ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵣⴰⵍ ⵏ 40.000 ⵏ ⵜⴽⴰⵔⴹⵉⵡⵉⵏ ⵜⵉⵖⴻⵍⵏⴰⵡⵉⵏ ⵜⵉⴱⵢⵓⵎⵉⵜⵔⵉⵢⵉⵏ ⴰⴷ ⵢⴻⵜⵜⵡⴰⴼⵔⴰⵇⴻⵏ ⴷⴻⴳ ⵡⴰⵙⵙ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – « ⴰⵣⴰⵍ ⵏ 40.000 ⵏ ⵜⴽⴰⵔⴹⵉⵡⵉⵏ ⵏ ⵜⵎⴰⴳⵉⵜ ⵜⵉⴱⵢⵓⵎⵉⵜⵔⵉⵢⵉⵏ ⴰⴷ ⵢⴻⵜⵜⵡⴰⴼⵔⴰⵇⴻⵏ ⴷⴻⴳ ⵡⴰⵙⵙ ⴷⴻⴳ 20.000 ⵏ ⵢⵉⵎⵓⴽⴰⵏ ⴰⵢ ⵙⵙⴻⴼⵔⴰⵏ ⴰⴷ ⴷ-ⵉⵍⵉⵏ ⵉ ⵡⴰⵏⴻⵛⵜ-ⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵎⵀⴰⵍ (ⵎⵓⴷⵉⵔ) ⵏ ⵡⴰⵎⵎⴰⵙ ⴰⵖⴻⵍⵏⴰⵡ ⵏ ⵢⵉⵣⵡⴰⵍ ⴷ ⵜⴻⴼⵜⴰⵔⵉⵏ ⵢⴻⵜⵜⵡⴰⵙⵖⴻⵍⵙⴻⵏ ⴷⴻⴳ ⵓⵖⵍⵉⴼ ⵏ ⵜⵖⴰⵡⵙⵉⵡⵉⵏ ⵏ ⴷⴰⵅⴻⵍ, ⵀⴰⵛⴻⵏⴻ ⴱⵧⵓⴰⵍⴻⵎ.

ⴷⴻⴳ ⵢⵉⵡⴻⵜ ⵏ ⵜⵙⴻⵖⵔⵓⵜ (ⵜⴰⵚⵔⵉⵃ) ⵉ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ ⴷⴻⴳ ⵢⵉⵊⵉⴼⴻⵕ ⵏ ⵓⴼⵔⴰⵇ ⵏ ⵜⴽⴰⵔⴹⵉⵡⵉⵏ ⵏ ⵜⵎⴰⴳⵉⵜ ⵜⵉⴱⵢⵓⵎⵉⵜⵔⵉⵢⵉⵏ ⵜⵉⵎⴻⵣⵡⵓⵔⴰ, ⵢⴻⵏⵏⴰ-ⴷ ⵎⴰⵙⵙ ⵀⴰⵛⴻⵏⴻ ⴱⵧⵓⴰⵍⴻⵎ ⴷ ⴰⴽⴽⴻⵏ « ⵙ ⵜⵜⴻⵊⵕⵉⴱⴰ ⴰⵢ ⴷ-ⵢⴻⵜⵜⵡⴰⴽⴻⵙⴱⴻⵏ ⵙⴻⴳ ⵢⵉⵒⴰⵙⵒⵓⵕⴻⵏ ⵉⴱⵢⵓⵎⵉⵜⵔⵉⵢⴻⵏ, ⵜⴰⵎⴻⵀⵍⴰ ⵜⴻⵣⵎⴻⵔ ⴰⴷ ⵜⴻⵙⵙⴻⵎⵖⴻⵔ ⵜⴰⵣⵎⴻⵔⵜ-ⵏⵏⴻⵙ ⵏ ⵓⴼⴰⵔⴻⵙ (ⵉⵏⵜⴰⴵ) ⴷⴻⴳ ⵡⴰⵎⵎⴰⵙⴻⵏ ⵉⵖⴻⵍⵏⴰⵡⴻⵏ ⵏ ⵢⵉⵣⵡⴰⵍ ⴷ ⵜⴻⴼⵜⴰⵔⵉⵏ ⵢⴻⵜⵜⵡⴰⵙⵖⴻⵍⵙⴻⵏ ⵢⴻⵔⵏⴰ ⴰⴷ ⵢⴰⵡⴻⴹ ⵡⴰⵢⴰ ⵖⴻⵔ 40.000 ⵏ ⵜⴽⴰⵔⴹⵉⵡⵉⵏ ⴷⴻⴳ ⵡⴰⵙⵙ ».

ⵜⵉⵎⴻⵔⵏⵉⵡⵜ ⵏ ⵓⴼⴰⵔⴻⵙ ⴰⴷ ⴷ-ⵜⵉⵍⵉ « ⵛⵡⵉⵟ, ⵛⵡⵉⵟ », ⵢⴻⵔⵏⴰ ⴰⴷ ⴷ-ⵢⵉⵍⵉ ⵡⴰⵢⴰ ⵙ ⵓⵅⴻⴷⴷⵉⵎ ⵏ ⵜⴻⵖⵍⴰⵎⵉⵏ ⴰⴷ ⵢⴻⵜⵜⴻⵎⵙⴻⴹⴼⴰⵔⴻⵏ ⴷⴻⴳ ⵡⴰⵎⵎⴰⵙⴻⵏ ⵏ ⵍⴻⵣⵣⴰⵢⴻⵔ ⴷ ⵍⴻⵖⵡⴰⵟ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⵏⵏⵉⴳ ⵡⴰⵢⴰ, ⵢⴻⵏⵏⴰ-ⴷ ⵓⵎⴰⵙⴰⵢ-ⴰ (ⵎⴰⵙ’ⵓⵍ) ⴷ ⴰⴽⴽⴻⵏ ⵜⴰⴽⴰⵔⴹⴰ-ⴰ ⵏ ⵜⵎⴰⴳⵉⵜ ⴰⴷ ⵜⴻⴹⴹⴻⴼ, ⴰⵎ ⵓⵒⴰⵙⵒⵓⵕ ⴰⴱⵢⵓⵎⵉⵜⵔⵉ, 5 ⵏ ⵢⵉⵙⴻⴳⴳⴰⵙⴻⵏ ⵉ ⵢⵉⵖⴻⵔⵎⴰⵏⴻⵏ ⵏ ⴷⴷⴰⵡ 19 ⵏ ⵢⵉⵙⴻⴳⴳⴰⵙⴻⵏ, ⴷ 10 ⵏ ⵢⵉⵙⴻⴳⴳⴰⵙⴻⵏ ⵉ ⵢⵉⵖⴻⵔⵎⴰⵏⴻⵏ ⵏ ⵏⵏⵉⴳ 19 ⵏ ⵢⵉⵙⴻⴳⴳⴰⵙⴻⵏ.

« ⵙ ⵜⴽⴰⵔⴹⴰ ⵏ ⵜⵎⴰⴳⵉⵜ ⵜⴰⴱⵢⵓⵎⵉⵜⵔⵉⵜ, ⴰⴷ ⵢⵓⵖⴰⵍ ⵓⵖⴻⵔⵎⴰⵏ (ⵎⵓⵡⴰⵟⵉⵏ) ⵓⵔ ⵢⴻⵃⵡⴰⴵ ⴰⵔⴰ ⵜⵉⴼⵜⴰⵔⵉⵏ ⵜⵉⴼⴻⴽⴽⴰⵏⵉⵏ, ⵢⴻⵔⵏⴰ ⴰⴷ ⵜⴻⵙⵙⵉⴼⵙⴻⵙ ⴰⵎⵎⴻⵕⴽⵉ ⴷⴻⴳ ⵜⴻⵙⴷⴰⵡⵢⵉⵏ ⴷ ⵢⵉⵖⴻⵔⴱⴰⵣⴻⵏ, ⴰⵎ ⵡⴰⴽⴽⴻⵏ ⴰⴷ ⵜⴻⵙⵙⵉⴼⵙⴻⵙ ⴰⵎⵎⴻⵕⴽⵉ ⵖⴻⵔ ⵜⵖⴻⵍⵍⵉⵙⵜ ⵜⴰⵏⵎⴻⵜⵜⵉⵜ (ⵉⴵⵜⵉⵎⴰⵄⵉ) ⵢⴻⵔⵏⴰ ⴰⴷ ⵜⴻⵙⵙⴻⵏⵇⴻⵙ ⵍⵃⴻⵕⵙ ⵖⴻⴼ ⵢⵉⵎⴻⵥⵍⴰ ⵏ ⵡⴰⴷⴷⴰⴷ ⴰⵖⴰⵔⵉⵎ, ⵉⵎⵉ ⴷ ⵏⴻⵜⵜⴰⵜ ⴰⴷ ⵢⴰⵡⵉⵏ ⴰⵎⴽⴰⵏ ⵏ ⵜⴻⴷⵍⵉⵙⵜ ⵏ ⵜⵡⴰⵛⵓⵍⵜ ».

ⵜⴰⴽⴰⵔⴹⴰ-ⴰ ⴰⴷ ⵜⴻⵙⵙⴻⵖⵍⴻⵙ ⵜⵉⵍⵖⴰ ⵜⵓⴷⵎⴰⵡⴰⵏⵉⵏ ⵏ ⵓⵖⴻⵔⵎⴰⵏ, ⴰⴷ ⵜⴻⵃⴱⴻⵙ ⴰⴷⵖⴰⵍ ⵏ ⵍⴻⴽⵡⴰⵖⴻⴹ ⵢⴻⵔⵏⴰ ⴰⴷ ⵜⵓⵖⴰⵍ ⴰⴷ ⵜⴻⵜⵜⵡⴰⵙⵙⴻⵇⴷⴰⵛ ⴷⴻⴳ ⵓⵎⵓⵔ ⵏ ⵓⵒⴰⵙⵒⵓⵕ ⵎⴰ ⵜⴻⵙⵜⴻⵏⵢⴰ ⵍⴻⵣⵣⴰⵢⴻⵔ ⴰⵎⵜⴰⵡⴰ (ⵉⵜⵜⵉⴼⴰⵇ) ⵉ ⵍⵎⴻⵏⴷ ⵏ ⵡⴰⵢⴰ ⴷ ⴽⵔⴰ ⵏ ⵜⵎⵓⵔⵜ ⵏⵉⴹⴻⵏ.