ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵍⴻⵎⵄⴰⵡⵏⴰ ⵏ ⵓⵙⴼⵓⵍⵍⴻⵃ ⵏ ⵓⵎⵄⵉⵛ ⵏ ⵍⵎⴰⵍ ⵉ ⵓⵙⵏⴻⵔⵏⵉ ⵏ ⵍⵖⴻⵍⵍⴰ ⵏ ⵓⴽⴻⴼⴼⴰⵢ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵜⵜⵡⴰⵙⵙⴻⴱⴷⴻⴷ-ⴷ ⵜⵜⴰⵡⵉⵍ ⵉ ⵓⵄⴰⵡⴻⵏ ⵏ ⵓⵙⴼⵓⵍⵍⴻⵃ ⵏ ⵓⵎⵄⵉⵛ ⵏ ⵍⵎⴰⵍ ⵉ ⵓⵙⵙⴻⵍⵀⵓ ⵏ ⵍⵖⴻⵍⵍⴰ ⵏ ⵜⴽⴻⵙⵙⴰⵡⵜ ⴷ ⵜⵎⴻⵔⵏⵉⵡⵜ ⵏ ⵍⵖⴻⵍⵍⴰ ⵏ ⵓⴽⴻⴼⴼⴰⵢ ⵉ ⵍⵎⴻⵏⴷ ⵏ ⵓⵙⵙⴻⵏⵇⴻⵙ ⵏ ⵡⴰⴵⴰⵡ ⵏ ⵓⵖⴻⴱⴱⴰⵔ ⵏ ⵓⴽⴻⴼⴼⴰⵢ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵏⵏⴰⵏ ⴽⵔⴰ ⵏ ⵢⵉⵎⴰⵙⴰⵢⴻⵏ (ⵎⴰⵙ’ⵓⵍⵉⵏ) ⵏ ⵓⵃⵔⵉⵛ-ⴰ.

ⵍⴻⵅⵚⴰⵚ ⴰⵎⴻⵇⵔⴰⵏ ⵏ ⵓⵎⵄⵉⵛ ⵏ ⵍⵎⴰⵍ ⴷ ⵏⴻⵜⵜⴰ ⴰⵢ ⴷ ⴰⵄⴻⵡⵡⵉⵇ ⵎⴻⵖⵖⵔⴻⵏ ⴰⵢ ⴷ-ⵢⴻⵜⵜⵎⴰⴳⴰⵔ ⵓⵃⵔⵉⵛ ⵏ ⵓⴽⴻⴼⴼⴰⵢ ⴷⴻⴳ ⵍⴻⵣⵣⴰⵢⴻⵔ, ⵢⴻⵔⵏⴰ ⴷ ⴰⵢⴰ ⴰⵢ ⵢⴻⴵⴵⴰⵏ ⵉⴷⵓⴱⴰ ⵉⵏⴰⴳⴷⵓⴷⴻⵏ (ⵙⵓⵍⵓⵟⴰⵜ ⵄⵓⵎⵓⵎⵉⵢⵢⴰ) ⴰⴷ ⴷ-ⵙⴱⴻⴷⴷⴻⵏⵜ ⵜⵜⴰⵡⵉⵍ-ⴰ ⵉ ⵓⵄⴰⵡⴻⵏ ⵏ ⵓⵙⴼⵓⵍⵍⴻⵃ ⵏ ⵓⵎⵄⵉⵛ ⵏ ⵍⵎⴰⵍ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵎⴰⵙⵙⴰ ⵙⴰⴱⴰⵀ ⵢⵧⵓⵙⵔⵉ, ⵜⴰⴳⴻⵏⵙⴰⵙⵜ (ⵎⵓⵎⴰⵜⵜⵉⵍⴰ) ⵏ ⵜⵎⴻⵀⵍⴰ ⵏ ⵓⵃⴽⴰⵎ ⴷ ⵓⵙⵏⴻⴼⵍⵉ ⵏ ⵓⴼⴰⵔⴻⵙ ⴰⴽⴻⵔⵔⴰⵣⴰⵏ ⵖⴻⵔ ⵓⵖⵍⵉⴼ ⵏ ⵜⴽⴻⵔⵔⴰⵣⵜ.

ⵎⴰⵙⵙⴰ ⵢⵧⵓⵙⵔⵉ ⵜⴻⵏⵏⴰ-ⴷ ⴰⵢⴰ ⴷⴻⴳ ⵢⵉⵡⴻⵜ ⵏ ⵜⵏⴻⵎⵙⴻⵍⵜ (ⵡⴰⵔⵛⴰ) ⵜⴰⵖⴻⵍⵏⴰⵡⵜ ⵖⴻⴼ ⵓⵙⵏⴻⴼⵍⵉ (ⵜⴰⵏⵎⵉⵢⴰ) ⵏ ⵓⵙⴼⵓⵍⵍⴻⵃ ⵏ ⵓⵎⵄⵉⵛ ⵏ ⵍⵎⴰⵍ ⴷⴻⴳ ⵓⴽⴰⵜⴰⵔ ⵏ ⵡⴰⵀⵉⵍ ⵏ ⵓⵃⵔⵉⵛ ⵏ ⵓⴽⴻⴼⴼⴰⵢ, ⴷ ⵜⴰⵏⴻⵎⵙⴻⵍⵜ ⴰⵢⴷⴻⴳ ⵜⵜⴻⴽⴽⴰⵏ ⵢⵉⵎⴰⵣⵣⴰⴳⴻⵏ ⵏ ⵓⵙⴼⵓⵍⵍⴻⵃ ⵏ ⵢⵉⵎⴻⵏⴷⵉⵢⴻⵏ ⴷ ⵓⵎⵄⵉⵛ ⵏ ⵍⵎⴰⵍ ⴷ ⵢⵉⴽⴻⵔⵔⴰⵣⴻⵏ, ⴰⴽⴽⴻⵏ ⴰⴷ ⵙⵙⵉⵡⵍⴻⵏ ⵖⴻⴼ ⵜⵜⴰⵡⵉⵍ-ⴰ ⵏ ⵓⵄⴰⵡⴻⵏ.

« ⴰⵄⴰⵡⴻⵏ-ⴰ ⵢⴻⵔⵣⴰ ⴰⵙⵙⴻⵇⴷⴻⵛ ⴷ ⵜⵉⵖⵉⵏ ⵏ ⵣⵣⴻⵔⵔⵉⵄⴰ ⵏ ⵓⵎⵄⵉⵛ ⵏ ⵍⵎⴰⵍ », ⴷ ⵓⴼⴰⵔⴻⵙ (ⵉⵏⵜⴰⴵ) ⵏ ⵓⵎⵄⵉⵛ-ⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵎⴰⵙⵙⴰ ⵢⵧⵓⵙⵔⵉ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵣⵣⴻⵔⵔⵉⵄⴰ ⵏ ⵓⵎⵄⵉⵛ ⵏ ⵍⵎⴰⵍ (ⵣⵣⴻⵔⵔⵉⵄⴰ ⵏ ⵢⵉⵄⴻⵇⵇⴰⵢⴻⵏ ⵉⵎⴻⵥⵢⴰⵏⴻⵏ ⴷ ⵢⵉⵎⴻⵇⵔⴰⵏⴻⵏ, ⵜⵉⵏ ⵏ ⵢⵉⵎⵖⴰⵏ ⴰⵢⵜ ⵜⵅⴻⴷⴷⴰⵛⵉⵏ ⴷ ⵢⵉⵃⵍⵓⵍⴻⵏ ⵢⴻⵜⵜⵡⴰⵙⵙⴻⵇⴷⴰⵛⴻⵏ ⴷ ⴰⵎⵄⵉⵛ ⵏ ⵍⵎⴰⵍ, ⴰⵜⴳ.), ⵍⴻⵎⵄⴰⵡⵏⴰ ⵏ ⵓⵡⴰⵏⴰⴽ (ⴷⴰⵡⵍⴰ) ⵜⴻⵣⵎⴻⵔ ⴰⴷ ⵜⴰⵡⴻⴹ ⴰⵔⵎⴰ ⴷ 50% ⵙⴻⴳ ⵙⵙⵓⵎⴰ ⵏ ⵜⵡⴻⵍⵀⴰ (ⵙⵉⵄⵔ ⵎⴰⵔⴵⴰⵄⵉ).

« ⵙ ⴽⵔⴰ ⵏ ⵓⴽⴻⵔⵔⴰⵣ ⴰⴷ ⵢⴻⵙⴼⵓⵍⵍⵃⴻⵏ ⴷⴻⴳ ⵓⵎⵄⵉⵛ ⵏ ⵍⵎⴰⵍ ⵢⴻⵜⵜⴰⵍⴰⵙ ⴰⴷ ⴰⵙ-ⴷ-ⵜⴻⵜⵜⵓⵏⴻⴼⴽ ⵍⴻⵎⵄⴰⵡⵏⴰ-ⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵜⵡⴻⴽⴽⴻⴷ ⴷ ⴰⴽⴽⴻⵏ ⵛⵛⵓⵔⵓⴹ ⵏ ⵓⵙⴼⴰⵢⴷⵉ ⵙⴻⴳ ⵍⴻⵎⵄⴰⵡⵏⴰ-ⴰ ⵢⴻⵙⵙⴻⴼⵔⴰ-ⵜⴻⵏ-ⵉⴷ ⵢⵉⵡⴻⵏ ⵏ ⵓⵖⵜⴰⵙ (ⵇⴰⵔⴰⵔ) ⴰⵖⵍⵉⴼⴰⵏ ⴰⵢ ⵢⴻⵜⵜⵡⴰⵙⵜⴻⵏⵢⴰⵏ ⵙⴻⴳ ⵎⴻⵍⵎⵉ ⴽⴰⵏ, ⵢⴻⵔⵏⴰ ⴷ ⴰⵙⴻⵏⴷⵓⵇ ⴰⵖⴻⵍⵏⴰⵡ ⵏ ⵓⵙⵏⴻⴼⵍⵉ ⴰⴽⴻⵔⵔⴰⵣⴰⵏ (ⴼⵏⴷⴰ) ⴰⴷ ⵢⴻⴼⴽⴻⵏ ⵍⴻⵎⵄⴰⵡⵏⴰ-ⴰ.