ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵉⴼⴻⵔⴽⵉ: 557 ⵏ ⵢⵉⵇⴻⵏⵟⴰⵔⴻⵏ ⵏ ⵢⵉⴼⴻⵔⴽⵉ ⴷⴻⴳ 2016 ⴷⴻⴳ ⵡⴻⵀⵕⴰⵏ

ⵡⴻⵀⵕⴰⵏ – ⵜⴻⵏⵏⴰ-ⴷ ⵜⴰⴳⴳⴰⵥⵜ ⵏ ⵜⵥⴻⴳⵡⴰ ⴷⴰⴽⴽⴻⵏ ⵍⵖⴻⵍⵍⴰ ⵏ ⵢⵉⴼⴻⵔⴽⵉ ⴰⴷ ⵜⴰⵡⴻⴹ ⵖⴻⵔ 557 ⵏ ⵢⵉⵇⴻⵏⵟⴰⵔⴻⵏ ⴰⵙⴻⴳⴳⴰⵙ-ⴰ ⴷⴻⴳ ⵜⴻⵥⴳⵉ ⵏ ⵎⵙⵉⵍⴰ, ⴷⴻⴳ ⵜⴷⴰⵢⵕⴰ ⵏ ⴱⵓⵜⵍⵉⵍⵉⵙ (ⴷⴻⴳ ⵓⵜⴰⵔⴰⵎ ⵏ ⵡⴻⵀⵕⴰⵏ).

ⴰⵙⴻⴳⴳⴰⵙ ⵢⴻⵣⵔⵉⵏ, ⵍⵖⴻⵍⵍⴰ ⵜⴻⵡⵡⴻⴹ ⵖⴻⵔ 554 ⵏ ⵢⵉⵇⴻⵏⵟⴰⵔⴻⵏ ⵏ ⵢⵉⴼⴻⵔⴽⵉ ⵢⴻⵔⵏⴰ ⴰⵢⴰ ⵉⵄⴻⴷⴷⴰ ⵉ ⵡⴰⵢⴻⵏ ⴰⵢ ⵜⴻⵙⵙⴻⴼⵔⴰ ⵜⴰⴳⴳⴰⵥⵜ ⵏ ⵜⵥⴻⴳⵡⴰ ⴰⴷ ⵜ-ⵉⴷ-ⵜⴻⴽⴽⴻⵙ, ⵉⵎⵉ ⴰⵢ ⵜⴻⵙⵙⴻⴼⵔⴰ, ⵉⵎⵉⵔ-ⵏⵏⵉ, ⴰⴷ ⵜⴰⵡⴻⴹ ⵍⵖⴻⵍⵍⴰ ⵖⴻⵔ 302 ⵏ ⵢⵉⵇⴻⵏⵟⴰⵔⴻⵏ ⴷⴻⴳ ⵜⴻⵎⵏⴰⴹⵜ ⵏ ⵓⵖⴻⵍⵍⴻⵜ ⵏ 1.068 ⵏ ⵢⵉⵇⴻⵟⵟⴰⵔⴻⵏ ⵏ ⵡⴰⴽⴰⵍ.

ⵉⴳⴳⵉ (ⴰⵙⴻⴽⵍⵓ ⴰⵢ ⴷ-ⵢⴻⵜⵜⴰⴽⴼⴻⵏ ⵉⴼⴻⵔⴽⵉ) ⵢⴻⴹⴹⴻⴼ 5% ⵙⴻⴳ ⵜⵊⵓⵎⵎⴰ ⵏ ⵜⴻⵥⴳⵉ-ⵏⵏⵉ ⵏ 41.302 ⵏ ⵢⵉⵇⴻⵟⵟⴰⵔⴻⵏ ⵢⴻⵍⵍⴰⵏ ⴷⴻⴳ ⵓⵜⴰⵔⴰⵎ (ⵖⴰⵔⴱ) ⵏ ⵡⴻⵀⵕⴰⵏ.

ⵜⴰⵖⴰⵔⴰ ⵏ ⵢⵉⴼⴻⵔⴽⵉ « ⵜⴻⵍⵍⴰ-ⴷ ⵜⴻⵍⵀⴰ » ⵉⵍⵉⵏⴷⵉ, ⵉⵎⵉ ⴰⵢ ⴷ-ⵢⴻⵍⵍⴰ ⵓⵏⴻⵣⵡⵉ (ⵎⴰⵏⴰⵅ) ⵢⴻⵍⵀⴰⵏ, ⴰⵎ ⵡⴰⴽⴽⴻⵏ ⴰⵢ ⵜⵜⵡⴰⵙⵇⴻⴷⵛⴻⵏ ⵜⵜⴰⵡⵉⵍⴰⵜ ⵉⵡⴰⵜⴰⵏ ⵉ ⵓⴹⵎⴰⵏ ⵏ ⵔⵔⴱⴻⵃ ⵏ ⵜⵃⴻⵎⵍⴰ-ⴰ ⵏ ⵓⵖⴻⵍⵍⴻⵜ ⴰⵢ ⴷ-ⵢⴻⵍⵍⴰⵏ ⴷⴷⴰⵡ ⵓⵙⵉⴳⴳⵉ ⵏ ⵜⴻⵕⵎⵉⵙⵜ ⵜⴰⵏⴰⴳⴷⵓⴷⵜ ⵏ ⵜⵉⵊⵊⴻⵏⵢⴻⵕⵜ ⵏ ⵓⴳⴰⵎⴰ, « ⴹⴰⵀⵔⴰ », ⴰⵢ ⴷ-ⵢⴻⵍⵀⴰⵏ ⵙ ⵓⵙⵙⴻⵏⵣⵉ ⵏ ⵢⵉⴼⴻⵔⴽⵉ ⵙ ⵡⵓⵔⵎⵉ (ⵎⵓⵣⴰⵢⴰⴷⴰ), ⵖⴻⴼ ⵍⴻⵃⵙⴰⴱ ⵏ ⵜⴰⴳⴳⴰⵥⵜ ⵏ ⵜⵥⴻⴳⵡⴰ.

20% ⵙⴻⴳ ⵙⵙⵓⵎⴰ ⵏ ⵢⵉⴼⴻⵔⴽⵉ ⴰⵢ ⵢⴻⵜⵜⵏⵓⵣⵓⵏ ⵙ ⵡⵓⵔⵎⵉ ⵢⴻⵜⵜⴰⴷⴻⴼ ⵖⴻⵔ ⵍⵅⴻⵣⵏⴰ ⵏ ⵜⵎⵓⵔⵜ ⵙ ⵓⵇⴰⴷⴻⵔ ⵏ ⵓⵎⵜⴰⵡⴰ (ⵉⵜⵜⵉⴼⴰⵇ) ⵢⴻⵜⵜⵡⴰⵙⵜⴻⵏⵢⴰⵏ ⴳⴰⵔ ⵜⵎⴻⵀⵍⴰ ⵜⴰⵎⴰⵜⵓⵜ ⴷ ⵜⴻⵕⵎⵉⵙⵜ ⵏ ⵜⵉⵊⵊⴻⵏⵢⴻⵕⵜ ⵏ ⵓⴳⴰⵎⴰ.

ⵉⴼⴻⵔⴽⵉ ⵙⵙⴻⵇⴷⴰⵛⴻⵏ-ⵜ ⴷⴻⴳ ⵜⴻⵎⴳⵓⵔⵉ (ⵚⵉⵏⴰⵄⴰ) ⵏ ⵓⵙⵙⴻⵍⴽⴻⵜ. ⵜⵉⵥⴳⵉ ⵏ ⵎⵙⵉⵍⴰ ⴷ ⵏⴻⵜⵜⴰⵜ ⴰⵢ ⴷ ⵜⵉⵥⴳⵉ ⵜⴰⵡⵃⵉⴷⵜ ⵏ ⵜⵡⵉⵍⴰⵢⵜ ⵏ ⵡⴻⵀⵕⴰⵏ ⴰⵢⴷⴻⴳ ⵢⴻⵍⵍⴰ ⵢⵉⴳⴳⵉ ⵢⴻⵜⵜⵡⴰⵖⴻⵍⵍⴰⵜⴻⵏ, ⵢⴻⵔⵏⴰ ⵉⵎⴻⵖⵖⵉ-ⴷ ⴷⵉⵏ ⵉⵎⵉ ⵜⵉⵥⴳⵉ-ⵏⵏⵉ ⵜⵓⵙⴰ-ⴷ ⴷⴻⴳ ⵓⵎⴽⴰⵏ ⵄⵍⴰⵢⴻⵏ ⵢⴻⵔⵏⴰ ⵙⴻⵎⵎⴻⴹ.