Asebter amenzawi
Lemɛawna n usfulleḥ n umɛic n lmal i usnerni n lɣella n ukeffay
LEZZAYER TAMANEɣT – Yettwassebded-d ttawil i uɛawen n usfulleḥ n umɛic n lmal i usselhu n lɣella n tkessawt d tmerniwt n lɣella n ukeffay i lmend n ussenqes n waǧaw n uɣebbar n ukeffay, ɣef wakken ay d-nnan kra n yimasayen (mas’ulin) n uḥric-a.
Lexṣaṣ ameqran n umɛic n lmal d netta ay d aɛewwiq meɣɣren ay d-yettmagar uḥric n ukeffay deg Lezzayer, yerna d aya ay yeǧǧan iduba inagduden (suluṭat ɛumumiyya) ad d-sbeddent ttawil-a i uɛawen n usfulleḥ n umɛic n lmal, ɣef wakken ay d-tenna Massa Sabah Yousri, tagensast (mumattila) n Tmehla n Uḥkam d Usnefli n Ufares Akerrazan ɣer uɣlif n tkerrazt.
Massa Yousri tenna-d aya deg yiwet n tnemselt (warca) taɣelnawt ɣef usnefli (tanmiya) n usfulleḥ n umɛic n lmal deg ukatar n wahil n uḥric n ukeffay, d tanemselt aydeg ttekkan yimazzagen n usfulleḥ n yimendiyen d umɛic n lmal d yikerrazen, akken ad ssiwlen ɣef ttawil-a n uɛawen.
« Aɛawen-a yerza asseqdec d tiɣin n zzerriɛa n umɛic n lmal », d ufares (intaǧ) n umɛic-a, ɣef wakken ay d-tenna Massa Yousri.
Deg wayen yerzan zzerriɛa n umɛic n lmal (zzerriɛa n yiɛeqqayen imeẓyanen d yimeqranen, tin n yimɣan ayt txeddacin d yiḥlulen yettwasseqdacen d amɛic n lmal, atg.), lemɛawna n uwanak (dawla) tezmer ad taweḍ arma d 50% seg ssuma n twelha (siɛr marǧaɛi).
« S kra n ukerraz ad yesfullḥen deg umɛic n lmal yettalas ad as-d-tettunefk lemɛawna-a », ɣef wakken ay d-tenna, am wakken ay d-twekked d akken ccuruḍ n usfaydi seg lemɛawna-a yessefra-ten-id yiwen n uɣtas (qarar) aɣlifan ay yettwastenyan seg melmi kan, yerna d Asenduq Aɣelnaw n Usnefli Akerrazan (FNDA) ad yefken lemɛawna-a.
