Asebter amenzawi

Asarag ɣef Uneẓruf Utrim deg Stockholm

STKhLM – Yella-d yiwen n usarag ɣef « Uneẓruf Utrim deg ukatar n lqanun agraɣlan », deg tesdawit n Stockholm, yerna tettekka deg-s yiwet n tmagla (wafd) taṣeḥrawit d waṭas n wudmawen yettwassnen ama deg tsertit, ama deg yimenɣi ɣef yizerfan n umdan, ɣef wakken ay d-tenna, ass n laṛebɛa, Tnegga n Tɣemsa Taṣeḥrawit (SPS).

Wid yettekkan deg usarag-a ssukken-d tiṭ s telqey ɣef umezruy n taluft n Uneẓruf Utrim d temsal-nnes n lqanun seg 1966 ar ass-a, yerna qurnen aya ɣer ccuruḍ n lqanun agraɣlan ay d-yennan d akken tamsalt n Uneẓruf Utrim d tamsalt n tukksa n ussehres (istiɛmar), d akal yettwaḍḍfen war lqanun yerna aɣref aṣeḥrawi yettalas ad iɣellet azref-nnes n ugguccelman (taqrir maṣir).

I lmend n waya, yenna-d umaru amatu aqbur n tɣawsiwin n lqanun deg Yiɣlanen Yeddukklen, Hans Corell, d akken deg 2002, yefka i Yiɣlanen Yeddukklen yiwen n ṛṛay n uciweṛ yerzan leɛqudat ay testenya Meṛṛuk d teṛmisin (carikat) tibeṛṛaniyin i unadi ɣef teɣbula yellan deg wakal aṣeḥrawi yettwaḍḍfen, yerna yenna-d, deg ṛṛay-nnes, d akken leɛqudat-nni ffɣen i lqanun yerna llan-d d arkaḍ i lqanun agraɣlan.

Asarag-a yettekka deg-s daɣ Upṛufisur n lqanun agraɣlan Powell Woorank d Upṛufisur Mahmoudi, yerna yella-d deg Wammas Agraɣlan n Stockholm i Lqanun d Teɣdemt s umɛawen d Tseqqamut Tagraɣlant n Yimazzayen n Lqanun d Yimḥiddan n Yizerfan Iɣarimen, ɣef wakken ay d-tenna Tnegga (wakala).