ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⴷⵔⴰⵔ: ⵢⴻⵙⵙⴻⴼⴽ ⴰⴷ ⴷ-ⵜⴻⴷⴷⵓⵇⵇⴻⵙ ⵜⵎⴻⵔⵔⵉⵜ « ⵙ ⵜⵉⴷⴻⵜ » ⵙ ⵓⵇⴰⴷⴻⵔ ⵏ ⵢⵉⵍⵓⴳⴰⵏ ⵉⴳⵔⴰⵖⵍⴰⵏⴻⵏ

ⴰⴷⵔⴰⵔ – ⵢⴻⵏⵏⴰ-ⴷ ⵓⵏⴻⵖⵍⴰⴼ ⵏ ⵓⵀⴻⵢⵢⵉ ⵏ ⵡⴰⴽⴰⵍ ⴷ ⵜⵎⴻⵔⵔⵉⵜ (ⵙⵉⵢⴰⵃⴰ), ⴰⵎⴰⵔ ⴳⵀⵧⵓⵍ, ⴰⵙⵙ ⵏ ⵍⵃⴻⴷⴷ ⴷⴻⴳ ⵜⵉⵎⵉⵎⵓⵏ (ⴰⴷⵔⴰⵔ) ⴷ ⴰⴽⴽⴻⵏ ⵢⴻⵙⵙⴻⴼⴽ ⴰⴷ ⴷ-ⵜⴻⴷⴷⵓⵇⵇⴻⵙ ⵜⵎⴻⵔⵔⵉⵜ « ⵙ ⵜⵉⴷⴻⵜ » ⵢⴻⵔⵏⴰ ⵙ ⵓⵇⴰⴷⴻⵔ ⵏ ⵜⴻⴳⵏⴰ (ⵎⴰⵄⴰⵢⵉⵔ) ⵜⵉⴳⵔⴰⵖⵍⴰⵏⵉⵏ.

« ⵢⴻⵙⵙⴻⴼⴽ ⴰⴷ ⵏⴰⵡⴻⴹ ⵖⴻⵔ ⵓⵙⴷⵓⵇⵇⴻⵙ ⵏ ⵜⵉⴷⴻⵜ ⵏ ⵜⵎⴻⵔⵔⵉⵜ ⵖⴻⴼ ⵍⴻⵃⵙⴰⴱ ⵏ ⵜⴻⴳⵏⴰ ⵜⵉⴳⵔⴰⵖⵍⴰⵏⵉⵏ, ⵙ ⵓⵙⵙⴻⴱⴷⴻⴷ ⵏ ⵜⴻⵎⵚⵓⴽⵉⵡⵉⵏ (ⵀⴰⵢⴰⴽⵉⵍ) ⵏ ⵜⵎⴻⵔⵔⵉⵜ ⴷ ⵜⴻⴳⵏⴰⵜⵉⵏ ⵏ ⵓⵎⵎⴰⴳⴻⵔ ⴰⵢ ⵉⵡⴰⵜⴰⵏ ⵛⵛⵓⵔⵓⴹ ⵏ ⵜⵎⴻⵔⵔⵉⵜ ⵜⴰⵜⵔⴰⵔⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ ⴷⴻⴳ ⵢⵉⵊⵉⴼⴻⵕ ⵏ ⵓⵙⵙⴻⴼⵇⴻⴷ ⵏ ⵜⴻⵎⵚⵓⴽⵉⵡⵉⵏ ⵏ ⵜⵎⴻⵔⵔⵉⵜ ⴷⴻⴳ ⵜⵡⵉⵍⴰⵢⵜ ⵏ ⵓⴷⵔⴰⵔ.

ⴷⵖⴰ ⵉⵃⴻⵜⵜⴻⵜ-ⴷ, ⵎⴰⵙⵙ ⴳⵀⵧⵓⵍ, ⴷ ⴰⴽⴽⴻⵏ ⵢⴻⵙⵙⴻⴼⴽ ⴰⴷ ⴷ-ⵎⵢⴻⵣⴳⴻⵏ ⵢⵉⵎⴻⵥⵍⴰ (ⵅⴰⴷⴰⵎⴰⵜ) ⵏ ⵜⵎⴻⵔⵔⵉⵜ ⴷ ⵙⵙⵓⵎⴰⵜ ⵖⴻⴼ ⵍⴻⵃⵙⴰⴱ ⵏ ⵡⴰⵢⴻⵏ ⴰⵢ ⵃⵡⴰⴵⴻⵏ ⵢⵉⵎⴻⵔⵔⴰⵢⴻⵏ (ⵙⵓⵢⵢⴰⵃ), ⴰⵎⴰ ⴷ ⵡⵉⴷ ⵏ ⴷⴰⵅⴻⵍ ⵜⵎⵓⵔⵜ, ⴰⵎⴰ ⴷ ⵡⵉⴷ ⵏ ⴱⴻⵕⵕⴰ, ⵉ ⵍⵎⴻⵏⴷ ⵏ ⵓⵇⴰⴱⴻⵍ ⵏ ⵡⵓⴳⵓⵔⴻⵏ ⴰⵢ ⴷ-ⵢⴻⵜⵜⵎⴰⴳⴰⵔ ⵓⵃⵔⵉⵛ-ⴰ, ⴰⵎ ⵡⴰⴽⴽⴻⵏ ⴰⵢ ⵢⴻⵙⵙⴻⴼⴽ ⴰⴷ ⵜⵜⵡⴰⵖⴻⵍⵍⵜⴻⵏⵜ ⵜⴻⵙⵏⴰⵜⵡⵉⵍⵉⵏ ⵜⵉⵜⵔⴰⵔⵉⵏ ⵏ ⵜⴻⵖⵡⴰⵍⵜ ⴷⴻⴳ ⵓⵙⵙⴻⵏⵣⵉ ⵏ ⵢⵉⴼⴰⵔⵉⵙⴻⵏ ⵏ ⵜⵎⴻⵔⵔⵉⵜ.

ⵢⴻⵙⵙⴻⴼⴽ ⴷⴰⵖ ⴰⴷ ⵢⴻⵜⵜⵡⴰⵙⵏⴻⴼⵍⵉ ⵓⵙⵙⵉⵍⴻⵖ (ⵜⴰⴽⵡⵉⵏ) ⴷⴻⴳ ⵓⵃⵔⵉⵛ ⵏ ⵜⵎⴻⵔⵔⵉⵜ ⵉ ⵓⵙⵙⴻⵍⵀⵓ ⵏ ⵢⵉⵎⴻⵥⵍⴰ ⵏ ⵢⵉⵙⴻⵏⵙⴰ (ⴼⴰⵏⴰⴷⵉⵇ) ⴷ ⵓⵙⵙⴻⴼⵔⴻⴽ-ⵏⵙⴻⵏ ⵙ ⵓⴱⵔⵉⴷ ⴰⵙⴰⴷⵓⵔⴰⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ.

ⵎⴰⵙⵙ ⴳⵀⵧⵓⵍ ⵢⴻⴱⴷⴰ-ⴷ ⵜⵉⵔⵣⵉ-ⵏⵏⴻⵙ ⵏ ⵓⵅⴻⴷⴷⵉⵎ ⵙ ⵓⵙⵙⴻⵔⵙⵉ ⵏ ⵓⵥⵔⵓ ⴰⵎⴻⵣⵡⴰⵔⵓ ⵉ ⵍⴻⴱⵏⵉ ⵏ ⵢⵉⵡⴻⵜ ⵏ ⵜⴰⴷⴷⴰⵔⵜ ⵜⴰⵎⴻⵔⵔⴰⵢⴰⵏⵜ ⵏ ⵓⵏⴻⵥⵔⵓⴼ (ⵚⴰⵃⵔⴰ’) ⴰⵢⴷⴻⴳ ⴰⴷ ⵉⵍⵉⵏ 560 ⵏ ⵡⵓⵙⵓⵜⴻⵏ. ⵜⴰⴷⴷⴰⵔⵜ-ⴰ ⴰⴷ ⵜⵜ-ⵢⴻⵙⵙⴻⴼⵔⴻⴽ ⵓⴷⵉⵡⴰⵏ ⴰⵖⴻⵍⵏⴰⵡ ⵏ ⵜⵎⴻⵔⵔⵉⵜ, ⴰⴷ ⵜⴻⵜⵜⵡⴰⴱⵏⵓ ⴷⴻⴳ ⵡⴰⴷⴰⴼ ⵏ ⵓⴳⴰⴼⴰ (ⵛⴰⵎⴰⵍ) ⵏ ⵜⵉⵎⵉⵎⵓⵏ ⵢⴻⵔⵏⴰ ⴰⴷ ⴷ-ⵜⴻⵙⵇⴰⵎ ⵓⴳⴰⵔ ⵏ ⵓⵎⴻⵍⵢⴰⵕ ⵏ ⵢⵉⴷⵉⵏⴰⵕⴻⵏ.

ⵜⴰⴷⴷⴰⵔⵜ-ⴰ ⴰⴷ ⵜⴻⴹⴹⴻⴼ ⵜⴰⵊⵓⵎⵎⴰ ⵏ 15 ⵏ ⵢⵉⵇⴻⵟⵟⴰⵔⴻⵏ, ⵢⴻⵔⵏⴰ ⴰⴷ ⵉⵍⵉⵏⵜ ⴷⴻⴳ-ⵙ ⴰⵟⴰⵙ ⵏ ⵜⴻⵎⵚⵓⴽⵉⵡⵉⵏ, ⴳⴰⵔ-ⴰⵙⴻⵏⵜ ⴰⵙⴰⵍⴰⵢ (ⵎⵓⵜⵃⴰⴼ), ⴰⵎⴽⴰⵏ ⵉ ⵓⵙⵙⴻⵏⵣⵉ ⵏ ⵜⵖⴰⵡⵙⵉⵡⵉⵏ ⵏ ⵜⴻⵏⴹⵉ (ⵚⵉⵏⴰⵄⴰ ⵜⴰⵇⵍⵉⴷⵉⵢⵢⴰ), ⴰⵎⴽⴰⵏ ⴰⵢⴷⴻⴳ ⴰⴷ ⴷ-ⵜⵜⵉⵍⵉⵏⵜ ⵜⴻⴷⵢⴰⵏⵉⵏ ⴷ ⵜⵎⴻⵖⵔⵉⵡⵉⵏ ⴷ ⵡⵓⵔⵜⵉ ⵏ ⵜⴻⵣⴷⴰⵢⵉⵏ ⵉ ⵓⵎⴻⵔⵔⴻⵃ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⴱⴷⴻⵔ ⵜⵙⴻⵏⵜⵓⵜ ⵜⴰⵜⵡⵉⵍⴰⵏⵜ ⵏ ⵓⵙⴻⵏⴼⴰⵔ-ⴰ.

ⴰⵙⴻⵏⴼⴰⵔ-ⴰ ⴰⵎⴻⵔⵔⴰⵢⴰⵏ ⴰⴷ ⴷ-ⵢⵉⵍⵉ ⴷ ⵔⵔⴱⴻⵃ ⴰⵎⴻⵇⵔⴰⵏ ⵉ ⵜⴻⵎⵏⴰⴹⵜ-ⴰ ⵢⴻⵔⵏⴰ ⴰⴷ ⵢⴻⵜⵜⴻⴽⴽⵉ ⵎⵍⵉⵃ ⴷⴻⴳ ⵓⵙⵏⴻⴼⵍⵉ-ⵏⵏⴻⵙ (ⵜⴰⵏⵎⵉⵢⴰ), ⵍⴰⴷⵖⴰ ⵉⵎⵉ ⴰⴷ ⵢⴻⴼⴽ ⴰⵣⴰⵍ ⵉ ⵜⵎⴻⵔⵔⵉⵜ ⵜⴰⴳⴻⵏⵙⵉⵜ (ⴷⴰⵅⵉⵍⵉⵢⵢⴰ), ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⴳⵀⵧⵓⵍ ⴰⵢ ⴷ-ⵢⴻⵔⵏⴰⵏ ⴷ ⴰⴽⴽⴻⵏ ⴰⵡⴰⵏⴰⴽ ⵢⴻⴼⴽⴰ ⴰⵣⴰⵍ ⵉ ⵜⵎⴻⵔⵔⵉⵜ ⴷⴻⴳ ⵓⵏⵥⵓⵍ ⵏ ⵜⵎⵓⵔⵜ ⵢⴻⵔⵏⴰ ⵜⴰⴷⴷⴰⵔⵜ ⵜⴰⵎⴻⵔⵔⴰⵢⴰⵏⵜ ⴰⵎ ⵜⴰ ⵉⴱⴰⵏ ⴰⴷ ⴷ-ⵜⴻⵊⴱⴻⴷ ⴰⵟⴰⵙ ⵏ ⵢⵉⵎⴻⵔⵔⴰⵢⴻⵏ.

ⵢⴻⵔⵣⴰ ⴷⴰⵖ ⵓⵏⴻⵖⵍⴰⴼ ⵖⴻⴼ ⵓⵙⴻⵏⵙⵓ ⵓⵙⵍⵉⴳ ⵏ « ⵎⴰⵙⵙⵉⵏⴻ » ⴷⴻⴳ ⵜⵉⵎⵉⵎⵓⵏ, ⴷ ⵡⵉⵏ ⴰⵢ ⵢⴻⵜⵜⵡⴰⴱⵏⴰⵏ ⴷⴻⴳ 2011, ⵢⴻⵙⵄⴰ 44 ⵏ ⵜⴻⵅⵅⴰⵎⵉⵏ, 3 ⵏ ⵜⵎⵓⴷⵔⵓⵜⵉⵏ ⴷ 100 ⵏ ⵡⵓⵙⵓⵜⴻⵏ.

ⵢⴻⵙⵙⴻⴼⵇⴻⴷ ⴷⴰⵖ ⵓⵏⴻⵖⵍⴰⴼ ⴰⵙⴻⵏⵙⵓ ⵏ « ⴳⵧⵓⵔⴰⵔⴰ » ⵢⴻⵇⵇⵏⴻⵏ ⵖⴻⵔ ⵓⵎⴻⵣⵔⴰⵔ ⵏ ⵢⵉⵙⴻⵏⵙⴰ ⵏ ⴻⵍ-ⴷⵊⴰⵣⴰⵉⵔ, ⵢⴻⵔⵏⴰ ⵅⴻⴱⴱⵔⴻⵏ-ⵜ ⴷⵉⵏ ⵖⴻⴼ ⵢⵉⵎⴻⵥⵍⴰ ⵏ ⵓⵙⴻⵏⵙⵓ-ⴰ.

ⵡⴰ ⴷ ⴰⵙⴻⵏⵙⵓ ⵢⴻⵙⵄⴰⵏ 98 ⵏ ⵜⴻⵅⵅⴰⵎⵉⵏ, ⵙⵏⴰⵜ ⵏ ⵜⵎⵓⴷⵔⵓⵜⵉⵏ, ⵙⵏⴰⵜ ⵏ ⵜⴻⵅⵅⴰⵎⵉⵏ ⵉ ⵢⵉⵎⴻⵄⴷⴰⵕ, 3 ⵏ ⵜⵣⴻⵖⵡⵉⵏ ⵏ ⵢⵉⵙⴰⵔⴰⴳⴻⵏ ⴷ ⵢⵉⵡⴻⵜ ⵏ ⵜⵏⴻⵞⵞⵉⵜ.