ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵢⴻⵙⵙⴻⴼⴽ ⴰⴷ ⵢⵉⵍⵉ ⵢⵉⴷⵍⴻⵙ ⴰⵎⴻⵔⵔⴰⵢⴰⵏ ⵉ ⵓⵙⴷⵓⵇⵇⴻⵙ ⵏ ⵜⵎⴻⵔⵔⵉⵜ ⴷⴻⴳ ⵍⴻⵣⵣⴰⵢⴻⵔ

ⵜⵉⵣⵉ ⵡⴻⵣⵣⵓ – ⵏⵏⴰⵏ-ⴷ ⵢⵉⵎⵜⵜⴻⴽⴽⵉⵢⴻⵏ ⴷⴻⴳ ⵢⵉⵡⴻⵏ ⵏ ⵓⵎⵢⴰⴳⴻⵔ ⵖⴻⴼ ⵡⵓⴳⵓⵔⴻⵏ ⵏ ⵓⵙⴷⵓⵇⵇⴻⵙ ⵏ ⵜⵎⴻⵔⵔⵉⵜ (ⵙⵉⵢⴰⵃⴰ) ⴷⴻⴳ ⵍⴻⵣⵣⴰⵢⴻⵔ, ⴰⵙⵙ ⵏ ⵍⴻⵅⵎⵉⵙ, ⴷⴻⴳ ⵜⵉⵣⵉ ⵡⴻⵣⵣⵓ, ⴷ ⴰⴽⴽⴻⵏ ⵢⴻⵙⵙⴻⴼⴽ ⴰⴷ ⴷ-ⵢⴻⵜⵜⵡⴰⵀⴻⵢⵢⵉ ⵢⵉⴷⵍⴻⵙ ⴰⵎⴻⵔⵔⴰⵢⴰⵏ ⵉ ⵍⵎⴻⵏⴷ ⵏ ⵓⵙⴷⵓⵇⵇⴻⵙ ⵏ ⵜⵎⴻⵔⵔⵉⵜ ⴷⴻⴳ ⵜⵎⵓⵔⵜ.

ⴷⴻⴳ ⵓⵎⵢⴰⴳⴻⵔ-ⴰ ⴰⵢ ⴷ-ⵢⴻⵍⵍⴰⵏ ⴷⴻⴳ ⵓⵖⴻⵔⴱⴰⵣ ⵓⵏⵏⵉⴳ ⴰⴳⵔⴰⵖⵍⴰⵏ ⵙ ⵓⵜⵜⴻⴽⴽⵉ ⵏ ⵢⵉⵡⴻⵏ ⵏ ⵓⵖⵎⵉⵙ ⴰⵖⴻⵍⵏⴰⵡ ⵢⴻⵎⵎⵓⵣⵣⴳⴻⵏ ⴷⴻⴳ ⵜⵎⴻⵔⵔⵉⵜ, ⵙⴰⵉⴷ ⴱⵧⵓⴽⵀⴻⵍⵉⴼⴰ (ⵢⴻⵍⵍⴰⵏ ⴷ ⴰⵏⴻⵖⵍⴰⴼ ⴰⵇⴱⵓⵔ ⵏ ⵜⵎⴻⵔⵔⵉⵜ ⵢⴻⵔⵏⴰ ⵢⴻⵅⴷⴻⵎ ⴷ ⴰⵎⴰⵣⵣⴰⵢ ⴰⴳⵔⴰⵖⵍⴰⵏ ⴷⴻⴳ ⵜⵎⴻⵔⵔⵉⵜ ⴳⴰⵔ 1975 ⴷ 2014), ⵢⴻⵏⵏⴰ-ⴷ ⴷ ⴰⴽⴽⴻⵏ ⴰⵙⴷⵓⵇⵇⴻⵙ ⵏ ⵜⵎⴻⵔⵔⵉⵜ ⵢⴻⴱⴷⴰ-ⴷ ⴷⴻⴳ 2008 ⵙ ⵓⵀⴻⵢⵢⵉ ⵏ ⵓⵣⴻⵏⵣⵉⵖ (ⵎⵓⵅⴰⵟⵟⴰⵟ) ⵏ ⵓⵡⴻⵍⵍⴻⵀ ⵏ ⵓⵀⴻⵢⵢⵉ ⵏ ⵜⵎⴻⵔⵔⵉⵜ (ⵙⴷⴰⵜ) ⴰⵔⵎⴰ ⴷ 2030.

ⴰⵙⴷⵓⵇⵇⴻⵙ ⵏ ⵜⵎⴻⵔⵔⵉⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ, ⵢⴻⵙⵙⴻⴼⴽ ⴰⴷ ⴷ-ⵢⵉⵍⵉ ⵙ « ⵍⴻⴱⵖⵉ, ⵍⵇⴰⵏⴰⵄⴰ ⴷ ⵜⵣⴻⵎⵎⴰⵔ ⵏ ⵜⵉⴷⴻⵜ », ⵎⴰⵛⴰ ⵢⴻⵃⵡⴰⴵ ⴷⴰⵖ « ⴰⵙⵙⴻⵍⵀⵓ ⵏ ⵢⵉⵎⴻⵥⵍⴰ (ⵅⴰⴷⴰⵎⴰⵜ) ⵏ ⵓⵎⴻⵙⵏⵉ (ⵏⴰⵇⵍ), ⴰⵜⵜⴻⴽⴽⵉ ⵏ ⵜⵎⴰⵣⴷⴰⵢⵉⵏ ⴷⴻⴳ ⵓⵙⵙⴻⴼⵄⴻⵍ ⵏ ⵜⵙⴻⵔⵜⵉⵜ ⵏ ⵜⵎⴻⵔⵔⵉⵜ » ⴰⵢ ⴷ-ⵉⵀⴻⵢⵢⴰ ⵓⵖⵍⵉⴼ ⵏ ⵜⵎⴻⵔⵔⵉⵜ, ⴰⵎ ⵡⴰⴽⴽⴻⵏ ⴰⵢ ⵢⴻⵙⵙⴻⴼⴽ ⴷⴰⵖ ⴰⴷ ⴷ-ⵢⵉⵍⵉ ⵓⵙⵙⵉⵍⴻⵖ ⵏ ⵢⵉⵅⴻⴷⴷⴰⵎⴻⵏ.

ⵎⴰ ⴷ ⴰⴱⴷⴻⵍⵍⴰⵜⵉⴼ ⵣⴰⵉⴷ, ⴰⵏⴻⵎⵀⴰⵍ ⵏ ⵓⵖⴻⵔⴱⴰⵣ ⴰⵖⴻⵍⵏⴰⵡ ⵓⵏⵏⵉⴳ ⵏ ⵜⵎⴻⵔⵔⵉⵜ (ⴷⴻⴳ ⵓⵙⴻⵏⵙⵓ ⵏ ⵓⵡⵔⴰⵙⵉ, ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ), ⵢⴻⵏⵏⴰ-ⴷ ⴷ ⴰⴽⴽⴻⵏ ⴰⵙⴷⵓⵇⵇⴻⵙ ⵏ ⵜⵎⴻⵔⵔⵉⵜ ⴷⴻⴳ ⵍⴻⵣⵣⴰⵢⴻⵔ ⵢⴻⵙⵙⴻⴼⴽ ⴰⴷ ⴷ-ⵉⴱⴰⵏ, ⵢⴻⵔⵏⴰ ⵢⴻⵃⵡⴰⴵ ⴰⴳⴰⴼⵓⴷ (ⵃⴰⴼⵉⵣ) ⴷ ⴰⵎⴻⵇⵔⴰⵏ, ⵜⴰⵖⵡⴰⵍⵜ (ⵉⵜⵜⵉⵚⴰⵍ) ⵉⴱⴰⵏⴻⵏ ⴷ ⵓⵏⴻⴳⵔⴰⵡ ⵏ ⵓⵙⵙⵉⵍⴻⵖ ⴰⴷ ⵉⵏⴻⴼⵄⴻⵏ ⴰⵃⵔⵉⵛ-ⴰ.