Asebter amenzawi

Lemcawṛat n Surya: tewweḍ tenmegla ɣer Geneve

GENEVE – Tewweḍ tmagla (wafd) n tenmegla (muɛaraḍa) tasurit ass n ssebt tameddit ɣer Geneve, anda ad d-ilint lemcawṛat tirusridin n talwit ddaw leɛnaya n Yiɣlanen Yeddukklen, d acu kan, teggez tmagla-a ad tejbed iman-nnes uqbel ma bdant-d yagi lemcawṛat.

Deg wakud aydeg imezdaɣen n temnaḍin yenḍerren n Surya simal la trennu tweɛɛeṛ tegnit fell-asen, tamagla n Useqqamu Unnig n Lemcawṛat, ay d-sbedden yinmeglayen d yimsellḥen isuriyen deg Dujembeṛ, tufeg seg Riyaḍ ɣer Sswiw, deffir ma teqqim tettemxemmam 4 n wussan ma ad tettekki deg lemcawṛat-a neɣ uhu.

Deg tazwara, yenna-d Useqqamu Unnig n Lemcawṛat d akken ur yettekka ara deg-sent arma llan-d kra n ccuruḍ am tukksa n yisutal (ḥiṣarat) ɣef temdinin n tenmegla, aḥbas n tberrawin (qaṣf) d userreḥ n yimeḥbas.

Armi ay d-yella uḥṛas sɣur umɣiwan (muǧtamaɛ) agraɣlan, ladɣa sɣur Yiwanaken Yeddukklen, ay teqbel useqqamu-a ad yettekki deg lemcawṛat-a, deffir ma ttunefkent-as-d kra n « ḍḍmanat » timuta, war ma iban-d waya deg unrar. Ɣef waya, Riad Hijab, asemyaddas (munassiq) n tmagla n Useqqamu-a, yenna-d d akken tanmegla ur tettsemmiḥ ara deg ccuruḍ-nnes.

Aseqqamu Unnig n Lemcawṛat « ad yejbed taɣlamt-nnes seg lemcawṛat lemmer Tuddsa n Yiɣlanen Yeddukklen d tnezmarin timaḍlanin ur ssawaḍent ara ad ḥebsent irkaḍen-a », ɣef wakken ay d-yerna.

Lemcawṛat n Geneve bdant-d ass n ljemɛa tameddit s yiwet n « temlilit n ussejwed » gar umazun n Yiɣlanen Yeddukklen i Surya, Staffan de Mistura, d yigensasen (mumattilin) n unabaḍ (ḥukuma) asuri.

Lemcawṛat-a ssefran ad qqiment 6 n wayyuren yerna yessefk ad d-ilint s ubrid arusrid (ɣar mubacir) aydeg timagliwin ad ilint deg texxamin yemgerraden, yerna d imazunen ad yetteddun gar-asent.