⴰⴱⵔⵉⴷ ⵉ ⴼⴻⵔⵔⵓ ⵜⴰⵍⵓⴼⵜ-ⴰ ⵙ ⵙⵉⵏ ⵏ ⵢⵉⵡⴰⵏⴰⴽⴻⵏ (ⴷⵓⵡⴰⵍ).

ⵉⵡⴻⵜ-ⴷ ⵓⵎⴰⵔⵓ ⴰⵎⴰⵜⵓ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ, ⴱⴰⵏ ⴽⵉ-ⵎⵧⵧⵏ, ⴰⵙⵙ ⵏ ⵜⵜⵍⴰⵜⴰ, ⴷⴻⴳ ⵓⴽⴻⵎⵎⴻⵍ ⵏ ⵓⵙⵙⴻⵀⵔⴻⵙ ⵉⵙⵕⴰⵢⵉⵍⵉ ⴷⴻⴳ ⵓⴳⴻⵎⵎⴰⴹ ⵓⵜⵔⵉⵎ, ⵢⴻⵔⵏⴰ ⵉⴳⴻⵔ-ⴷ ⵜⵉⵖⵔⵉ ⵉ ⵓⵙⴱⴰⴽ ⵏ ⵍⴻⴱⵏⵉ ⵏ ⵜⴻⵀⵔⴰⵙ (ⵎⵓⵙⵜⴰⵡⵟⴰⵏⴰⵜ).

ⴷ ⵜⵉⴽⴽⴻⵍⵜ ⵜⴰⵎⴻⵣⵡⴰⵔⵓⵜ, ⴷⴻⴳ ⵜⴰⵍⵍⵉⵜ ⵏ ⵓⵙⴻⴳⴳⴰⵙ ⴷ ⵓⵣⴳⴻⵏ ⴰⵢⴷⴻⴳ ⴰⵏⴰⴱⴰⴹ ⴰⴷ ⵢⴻⵇⴱⴻⵍ ⵉⵖⴰⵡⴰⵙⴻⵏ (ⵎⵓⵅⴰⵟⵟⴰⵟⴰⵜ) ⵉⵎⴻⵇⵔⴰⵏⴻⵏ ⵉ ⵍⴻⴱⵏⵉ ⵏ ⵜⴻⵀⵔⴰⵙ ⵜⵉⵎⴰⵢⵏⵓⵜⵉⵏ ⴷⴻⴳ ⵓⴳⴻⵎⵎⴰⴹ ⵓⵜⵔⵉⵎ.

ⵢⴻⵇⴱⴻⵍ ⵓⵖⵍⵉⴼ ⵉⵙⵕⴰⵢⵉⵍⵉ ⵏ ⵜⴻⵎⵃⴰⴷⴷⵉⵜ ⵉⵖⴰⵡⴰⵙⴻⵏ ⵏ ⵍⴻⴱⵏⵉ ⵏ 153 ⵏ ⵜⵏⴻⵣⴷⵓⵖⵉⵏ ⴷⴻⴳ ⵜⴻⵀⵔⴰⵙ ⵏ ⵓⴳⴻⵎⵎⴰⴹ ⵓⵜⵔⵉⵎ ⵢⴻⵜⵜⵡⴰⵟⵟⴼⴻⵏ, ⵖⴻⴼ ⵍⴻⵃⵙⴰⴱ ⵏ ⵜⵓⴷⴷⵙⴰ ⵜⵉⵙⵕⴰⵢⵉⵍⵉⵜ ⵏ ⵜⴰⵍⵡⵉⵜ ⵉⵎⵉⵔ-ⴰ ⵢⵓⴳⵉⵏ ⴰⴽⴻⵎⵎⴻⵍ ⵏ ⵓⵙⵙⴻⵀⵔⴻⵙ.

ⵎⴰⵙⵙ ⴱⴰⵏ, ⴰⵢ ⴷ-ⵢⴻⵙⵙⴰⵡⵍⴻⵏ ⴷⴻⴳ ⵓⵙⴻⵇⵇⴰⵎⵓ ⵏ ⵜⵖⴻⵍⵍⵉⵙⵜ (ⴰⵎⵏ) ⴷⴻⴳ ⵢⵉⵡⴻⵏ ⵏ ⵓⵙⴽⴰⵙⵉ (ⵏⵉⵇⴰⵛ) ⵖⴻⴼ ⵓⴳⵎⵓⴹ ⴰⵍⴻⵎⵎⴰⵙ, ⵢⴻⵏⵏⴰ-ⴷ ⴷ ⴰⴽⴽⴻⵏ « ⵜⴻⵛⵖⴻⴱ-ⵉⵜ ⵎⵍⵉⵃ » ⵜⴻⵎⵙⴰⵍⵜ ⵏ ⵍⴻⴱⵏⵉ ⵏ ⵜⵏⴻⵣⴷⵓⵖⵉⵏ ⵜⵉⵙⵕⴰⵢⵉⵍⵉⵢⵉⵏ ⵜⵉⵎⴰⵢⵏⵓⵜⵉⵏ ⴷⴻⴳ ⵓⴳⴻⵎⵎⴰⴹ ⵓⵜⵔⵉⵎ, ⵢⴻⵔⵏⴰ ⵢⴻⵏⵏⴰ-ⴷ ⴷ ⴰⴽⴽⴻⵏ ⴰⵢⴰ ⴷ ⴰⵙⵎⴻⵏⴷⴻⴳ ⵏ ⵜⵎⴻⵙ.

ⵍⴻⵕⵢⵓⵢ-ⴰ ⵏ ⵓⵙⵎⴻⵏⵜⴻⵙ (ⵉⵙⵜⵉⴼⵣⴰⵣ) « ⵍⴰ ⵔⴻⵏⵏⵓⵏⵜ ⵣⵣⵉⵜ ⵉ ⵜⵎⴻⵙ ⵢⴻⵔⵏⴰ ⵜⵜⴹⵓⵔⵔⵓⵏⵜ ⴼⴻⵔⵔⵓ ⴰⵙⴻⵔⵜⵉ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

« ⴰⴽⴽⴻⵏ ⴰⴷ ⴷ-ⵉⵍⵉⵏ ⵢⵉⵙⵓⵔⵉⴼⴻⵏ ⴷⴻⴳ ⵓⴱⵔⵉⴷ ⵏ ⵜⴰⵍⵡⵉⵜ, ⵢⴻⵙⵙⴻⴼⴽ ⴰⴷ ⵢⴻⵜⵜⵡⴰⵙⴱⴻⴽ ⵓⵙⵙⴻⵀⵔⴻⵙ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ. ⴰⴽⴻⵎⵎⴻⵍ ⵏ ⵡⵓⵥⵓ ⵏ ⵜⴻⵀⵔⴰⵙ ⴷ « ⴰⵛⵇⵉⵔⵔⴻⵡ ⵉ ⵢⵉⴼⴰⵍⴻⵙⵟⵉⵏⵉⵢⴻⵏ ⴷ ⵓⵎⵖⵉⵡⴰⵏ ⴰⴳⵔⴰⵖⵍⴰⵏ (…) ⵢⴻⵔⵏⴰ ⵢⴻⵙⵙⴰⴷⴰⴼ ⵛⵛⴻⴽ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵄⴻⵡⵡⴻⵍ ⵏ ⵉⵙⵕⴰⵢⵉⵍ ⴰⴽⴽⴻⵏ ⴰⴷ ⵜⴻⵜⵜⴻⴽⴽⵉ ⴷⴻⴳ ⵜⵉⴼⵔⴰⵜ ⵏ ⵙⵉⵏ ⵏ ⵢⵉⵡⴰⵏⴰⴽⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⴱⴰⵏ.

ⵖⴻⴼ ⵍⴻⵃⵙⴰⴱ-ⵏⵏⴻⵙ, « ⵉⴷⵉⵙⴰⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ ⵢⴻⵙⵙⴻⴼⴽ ⴰⴷ ⴳⴻⵏ ⴽⵔⴰ ⵢⴻⵔⵏⴰ ⵡⴰⵔ ⵍⴻⵄⴹⵉⵍ ⴰⴽⴽⴻⵏ ⵜⵉⴼⵔⴰⵜ-ⴰ ⵏ ⵙⵉⵏ ⵏ ⵢⵉⵡⴰⵏⴰⴽⴻⵏ ⵓⵔ ⵜⴻⵜⵜⵎⴻⵜⵜⴰⵜ ⴰⵔⴰ ⵉ ⵍⴻⴱⴷⴰ ».

ⵙⴻⴳ ⵢⵉⴷⵉⵙ ⵏⵉⴹⴻⵏ, ⵉⴳⴻⵔ-ⴷ ⵎⴰⵙⵙ ⴱⴰⵏ ⵜⵉⵖⵔⵉ ⵉ ⵢⵉⴼⴰⵍⴻⵙⵟⵉⵏⵉⵢⴻⵏ ⴰⴽⴽⴻⵏ ⴰⴷ ⵎⵙⵓⵖⴰⵍⴻⵏ ⵢⴻⵔⵏⴰ ⵉⴳⴻⵔ-ⴷ ⵜⵉⵖⵔⵉ ⵉ ⵜⵎⵓⵔⴰ ⴰⵢ ⵢⴻⵏⵏⵓⵎⴻⵏ ⵜⵜⵚⴻⴷⴷⵉⵇⴻⵏⵜ-ⴷ ⵉⴷⵔⵉⵎⴻⵏ ⵉ ⴼⴰⵍⴻⵙⵟⵉⵏ ⴰⴽⴽⴻⵏ ⴰⴷ ⵄⴰⵡⴷⴻⵏⵜ ⴰⴷ ⴱⵏⵓⵏⵜ ⵜⴰⵎⵏⴰⴹⵜ ⵏ ⵖⴻⵣⵣⴰ ⴰⵢ ⵢⴻⵍⵍⴰⵏ ⴷⴻⴳ ⵜⴻⴳⵏⵉⵜ ⵜⴰⵍⵙⴰⵏⵜ (ⵉⵏⵙⴰⵏⵉⵢⵢⴰ) ⵏ ⴷⵉⵔⵉ ⵢⴻⵔⵏⴰ ⴰⵢⴰ ⴷ ⴰⵎⵉⵀⵉ (ⵅⴰⵟⴰⵔ) ⵖⴻⴼ ⵜⵖⴻⵍⵍⵉⵙⵜ ⵏ ⵜⴻⵎⵏⴰⴹⵜ.

ⵉⵙⵕⴰⵢⵉⵍ ⵜⴻⴹⴹⴻⴼ ⴰⴳⴻⵎⵎⴰⴹ ⵓⵜⵔⵉⵎ ⵙⴻⴳ 1967, ⵢⴻⵔⵏⴰ ⵙⴻⴳ ⵡⴰⵙⵎⵉ ⴰⵢ ⴷ-ⵢⴻⵍⵍⴰ ⵡⴰⵢⴰ, ⴰⴽⴽ ⵉⵏⴰⴱⴰⴹⴻⵏ ⵉⵙⵕⴰⵢⵉⵍⵉⵢⴻⵏ ⴰⵢ ⴷ-ⵢⴻⵎⵙⴻⴹⴼⴰⵔⴻⵏ, ⴰⵎⴰ ⴷ ⵡⵉⴷ ⵏ ⵓⵢⴻⴼⴼⵓⵙ ⵏⴻⵖ ⵏ ⵓⵣⴻⵍⵎⴰⴹ, ⴽⴻⵎⵎⵍⴻⵏ ⵜⵓⴽⴽⵙⴰ ⵏ ⵡⴰⴽⴰⵍ ⵉ ⵢⵉⴼⴰⵍⴻⵙⵟⵉⵏⵉⵢⴻⵏ. ⵍⴱⴰⵟⴻⵍ-ⴰ ⴽⴽⴰⵜⴻⵏ-ⴷ ⴷⴻⴳ-ⵙ ⴰⵎⴰ ⴷ ⵉⴼⴰⵍⴻⵙⵟⵉⵏⵉⵢⴻⵏ, ⴰⵎⴰ ⴷ ⴰⵎⵖⵉⵡⴰⵏ (ⵎⵓⴵⵜⴰⵎⴰⵄ) ⴰⴳⵔⴰⵖⵍⴰⵏ ⵉⵎⵉ ⴰⵢ ⵍⴰ ⴷ-ⵢⴻⵜⵜⴻⵜⵜ ⴰⴽⴰⵍ ⵉ ⵓⵡⴰⵏⴰⴽ (ⴷⴰⵡⵍⴰ) ⴰⴼⴰⵍⴻⵙⵟⵉⵏⵉ ⵢⴻⵔⵏⴰ ⵢⴻⵙⵙⴻⵡⵄⴰⵕ ⵓⴳⴰⵔ ⵜⵉⴼⵔⴰⵜ ⵙ ⵜⴰⵍⵡⵉⵜ.